Navigation

Inhaltsbereich

Sessiun: 13.06.2003
Entant che la Svizra porscha soluziuns attractivas en il rom da la pauschalisaziun a persunas natiralas da l'ester, è la situaziun fiscala per Svizzers bainstants nuncuntentaivla cun excepziun dals chantuns cun taglias bassas sco Sviz e Zug.
La regenza dal chantun Schaffusa ha perquai preschentà dacurt al cussegl chantunal in rapport cun ina revisiun planisada da la lescha da taglia che ha la finamira d'attrair dapi persunas che gudognan fitg bain. Il concept è vegnì inizià dal directur da finanzas socialdemocrat Herrmann Keller. Cun tariffas da taglia che sa diminueschan degressivamain enstagl da crescher en moda progressiva per entradas sur in mez milliun e facultads sur 10 milliuns francs duain vegnir animads fitg buns pajataglias da prender là domicil.
Quella tariffa fa ch'il chantun Schaffusa è pli attractiv ch'il chantun Turitg per entradas autas e mo pauc pli char ch'ils chantuns Zug e Sviz. Per grondas facultads stuessan ins schizunt pajar main a Schaffusa che a Zug.
Cun il chantun Grischun èn colliads divers Svizzers bainstants e possedan qua proprietads funsilas. Sin questa basa e cun ina politica da taglia cun cleras finamiras pudess il chantun Grischun perquai er attrair pajataglias interessants e meglierar ses substrat da taglia. Quai contribuiss ad evitar augments da taglia. Ultra da quai existiss er la schanza ch'i suandassan activitads d'interpresa.

Perquai pari da valair la paina d'examinar sch'ins po eruir pussaivladads fiscalas attractivas per persvader persunas che gudognan bain e che han ina gronda facultad da prender domicil en Grischun (p.ex. reducziun da la progressiun tar las taglias sin las entradas e/u sin la facultad, reducziun da la taglia sin la facultad tar tschertas valurs da facultad sco participaziun ad interpresas e.u.v., fixaziun d'ina grevezza fiscala maximala, p.ex. en pertschients da l'entrada realisada sco er autras pussaivladads).

La regenza vegn perquai supplitgada da respunder las suandantas dumondas:

1.Quant gronda fiss ina eventuala perdita da taglia da pajataglias gia domiciliads en Grischun en il segment da las entradas e da la facultad sco quai ch'i resulta da la proposta dal chantun Schaffusa?

2. Cuntrastattan ponderaziuns principalas u impediments da taglia insuperabels ad ina revisiun da la lescha da taglia tenor la proposta dal chantun Schaffusa?

3. Resguarda la regenza magari in model sco la proposta da Schaffusa, però adattà a las relaziuns dal chantun Grischun, sco raschunaivel?

4. Tge pussaivladads fiscalas u autras resguarda la regenza sco raschunaivlas per render attractiv noss chantun a persunas cun grondas entradas e facultads e ch'èn colliadas stretgamain cun el da prender domicil en il chantun Grischun?

Cuira, ils 13 da zercladur 2003

Name: Brüesch, Wettstein, Cathomas, Bachmann, Bär, Biancotti, Bleiker, Brunold, Büsser, Butzerin, Cahannes, Capaul, Casanova (Vignogn), Casanova (Cuira), Cavigelli, Conrad, Dudli, Fleischhauer, Göpfert, Gredig-Hug, Hanimann, Hardegger, Hartmann, Hess, Hübscher, Janom Steiner, Jeker, Keller, Krättli-Lori, Lemm, Luzio, Märchy-Michel, Montalta, Parolini, Parpan, Portner, Quinter, Righetti, Sax, Stiffler, Thomann, Trachsel, Tramèr, Tscholl, Tuor, Vetsch, Zanolari, Zarro, Zegg

Session: 13.06.2003
Vorstoss: rg Anfrage

Resposta da la regenza

Partind d'in rapport da la regenza chantunala da Schaffusa vegn fatga la dumonda, sche fitg buns pajataglias pudessan vegnir attratgs cun sbassar las tariffas da taglia per entradas pli autas che 500'000. fr. e facultads pli autas che 10 milliuns fr. La regenza vegn supplitgada da respunder quatter dumondas.

1.Las perditas da taglia concretas tar tariffas da taglia degressivas na pon betg vegnir calculadas, cunquai ch'i dat differentas pussaivladads per concepir la tariffa. L'administraziun da taglia ha però eruì tge perditas da taglia che resultassan, sch'ins n'imponess insumma nagina taglia pli sin entradas e facultads sur las limitas numnadas. Cun quai vegn mussà il substrat da taglia che pudess maximalmain ir a perder. Tar ils pajataglias illimitads e tar ils pajataglias cun pauschalas resultassan cun la supposiziun numnada perditas da var 8.5 milliuns fr.
Tar ils pajataglias limitads pon medemamain resultar perditas da taglia; questas na pon però betg vegnir calculadas.

2.Dal puntg da vista giuridic sto vegnir examinà sche la soluziun proponida po vegnir concepida confurm a la constituziun, q.v.d. en emprima lingia sch'ina tariffa degressiva po vegnir messa d'accord cun il princip da l'imposiziun da taglia tenor la prestaziun finanziala (art. 127 CF). Sa basond sin in'expertisa da prof. P. Hinny da l'universitad da Friburg affirmescha il cantun Schaffusa questa dumonda.
Per il chantun Grischun sto plinavant vegnir examinà sch'i stuessan vegnir tratgas conclusiuns divergentas or da la nova constituziun chantunala. Cunquai che l'art. 95 al. 1 nCC repeta las disposiziuns da la constituziun federala, na sto questa norma betg vegnir examinada vinavant. Il cuntegn e l'impurtanza da l'art. 95 al. 2 nCC èn perscrutads memia pauc enfin uss. Per la dumonda che sto vegnir giuditgada qua po vegnir menziunà ch'il mantegniment da la voluntad da prestaziun e da la cumpetitivitad na dastgass betg impedir ina tariffa degressiva.
La regenza parta dal fatg ch'ina tariffaziun confurma a la constituziun per pajataglias cun domicil en il Grischun saja pussaivla. L'applicaziun d'ina tariffa degressiva per ils pajataglias limitads pudess percunter chaschunar problems considerabels. Ils pajataglias limitads pajan mo ina part da l'entrada resp. da la facultad en il chantun Grischun. Per fixar la tariffa da taglia applitgabla vegn però sa basà sin la progressiun totala, q.v.d sin tut l'entrada resp. tut la facultad imponibla. Ina tariffa degressiva avess per consequenza che grevezzas fiscalas pli bassas resultassan cun facturs totals creschents, quai che cuntrafaschess als princips da l'egualitad giuridica e da l'imposiziun da taglia tenor la prestaziun finanziala.

3.Sin basa da dubis da dretg constituziunal en il sectur dals pajataglias limitads considerescha la regenza quai sco betg raschunaivel da surpigliar il model discutà.
Ultra da quai stuessan vegnir prendidas ulteriuras mesiras en il Grischun per pudair cuntanscher questa finamira. La taglia sin l'ierta per ils descendents directs dastgass retegnair ils pajataglias prendids en mira da sa domiciliar en il Grischun. Las perditas da taglia d'approximativamain 20 milliuns fr. che resultassan d'ina aboliziun da la taglia sin l'ierta per descendents na po il chantun Grischun però betg sa prestar en la situaziun finanziala actuala.
Pervi da la situaziun geografica dal Grischun considerescha la regenza quai sco pauc probabel che pajataglias cun activitad da gudogn fitg aut sa tirassan natiers. L'immigraziun singula da pensiunads fitg bainstants para percunter imaginabla. Sche quests pajataglias pudessan equilibrar las perditas da taglia (per consequenza da l'introducziun d'ina tariffa degressiva) dals pajataglias ch'èn gia domiciliads en il Grischun, è però almain intschert.

4.La regenza na vesa per il mument naginas autras pussaivladads da facilitar a persunas cun entradas e facultads fitg autas da prender domicil en il Grischun. En il rom da la proxima revisiun da la lescha vegnan il departament da finanzas e l'administraziun da taglia a stuair far ponderaziuns en questa direcziun.

Datum: 9 da settember 2002