Navigaziun principala

Cuntegn da la pagina

Dumonda en scritt Noi concernent la cunvegna tranter l'Ente Ospedaliero Cantonale, Bellinzona ed il chantun Grischun

sessiun: 25.03.2003
Ils 28 da favrer 2003 è vegnida renovada la cunvegna tranter l'Ente Ospedaliero Cantonale (Bellinzona) ed il chantun Grischun, resp. il departament da sanitad.
Questa cunvegna regla l'ospitalisaziun da pazientas e pazients da la regiun d'ospital Mesolcina-Calanda en ils ospitals da la cuminanza d'ospitals „Ospedale regionale Bellinzona e Valli ORVB“, a la quala i appartegnan l'Ospedale Regionale di Bellinzona, l'Ospedale di zona di Leventina, Faido e l'Ospedale di zona di Blenio, Acquarossa
Tenor la cunvegna s'oblighescha l'Ente Ospedaliero cantonale da pretender per las pazientas ed ils pazients da la regiun Mesolcina-Calanca en tut las classas las medemas tariffas sco quai ch'i vegn pretendì da las pazientas e dals pazients domiciliads en il Tessin. Persuenter sa participescha il chantun Grischun al defizit ed a las amortisaziuns dals ospitals, betg mo a quel da Bellinzona, ma ussa er a quels da Faido e d'Acquarossa.
En vista a questa clera egualisaziun (sin fundament da la cunvegna) da las trais surnumnadas structuras dals ospitals dumond jau la regenza da declerar daco ch'i dat per las pazientas e per ils pazients dal Moesano restricziuns en la pussaivladad d'eleger libramain sch'els vulan duvrar las structuras da Faido e Aquarossa. Quests indrizs èn ina part integrada da la cunvegna.

Cuira, ils 25 da mars 2003

Name: Noi

Session: 25.03.2003
Vorstoss: rg SchriftlicheAnfrage


Resposta da la regenza

Per garantir il provediment cun ospitals en la regiun Mesolcina-Calanca ha il chantun Grischun fatg l'onn 1990 ina cunvegna cun l'Ente Ospedaliero Cantonale, Bellinzona davart l'ospitalisaziun da pazientas e pazients da la regiun d'ospital Mesolcina-Calanca en l'ospital San Giovanni a Bellinzona.

En connex cun mesiras da raziunalisaziun han fusiunà l'ospital San Giovanni a Bellinzona, l'ospital di zona di Leventina, Faido, e l'ospital di zona di Blenio, Acquarossa, l'onn 2000 a l'organisaziun Ospedale Regionale Bellinzona e Valli (ORBV).

La fusiun dals trais ospitals a la nova organisaziun ORBV ha pretendì in'adattaziun a las novas relaziuns da la cunvegna tranter l'Ente Ospedaliero cantonale, Bellinzona, ed il chantun Grischun. La regenza ha approvà la nova cunvegna ils 25 da favrer 2003.

Da nov sa participescha il chantun Grischun, sco tar l'ospital San Giovanni a Bellinzona, er al deficit d'ospital ed a l'amortisaziun da l'ospital di zona di Leventina a Faido e da l'ospital di zona Blenio ad Aquarossa e quai tenor la relaziun dal total dals dis da tgira da l'ospital correspundent areguard ils dis da tgira da las pazientas e dals pazients da la regiun d'ospital Mesolcina-Calanca. La ORVB da sia vart è s'obligada da nov da transferir pazientas e pazients che basegnan in tractament supplementar (tractament postacut) en ils ospitals da la Mesolcina. Sche quels ospitals n'èn betg en cas d'acceptar las pazientas ed ils pazients per in tractament supplementar, pon quels vegnir transferids tenor la cunvegna er en ils auters ospitals da la ORVB.

Per il chantun Grischun sco er per las vischnancas da la regiun d'ospitals Mesolcina-Calanca na datti nagins custs supplementars pervi da la nova cunvegna. Pervi dal transferiment prematur da las pazientas e dals pazients da l'ospital central da Bellinzona che custa bler en la Clinica San Rocco (Grono) ch'è pli favuraivla u, en cas excepziunals, sche l'entrada en la Clinica San Rocco n'è betg pussaivla, en ils dus auters ospitals da la ORVB, duess la participaziun als custs dal chantun e da las vischnancas esser plitost pli pitschna.

Sin dumonda da la ORMO han ins renunzià en la nova cunvegna da tractar ils ospitals da Faido ed Aquarossa en medema moda sco la Clinica San Rocco. Areguard ils custs pli bass da la Clinica San Rocco, cumpareglià cun ils ospitals da la ORVB, è chapiblà la favurisaziun da la Clinica San Rocco tras la ORMO.

Per finir renda la regenza attent al fatg che persunas che mettan pais sin la tscherna libra d'ospital han la pussaivladad da far tar lur assicuranza da malsauns per in pretsch supplementar in'assicuranza supplementara per la “tscherna libra d'ospitals en l'entira Svizra”.

Datum: 6 da matg 2003