Navigaziun principala

Cuntegn da la pagina

Incumbensa Capaul concernent la finanziaziun restanta da la cassa da pensiun

sessiun: 11.06.2003
En la sessiun d'october da l'onn 2000 ha il cussegl grond approvà la revisiun totala da l'ordinaziun davart la cassa da pensiun chantunala. Il deficit da la reserva matematica necessaria per il 1. da schaner 2005 sto vegnir pajà tras las patrunas ed ils patruns ch'èn colliads obligatoriamain. Cun questa finanziaziun restanta resultan per il chantun e las vischnancas enormas obligaziuns finanzialas. En il messadi preschentà da la regenza (carnet nr. 3/2000-2001) muntava il deficit da la reserva matematica necessaria a 312 milliuns francs.
Durant ils ultims dus onns e mez èn las cundiziuns da basa ch'èn colliadas cun quai sa midadas fundamentalmain. Il deficit da la reserva matematica necessaria è prest sa dublà e munta cun di da controlla dals 31 da december 2002 a 616 milliuns francs (resp. 554 milliuns tar la valur sin il martgà). Ils debits per il chantun e las vischnancas vegnan a s'augmentar correspundentamain. Sulettamain il chantun vegn a stuair procurar ina summa da 375 400 milliuns francs. Vitiers vegnan anc las contribuziuns da las vischnancas da var 150 milliuns francs e quellas dals instituts independents da var 110 milliuns francs. Per emploià da vischnanca han ins da lez temp quintà cun ina summa da 50'000 francs. A la fin da l'onn 2002 era questa summa gia creschida ad 84'000 francs. Enconuschentamain stat il chantun davant gronds problems finanzials ed el fa actualmain in pachet cun mesiras da spargn rigurusas. En bleras vischnancas n'è la situaziun betg bler meglra suenter che pli e pli incumbensas vegnan adossadas ad ellas. Las discussiuns provocadas en tut la Svizra davart las relaziuns per la segunda pitga attiran medemamain l'attenziun.
En consideraziun da las summas enormas che vegnan qua retratgas a las finanzas e che vegnan ad engrevgiar las situaziuns finanzialas en moda profunda e durabla daventa urgentamain necessaria ina nova examinaziun generala da las modalitads da pajament da la cassa da pensiun chantunala. En quel ambient difficultus duai la regenza er mussar pussaivladads alternativas per la finanziaziun, per exempel ston vegnir examinadas dumondas da l'obligaziun da garanzia u da credits cun lunga durada. Tenor las experientschas dals davos onns pudessan talas investiziuns er esser interessantas per ina cassa da pensiun. Ultra da quai duai la regenza sclerir en spezial er las consequenzas finanzialas per il chantun e las vischnancas, tant pli che auters chantuns han survegnì problems pervi da sumegliants motivs. Sco minimum duess la regenza examinar, sche almain in termin prolungà da tschintg onns per il rembursament da las contribuziuns chantunalas e communalas na po betg vegnir concedì.

Cuira, ils 11 da zercladur 2003

Name: Capaul, Parolini, Zarro, Bär, Beck, Berther (Sedrun), Biancotti, Bundi, Casanova (Vignogn), Cathomas, Caviezel (Pitasch), Cavigelli, Kleis-Kümin, Luzio, Maissen, Parpan, Pfister, Crapp, Demarmels, Dermont, Fallet, Farrèr, Federspiel, Geisseler, Giacometti, Hardegger, Hartmann, Hess, Quinter, Rizzi, Schmid,Tomaschett, Tramèr, Tuor, Zanetti, Zanolari, Zindel

Session: 11.06.2003
Vorstoss: rg Auftrag



Resposta da la regenza

En la sessiun d'october 2000 ha il cussegl grond decidì da realisar durant ils onns 2005 fin 2011 la finanziaziun restanta da la cassa da pensiun chantunala dal Grischun (CP). La finamira da la finanziaziun restanta è l'independenza giuridica da la cassa ed il distatgament da la garanzia chantunala.

Il deficit da garanzia da la CP sto vegnir gulivà dal tuttafatg fin il pli tard ils 31-12-2011. Per tut las patrunas ed ils patruns ch'èn colliadas u colliads obligatoriamain cun la cassa vegn eruida per il 1-1-2005 la summa da daivets che sto vegnir pajada a la cassa da pensiun e che sto silsuenter vegnir amortisada fin ils 31-12-2011 en da princip set talgias. La basa da calculaziun furma la part procentuala da l'entir manco da mintga patruna u patrun ch'è colliada u collià obligatoriamain cun la cassa, calculada per il di da referenza dals 31-12-2000. Las annuitads che resultan ston vegnir fixadas per ils 31-12-2004 e vegnir pajadas fin la durada fixada.

Dapi la fin da l'onn 2000 èn las cundiziuns da basa e cun quai er la situaziun per la CP vegnidas massivamain mendras. Quest fatg chaschuna gronds quitads er a la regenza. Il motiv principal per questa situaziun ch'è vegnida mendra sa chatta en la baisse da bursa che dura dapi trais onns.

Il pajament dal deficit tutga tant il chantun sco er las vischnancas en medema moda. Dal puntg da vista da las mesiras da spargn dal chantun paisa la chargia supplementara spezialmain fitg. Il termin per ina finanziaziun restanta è però adina disfavuraivel. La regenza vul perquai da princip sa tegnair vi da la finanziaziun restanta da la cassa da pensiun decidida dal cussegl grond.

La CP ha communitgà a las vischnancas las cundiziuns per prender en consegna pajaments anticipads e per conceder emprests da daners en il rom da la finanziaziun restanta. Sin basa da la data finala tschernida dal cussegl grond per la finanziaziun restanta è vegnì previs da conceder emprests da daners fin il pli tard ils 31-12-2011. La regenza è però pronta d'examinar, sche la durada dals emprests da daners che vegnan concedids da la cassa da pensiun po vegnir prolungada per maximalmain diesch onns fin l'onn 2021. En il rom dals emprests da daners che durassan pli ditg vegniss er repartida l'amortisaziun sin ina durada pli lunga. Quai gidass a levgiar in pau la grevezza dals budgets publics.

En vista a la finanziaziun restanta sto vegnir stgaffida ina basa legala correspundenta. La regenza planisescha da suttametter quella a temp al cussegl grond en il rom d'ina revisiun da la lescha davart las finanzas.

I sto vegnir fatg attent che la confederaziun examinescha actualmain mesiras per eliminar la sutgaranzia en la prevenziun professiunala. Tenor il plan da temp pon las mesiras da sanaziun proponidas entrar en vigur il pli baud il 1-4-2004. Las adattaziuns correspundentas da la LPP ston anc vegnir concludidas da las chombras federalas. La regenza observa er quests svilups conscienziusamain e vegn a proponer u ad instradar a temp inditgà uschenavant che quai è raschunaivel mesiras correspundentas.

Sco explitgà considerescha la regenza sco correct ed impurtant da betg divergiar da la finanziaziun restanta decidida dal cussegl grond.

La regenza è pronta d'acceptar questa incumbensa en il senn da las explicaziuns.

Datum: 2 da settember 2003