Navigation

Inhaltsbereich

Sessiun: 25.08.2003
Las mesiras da spargn rigurusas da la confederaziun per ils onns 2004 2007 han per la construcziun da la via naziunala e per il traffic da viafier consequenzas dolurusas. Quai maina cunzunt a retardaziuns tar projects che sa chattan pir en la fasa da planisaziun. Sanaziuns planisadas cunter la canera na dastgan però betg vegnir suspendidas, uschiglio mettess il stadi en dumonda sia credibladad en il sectur da la politica da l'ambient. Ultra da quai exista qua in'obligaziun legala.
Uschia han ils vischins directs da la ruta dal San Bernardin, dals quals la qualitad da viver è vegnida reducida ils ultims onns pervi da l'augment da traffic da camiuns grevs, in dretg sin mesira da protecziun cunter la canera.
Suenter ch'il transferiment dal vial da nord da la A 13 tranter Cuira e Zizers tar il vial da sid è sa spustà pervi da las mesiras da spargn menziunadas lunsch davent vegn la regenza supplitgada da far tut per che las paraids da protecziun cunter la canera vegnian construidas fin l'onn 2006 tar questa part da la via naziunala. La finanziaziun po vegnir garantida en il rom dal program da spargn cun fixar da nov las prioritads da realisaziun tar ils projects da la via naziunala en Grischun. Plinavant vegn la regenza supplitgada da protestar tar ils posts responsabels per che las sanaziuns cunter la canera vi dal traject Sargans - Cuira planisadas da las VFF l'onn 2005 na vegnian betg retardadas. Oravant tut sa tracti da reducir la canera da las punts d'atschal da las VFF a Landquart che mulesta e strapatscha la gnerva da la populaziun da Landqaurt e da Mastrils da la damaun marvegl a la saira tard.

Cuira, ils 25 d'avust 2003

Name: Dudli, Nigg, Geisseler, Beck, Bleiker, Büsser, Casty, Caviezel (Tusaun), Conrad, Donatsch, Fleischhauer, Göpfert, Gredig-Hug, Hübscher, Janom Steiner, Jeker, Lemm, Möhr, Montalta, Parolini, Pedrini, Pfiffner, Portner, Ratti, Robustelli, Stiffler, Stoffel, Trachsel, Vetsch (Claustra), Zarn, Zindel, Caviezel (Cuira), Campell

Session: 25.08.2003
Vorstoss: rg Auftrag



Resposta da la regenza

Sco quai ch'ils catasters da canera en il sectur da la via naziunala A 13 da la Val dal Rain grischuna mussan, èn tenor las directivas da l'ordinaziun federala davart la protecziun cunter canera mesiras necessarias unicamain en la regiun da Trimmis e da Cuira nord. L'exposiziun publica dals plans en il cas da Cuira è succedida e las paraids da protecziun cunter la canera vegnan realisadas en quest cas ils proxims onns. Oriundamain ha previs il program da sanaziun cunter la canera da la A13 per la vischnanca da Trimmis ina paraid da protecziun cunter la canera mo en la regiun da "Strässli", perquai che las limitas da canera decisivas vegnan surpassadas là mo tar singuls bains immobigliars. En il decurs dals scleriments da detagl han ins percurschì ch'i saja raschunaivel da prender per mauns er la renovaziun architectonica necessaria da questa part da la via naziunala. Las ponderaziuns d'optimar la dimensiun da la sanaziun, ils andaments da construcziun, ils custs sco er las emissiuns da canera e da svapurs han mussà ch'in spustament dal vial dal nord represchentia la soluziun la pli raschunaivla e che la durabilitad soziala ed ecologica saja garantida uschia il meglier. L'exposiziun publica dals plans dal project ha, cun l'approvaziun da la confederaziun, pli probabel lieu la primavaira 2004. Indicaziuns fidadas davart l'entschatta da las lavurs da construcziun na pon betg vegnir fatgas pervi da las mesiras da spargn da la confederaziun. Per la realisaziun da las paraids da protecziun cunter la canera oriundamain previsas a Trimmis stuess vegnir quintà cun custs da 2 - 3 milliuns francs, damai che tschertas lavurs d'amplificaziun e da sanaziun minimalas, sco la construcziun d'in vial da panna mo d'ina vart da la via, fissan indispensablas er tar questa soluziun.
La regenza è areguard questas circumstanzas da l'idea ch'i saja impurtant da promover la spostaziun dal vial dal nord, perquai che l'avantatg da quella soluziun è cleramain pli grond per ils vischins e la vischnanca da Trimmis. Ina construcziun da paraids da protecziun cunter la canera a curt termin per lung da la via actuala sto perquai vegnir refusada or da motivs tecnics e da procedura. Ina tala mesira reduciss decisivamain las schanzas per la soluziun globala planisada.
Areguard il traffic da viafier stoi da l'autra vart vegnir menziunà che la lescha federala davart la sanaziun cunter la canera da las viasfier ed il conclus federal correspundent davart la finanziaziun èn entrads en vigur il 1. d'october 2000. Las mesiras da spargn actualas da la confederaziun n'han pli probabel nagin effect negativ per la sanaziun cunter la canera da las viasfier. Las VFF e la VR sa basan tar la sanaziun cunter la canera primarmain sin meglieraments dals vaguns. Tar ils vaguns da persunas da las VFF duai il program esser terminà per la fin da l'onn 2004, tar ils vaguns da martganzia da las VFF e da privats per l'onn 2009. Tar la VR sto l'emprim vegnir sclerì en il rom dal project current da perscrutaziun e da svilup sche la proposta da soluziuns da las VFF è insumma adattada per ina viafier muntagnarda cun frains da vacuum.
En lieus, nua ch'ins constata er en l'avegnir surpassaments da las limitas malgrà la sanaziun dals vaguns, vegnan dads impuls per projects da construcziuns per la sanaziun cunter la canera. Sco gia communitgà l'october 2000 a tut ils vischins per lung da las lingias da viafier da las VFF, vegni cumenzà cun quellas lavurs da projectaziun per la part da las VFF en la Val dal Rain grischuna l'onn 2005. Sch'ins sto prender mesiras a Landquart e tge mesiras che quai sto esser (p.ex. sanar u remplazzar la punt d'atschal, installar fanestras che protegian cunter la canera), na po perquai per il mument anc betg vegnir ditg.
La regenza vegn a sa stentar che las mesiras menziunadas en il sectur da la via e dals binaris vegnan promovidas en moda speditiva resp. vegnan svelt prendidas per mauns, per che la populaziun pertutgada possia vegnir protegida cunter la canera sproporziunada. Cun las restricziuns correspundentas è la regenza perquai pronta d'acceptar l'incumbensa.


Datum: 2 d'october 2003