Navigation

Inhaltsbereich

Sessiun: 13.06.2003
En il chantun Tessin vischin as constatescha in augment extraordinari tar la plantaziun ed il commerzi da cannabis. La svieuta è relevanta e surpassa 60 milliuns francs. Da vart dal departament cumpetent per instituziuns e davart da la dretgira penala (procura publica) è vegnì realisà in plan anti-cannabis “indoor” ed “outdoor” vast ed operativ: 69 persunas arrestadas, 93 persunas interrogadas ed accusadas, butias da chonv serradas, 188'000 plantas da chonv confiscadas, 3 tonnas chonv setgentà confiscà. Sco ch'ins po concluder da questas cifras, ha il chantun pers la controlla da quest problem ed empruva ussa da'l schliar cun acziuns repressivas.
Dischplaschaivlamain cumenza uss il probelm da cannabis a sa far valair er en il Moesano. Las persunas ch'èn activas en il sectur da chonv, spezialmain en il champ cun l'intent da plantar e da far commerzi cun drogas, emprovan ussa da far lur fortuna probablamain pervi da la repressiun actuala en il chantun Tessin vischin en il Moesano, nua ch'els han confidenza d'ina controlla main punctuala e main severa.

Sin fundament da questas explicaziuns vegnan fatgas a la regenza las suandantas dumondas:

1) Sa la regenza novas dal fenomen creschent da la plantaziun da chonv “indoor” ed “outdoor” en il Moesano?

2) Ha il chonv che vegn plantà actualmian en il Moesano ina concentraziun da THC ch'è pli auta che la valur permessa?

3) Sche questa valur duess vegnir surpassada, vul la regenza cumbatter il fenomen resolutamain e radicalamain cun utilisar forsa las medemas metodas sco en il chantun Tessin?

4) Tge libertads d'agir han las autoritads localas (vischnancas) e co pon ellas giustifitgar envers la populaziunlas differentas strategias d'intervenziun tranter ils dus chantuns vischins ?

Cuira, ils 13 da zercladur 2003

Name: Pedrini, Righetti, Zarro, Capaul, Giovannini, Keller, Kleis-Kümin, Luzio, Mengotti, Noi-Togni, Plozza, Zanetti, Zanolari

Session: 13.06.2003
Vorstoss: rg Interpellation


Resposta da la regenza

1. La regenza enconuscha la problematica da l'augment da la cultivaziun da chonv tant en la Mesolcina sco er en autras regiuns dal chantun. Tar la
gronda part da las cultivaziuns en la Mesolcina sa tracta da talas sin chomp liber. Cultivaziuns indoor èn l'excepziun, ellas s'augmentan però en general.
En tut vegn cultivà chonv en Grischun sin ina surfatscha da var 1'700 aras.

2. Il chonv cultivà en Grischun ha regularmain ina concentraziun da THC da cleramain sur 0.3% e sto perquai vegnir numnà chonv da drogas. Or dal puntg da vista dal dretg penal daventa quella valur pir impurtanta a partir dal mument che quel chonv vegn racolt ed effectivamain duvrà en la producziun da meds narcotics u che la planta sezza serva sco med narcotic. Fin a quel mument n'è la cultivaziun da chonv tenor la lescha e la pratica dal tribunal federala anc nagin'acziun chastiabla. La lescha da narcotics chastia mo la cultivaziun da chonv per la producziun da meds narcotics.

3. Sa chapescha che la regenza cumbatta la producziun da chonv ch`è pensada per far meds narcotics. La polizia chantunala e la procura publica èn però liadas vi dals cunfins definids da la lescha e da la giurisdicziun. Las autoritads da persecuziun penala dal Grischun e dal Tessin tschertgan ina moda da proceder unifurma. En quest senn ha la polizia chantunala confiscà e destruì la stad chonv en la Val Mesauc, e quai en connex cun proceduras pendentas. Ultra da quai ha ella registrà tut las plantaschas ed ha denunzià tar la procura publica quels producents, che vegnan suspectads da duvrar il chonv cultivà a moda illegala. Quella ha da sia vart confiscà las plantaschas (senza las pudair sequestrar u destruir, gia che per quai manca la basa legala resp. vegn premess ina decisiun penala cun vigur legala) ed il medem mument obligà ils producents da garantir ch'il chonv vegnia duvrà mo per intents legals. Ulteriurs diesch producents èn vegnids ordinads dal departament da giustia, polizia e sanitad da communitgar il cumprader, l'utilisaziun dal chonv ed il termin da l'elavuraziun sco er da confermar l'elavuraziun al lieu. Il medem mument è vegnida smanatschada a quels producents la confiscaziun e la destrucziun da la racolta, sch'i dettia indizis ch'il chonv saja vegnì duvrà per la producziun da meds narcotics.

4. Las vischnancas n'han tar il cumbat da la cultivaziun da chonv naginas cumpetenzas spezificas da dretg administrativ. Ellas pon però guardar ch'eventualas cultivaziuns vegnian fatgas mo en las zonas d'agricultura. Ultra da quai pon ellas annunziar a la polizia chantunala u a l'uffizi d'agricultura chantunal da tut temp cultivaziuns remartgadas.

Datum: 2 da settember 2003