Navigaziun principala

Cuntegn da la pagina

Incumbensa da cumissiun Feltscher davart la reducziun supplementara da plazzas da lavur tar l'administraziun chantunala

sessiun: 11.06.2003
La cumissiun "examinaziun da la structura e da la prestaziun per sanar las finanzas chantunalas" ha stimà en sia analisa en mintga cas en moda fitg positiva il pachet da mesiras da la regenza e la reducziun da prestaziuns e da plazzas da lavur ch'è colliada cun quella e propona al parlament d'acceptar quellas mesiras cun paucas midadas.

Mesiras da spargn èn dolurursas. Regiuns, vischnancas ed auters purtaders han fatg lur objecziuns subjectivamain chapiblas cunter las propostas da sanaziun ed èn sa dustads cunter eventualas indossaments smesirads d'incumbensas e da custs. Tenor l'opiniun da la cumissiun èn quels spustaments d'ina dimensiun giustificabla, che sa chatta en il senn da la simmetria da las concessiuns.

La reducziun da prestaziuns e da plazzas da lavur proponida da l'administraziun e da la regenza n'è tenor l'opiniun da la cumissiun betg succedida cun la medema intensitad en tut ils secturs da l'administraziun chantunala. La discussiun differenziada da las passa 200 mesiras, las retschertgas da las commembras e dals commembers da la cumissiun, ils blers discurs cun l'administraziun, cun la regenza e cun la CdG, ma er cun il pievel han persvadì la cumissiun ch'il volumen da spargn en il sectur dal persunal stoppia esser almain per 70 plazzas pli grond che la proposta fatga da la regenza en la missiva. Ins sto però acceptar che uschia possia daventar necessaria in'ulteriura reducziun da las prestaziuns en singuls secturs.

I n'è betg l'incumbensa dal parlament sco gremi politic-strategic da sa maschadar en decisiuns operativas e da numnar en moda concreta la reducziun da las plazzas da lavur. Sco exempels sajan numnads qua mo ils suandants secturs: cussegliaziun da manaschis agriculs, uffizi da planisaziun, uffizi per industria, mastergn e lavur, uffizi per l'ambient, scol'auta professiunala da pedagogia, progimnasi (direcziun e services), stabiliments da retenziun, uffizi per la protecziun civila, uffizi da construcziun auta, uffizis districtuals da construcziun bassa, uffizi forestal. La regenza po proponer in accumpagnament adequat da la lavur tras il parlament.

La reducziun da plazzas da lavur da totalmain var 140 plazzas (170 bruttas, 140 occupadas oz) duai succeder en moda raschunaivla ord vista sociala e sur trais onns fin la fin da l'onn 2007. La realisaziun concreta da questa mesira duai succeder en moda precauta e duai vegnir concepida ensemen cun la regenza, l'administraziun ed il parlament.

La regenza vegn supplitgada d'elavurar - ensemen cun il parlament - mesiras che mainan fin l'onn 2007 ad ina reducziun d'ulteriuras 70 plazzas da lavur en l'administraziun chantunala.

Cuira, ils 11 da zercladur 2003

Name: Feltscher, Cavigelli, Maissen, Nigg, Parpan, Donatsch, Geisseler, Hanimann, Plozza, Suter, Trachsel, Tscholl, Vetsch

Session: 11.06.2003
Vorstoss: rg Auftrag


Resposta da la regenza

La valur directiva dal plan da plazzas importa 2'425.5 unitads (stadi dal 1. da matg 2003). Sche tut las mesiras en la missiva per l'examinaziun da structura e prestaziun per sanar las finanzas dal chantun vegnan realisadas, pon var 100 plazzas da lavur vegnir reducidas en il plan da plazzas fin l'onn 2007. Tar in pèr paucas mesiras n'èsi però betg cler sch'ils respargns vegnan cuntanschids tar ils custs reals u tar ils custs da persunal.

En connex cun l'elavuraziun dal program da sanaziun ha la regenza mess paisa sin quai che mintga departament paja ina contribuziun da respargn correspundenta a sias pussaivladads. Tar la reducziun da plazzas da lavur n'èn però vegnidas fatgas naginas premissas. Las plazzas da lavur duain vegnir spargnadas là nua che prestaziuns pon vegnir reducidas e nua che structuras pon vegnir simplifitgadas. Departaments e posts da servetsch, tar ils quals las expensas sa chattan en il sectur dal persunal, han purtà, tenor lur situaziun, tendenzialmain dapli propostas per il respargn da plazzas da lavur. Auters posts da servetsch han perencunter pudì sa concentrar surtut sin la reducziun dals custs reals, da posiziuns da contribuziuns u da pajaments. La reducziun da var 100 plazzas da lavur ch'è previsa en il pachet da structura e da sanaziun succeda en 23 da totalmain 51 posts da servetsch (inclusivamain dretgiras chantunalas e secretariats dal departament).

La finamira da l'incumbensa è da reducir totalmain 170 plazzas da lavur en l'administraziun centrala (var 7%). En l'incumbensa da la cumissiun vegnan menziunadas 11 unitads d'organisaziun, en las qualas i pudess vegnir spargnà plazzas da lavur tenor l'idea da la cumissiun. I vegn però renunzià a far ina glista da quellas prestaziuns che duain vegnir reducidas en quest connex. Perquai sto l'emprim vegnir fatga in'analisa per pudair marcar e numerar concretamain la reducziun da prestaziuns pussaivla. La regenza garantescha ch'er auters secturs e posts da servetsch che quels ch'èn vegnids menziunads en l'incumbensa da la cumissiun vegnian integrads en l'analisa. Quai dat garanzia che las plazzas da lavur vegnan stritgadas surtut là, nua chi va, dal puntg da vista dals interess communabels dal chantun e da sia populaziun, il plitgunsch da renunziar a l'activitad correspundenta.

Ina reducziun da plazzas da lavur da totalmain 170 plazzas da lavur po en mintga cas mo vegnir cuntanschida, sche tut las mesiras ch'èn preschentadas en la missiva per la sanaziun da finanzas vegnan realisadas e sche l'analisa menziunada dat ultra da quai in potenzial da respargn supplementar da 70 plazzas da lavur. En insaquants cas è il consentiment dal grond cussegl u da las votantas e dals votants premissa. Per che la reducziun da plazzas da lavur possia vegnir cuntanschida èsi ultra da quai urgentamain necessari ch'i na vegnian betg surdadas incumbensas supplementaras a l'administraziun. Novas incumbensas pretendan per regla resursas da persunal pli grondas. Cuntegnidas en la reducziun èn a la fin er 23 plazzas da lavur budgetadas, ma dapi in detg temp betg occupadas.

L'analisa vegn a mussar sche e co che ulteriuras 70 plazzas da lavur pon vegnir reducidas Excepziunalmain pon respargns correspundents er vengir cuntanschids sin il credit d'assistenza. Las saivs da segirezza persunalpoliticas per la reducziun da plazzas da lavur, sco ch'ellas èn menziundas en la missiva, valan er per ina reducziun da plazzas da lavur supplementara.

Dal rest vegn la regenza a s'engaschar per ch'i vegnia realisada ina part commensurada da quests respargns tar las organisaziuns selecziunadas e tar ils manaschis subvenziunads.

La regenza fa rapport en il ron dal controlling d'execuziun.
Ella è pronta d'acceptar l'incumbensa en il senn da las explicaziuns.

Datum: 8 da fanadur 2003