Navigaziun principala

Cuntegn da la pagina

Incumbensa da fracziun Arquint per far in rapport davart las consequenzas da l'aboliziun dal progimnasi

sessiun: 14.06.2003
La regenza vegn supplitgada da preschentar al parlament in rapport davart las consequenzas da l'aboliziun dal progimnasi.
Quel rapport duai sclerir - sper las ponderaziuns da la politica regiunala - cunzunt ils aspects da la politica da furmaziun che sa tschentan per ina structura da gimnasi decentrala, ma er per il rinforzament e la garanzia da la qualitad dal stgalim superiur da la scola populara grischuna.

Cuira, ils 14 da zercladur 2003

Name: Arquint, Baselgia-Brunner, Bucher-Brini, Frigg-Walt, Jaag, Jäger, Peyer, Pfenninger, Pfiffner, Trepp, Zindel

Session: 14.06.2003
Vorstoss: rg Auftrag


Resposta da la regenza

Avant da reveder la lescha davart las scolas medias en il chantun Grischun è vegnida examinada la dumonda da manar vinavant il progimnasi en las scolas medias grischunas. En questas examinaziuns èn surtut vegnidas cumpraisas las incumbensas or da las intervenziuns parlamentaras, las qualas èn vegnidas assegnadas dal cussegl grond cun gronda maioritad (postulat von Ballmoos concernent la durada da la scolaziun da maturitad [PCG october 1992, p. 437 ss.] e postulat dr. Maissen concernent la via da furmaziun nunlineara [PCG november/december 1993, p. 592 ss.]). Concernent il postulat dr. Maissen ha la regenza gì d'examinar la dumonda d'abolir il progimnasi. Sin basa da la situaziun en il stgalim superiur da la scola publica da lez temp e cun il conclus dals 10 da settember 1996 (prot. nr. 2043) è ella s'exprimida da mantegnair il progimnasi. Il cussegl grond ha concludì en il rom dal tractament da la revisiun da la lescha davart las scolas medias (PCG mars 1998, p. 697) da stritgar ils postulats menziunads.

En il fratemp è la situaziun da scola sin il stgalim superiur da la scola publica ed en ils gimnasis sa midada considerablamain. Ils gimnasis grischuns han terminà cun success la refurma da las scolas medias 98 realisond il reglament per renconuscher la maturitad (RRM) e la scursanida da la durada da la scolaziun. Dapi il cumenzament da l'onn da scola 2002/03 vegnan instruids tuttas scolaras e tuts scolars sin il stgalim superiur da la scola publica sper l'instrucziun en la prima lingua en duas linguas estras obligatorias. Diversas vischnancas mainan lur scola, en il rom da la refurma dal stgalim superiur, confurm als models A, B u C.

Actualmain vegnan er mesiras da spargn sin il sectur da scola media discutadas en connex cun las discussiuns parlamentaras tar la missiva "examinaziun da la structura e da las prestaziuns per la sanaziun da las finanzas dal chantun". En il center stattan en quest connex l'introducziun da partiziuns da prestaziun al progimnasi u la reducziun dal dumber da scolaras e scolars en las scolas medias en il rom d'ina regulaziun da las quotas.

Tenor l'opiniun da la regenza s'impona l'elavuraziun d'in rapport be alura, sch'il cussegl grond dess la preferenza ad ina mesira da spargn per il sectur da la scola media, la quala ha caracter provisori pervi d'ina limitaziun temporala.
Sut questa constellaziun savess in rapport furnir la basa necessaria per ulteriuras decisiuns che pertutgan il stgalim secundar I (stgalim superiur da la scola publica e progimnasi).
Quel avess da cuntegnair ina analisa da la situaziun dal stgalim secundar I e da sclerir propostas da soluziuns pussaivlas ina da quellas fiss l'aboliziun dal progimnasi.
La regenza è pronta da prender encunter l'incumbensa en il senn da questas explicaziuns e restricziuns, uschia ch'in rapport fiss d'adattar temporalmain ad ina eventuala limitaziun temporala da la mesira da spargn.
Per pudair medemamain resguardar las experientschas cun ina tala mesira, na po in rapport betg vegnir empermess avant la fin dal 2006, l'entschatta dal 2007.

Datum: 8 da fanadur 2003