Navigation

Inhaltsbereich

Dumonda Jäger concernent l'augment da consum da giuvenils ( examinar in scumond per il consum d'alcohol en lieus publics)

Sessiun: 12.06.2003
Malgrà tut las stentas absolutamain professiunalas areguard la prevenziun, cunzunt da la vart da las scolas popularas grischunas, daventi l'ultim temp adina pli grev da tegnair sut controlla la protecziun da la giuventetgna en il sectur da l'alcohol.
Igl è en general scumandà da vender bavrondas alcoholicas a giuvenils. Tscherts geners d'alcohol èn, tenor la lescha d'ustaria chantunala, lubids per la vendita cunzunt pir davent da 18 onns. L'execuziun da questas determinaziuns è dentant fitg greva, er sche la polizia sa dat vairamain fadia, datti en singuls cas adina puspè chastis. Ins po observar adina dapli en citads e sin il pajais che giuvenils er da la scola populara arranschan - spezialmain en la stagiun pli chauda - vairas festinas sin las plazzas e giassas. Tar quella chaschun vegn savens consumà alcohol en surmesira. L'alcohol na vegn per regla betg cumprà en ils manaschis da restauraziun. Ils giuvenils al prendan cun sai.
Quest svilup displaschaivel na sa restrenscha betg be sin la Svizra. En auters stadis èn vegnidas examinadas e per part er realisadas novas mesiras da la polizia. En blers pajais dals Stadis Unids è il baiver alcohol generalmain scumandà en lieus publics (er per persunas creschidas). Er en la Spagna vegni fatg sforzs per scumandar il consum d'alcohol sin via.
Tenor la lescha chantunala d'agid per toxicomans dals 2 da mars 1997 è ils chantun obligà, ensemen cun las vischnancas, da garantir ina prevenziun da toxicomania che correspunda al basegn. Las autoritads na dastgan perquai betg esser inactivas areguard il svilupa explitgà.

Nus supplitgain la regenza da respunder las sequentas dumondas:

1. Tge mesiras da prevenziun ha prendì il chantun per evitar il consum d'alcohol surmesirà da giuvenils? Co èn quellas sa cumprovadas?

2. Co pon ins garantir ina meglra protecziun , per exempel sco quai ch'ella è fixada en la lescha d'ustaria per il chantun Grischun?

3. Tge manegia la regenza da la tesa, ch'ins pudess scumandar da baiver alcohol en lieus publics (almain limitar ils lieus ed evtl. er ils temps)?

4. Tge basa legala stuess vegnir stgaffida per in tal scumond?

Cuira, ils 12 da zercladur 2003

Name: Jäger, Michel, Märchy-Michel, Bachmann, Bär, Barandun, Baselgia-Brunner, Berther (Mustér), Berther (Sedrun), Biancotti, Bischoff, Bleiker, Brunold, Bundi, Capaul, Casanova (Vigogn), Casanova (Cuira), Casty, Cathomas, Cavegn-Kaiser, Caviezel (Pitasch), Caviezel-Sutter (Tusaun), Christ-Fleischhacker, Christoffel-Casty, Dermont, Donatsch, Dudli, Fasani, Federspiel, Feltscher, Frigg, Gredig-Hug, Hanimann, Hartmann, Hübscher, Jaag, Jenny, Joos-Buchli, Koch, Krättli-Lori, Luzio, Maissen, Marti, Meyer-Grass (Caustra vitg), Meyer Persili (Cuira), Mengotti, Montalta, Noi, Parpan, Perl, Peyer, Pfenninger, Pfiffner, Pfister, Righetti, Robustelli, Schütz, Stoffel, Suter, Tomaschett, Trachsel, Tremp, Trepp, Tuor, Wettstein, Zanetti, Zanolari, Zarro, Zindel

Session: 12.06.2003
Vorstoss: rg Anfrage


Resposta da la regenza

1. Cun il center per prevenziun e promoziun da la sanadad (ZEPRA) ha il chantun mess a disposiziun a las vischnancas la primavaira 2001 per lur sustegn in partenari da contact cumpetent. Per incumbensa dal chantun lantscha il ZEPRA per il mument il project "Toximania cumenza il mintgadi. Prevenziun er.". Quai è ina campagna da prevenziun en connex cun drogas areguard il consum da tubac, cannabis ed alcohol. Quest project sa drizza a geniturs, persunas d'instrucziun e giuvenils en scolaziun en la vegliadetgna da 11 fin 18 onns. En il sectur da las scolas èn vegnids realisads projects da prevenziun punctuals tras l'uffizi per la scola popularas ed il sport.

Ins n'ha anc betg examinà, sch'igl ha dà sin basa da las activitads realisadas ina meglieraziun areguard il cumportament dals pertutgads visavi drogas. L'effect da la prevenziun è fitg grev da mesirar. En mintga cas ha mussà ina enquista tar vischnancas, autoritads da scola, instituziuns e persunas privatas, che quels ch'han fatg diever da la purschida dal ZEPRA èn stads - cun in'excepziun - fitg cuntents cun il servetsch prestà. Manchentà è vegnì il fatg ch'il modul specific per ina prevenziun cumplessiva da vischnanca e da scola na saja anc betg realisà.

2. La meglieraziun da la protecziun da giuventetgna pretenda ina realisaziun consequenta da la basa legala existenta tras l'autoritad communala incaricada cun l'execuziun. Latiers tutgan controllas regularas dals posts da vendita, meglras instrucziuns dal persunal che venda e la realisaziun da sancziuns visavi ils responsabels. Medemamain ston ils geniturs vegnir includids en la responsabladad. Finalmain ston las vischnancas resguardar la protecziun da la giuventetgna, sch'ellas conceden permissiuns per occurrenzas, a las qualas i vegn vendì bavrondas alcoholicas, e ston, sch'i fa basegn, er far prescripziuns correspundentas.

En connex cun la campagna "checkpoint" porscha il ZEPRA dapi l'avust 2002 gratuitamain differents documents als posts da distribuziun e da vendita. Uschia vegnan per exempel purschids bratschlets da controlla en colur che pussibiliteschan als organisaturs d'occurrenzas da divider ils giasts en duas fin trais categorias da vegliadetgna. Las persunas ch'èn occupadas cun servir pon lura, sin fundament da la colur dal bratschlet, enconuscher tgenins giasts che pon consumar alcohol.

3. L'autonomia da la vischnanca è cumpetenta da relaschar tals scumonds. Sch'in tal scumond restrenscha propi il consum d'alcohol, pon ins dubitar, cunzunt sche betg tut las vischnancas na relaschan scumonds correspundents per l'entir territori e sch'i mauncan ils organs da controlla per ch'il scumond vegnia realisà. Igl è da supponer che cun relaschar in scumond correspundent vegnia spustà il problem en in auter lieu u - sco en l'America - che la buttiglia u la stgtla d'alumini vegnia messa gia en il post da distribuziun en in satg da palpiri per zuppentar il consum d'alcohol.

4. In scumond dal consum d'alcohol en localitads publicas signifitga ina intervenziun en il dretg da libertad.

5. In tal scumond sto vegnir relaschà sco lescha en il senn formal, sto esser d'interess public e raschunaivel.

Datum: 2 da settember 2003