Navigation

Inhaltsbereich

Dumonda Zanolari concernent in center da cumpetenzas en connex cun l'aua en il Grischun

Sessiun: 26.08.2003
La Pro Raetia vul - durant l'onn da l'aua proclamà da la ONU - instradar cun ina nova iniziativa in'ulteriura valur agiuntada da l'aua en las valladas grischunas. Ella ha proponì da fundar in center da cumpetenzas en connex cun l'aua, sche pussaivel en collavuraziun cun la scol'auta da tecnica ed economia (HTW) da Cuira.
In tal center duai vegnir furmà sa basond sin las experientschas da las vischnancas, dals interprendiders e d'autras scolas autas e centers da cumpetenzas.
Uschia duai s'augmentar la valur economica, ecologica e sociala en las valladas a moda effizienta en il sectur dal turissem da cura, da far bogn sco er da wellness e da bogns da divertiment, en il sectur da la sanadad, en il sectur da l'aua minerala, en manaschis da commerzi, mastergn ed industria, en manaschis da servetsch e cussegliaziun en connex cun l'aua, en il sectur da furmaziun e da furmaziun supplementara, per chasadas privatas e per il maun public.

Dumondas a la regenza:

- Tge posiziun ha la regenza areguard la proposta d'in center da cumpetenzas en connex cun l'aua?
- Parta la regenza l'opiniun d'autras regiuns turisticas en il territori da las Alps, che l'aua saja il factur decisiv per il temp liber e la sanadad e ch'ella stoppia cuntribuir relevantamain per segirar noss avegnir turistic ed economic?
- È la regenza pronta da surpigliar ina rolla decisiva en la planisaziun e la coordinaziun dal project cun ils partenaris potenzials?

Cuira, ils 26 d'avust 2003

Name: Zanolari, Schmid, Arquint, Baselgia-Brunner, Bucher-Brini, Casanova (Vignogn), Casty, Cathomas, Caviezel (Pitasch), Cavigelli, Crapp, Demarmels, Farrér, Fasani, Frigg-Walt, Giacometti, Hess, Jäger, Jenny, Joos-Buchli, Keller, Koch, Loepfe, Maissen, Meyer-Grass (Claustra), Meyer Persili (Cuira), Noi-Togni, Peyer, Pfenninger, Pfister, Plozza, Portner, Righetti, Robustelli, Sax, Schütz, Tomaschett, Tramèr, Tremp, Trepp, Tuor, Zanetti, Zarn, Toschini

Session: 26.08.2003
Vorstoss: rg Anfrage



Resposta da la regenza

L'idea da crear in center da cumpetenzas en connex cun l'aua n'è betg mo vegnida lantschada da la Pro Rätia durant l'onn da l'aua proclamà da l'ONU, mabain er da la conferenza da las regenzas dals chantuns alpins (CRCA). La CRCA, a la quala il chantun Grischun è participà, ha organisà ils 27 da settember 2003 in simposi ad Altdorf, al qual han fatg part represchentants da tut ils chantuns commembers da la CRCA, da las vischnancas, da l'economia, da la scienza e da la confederaziun. Ils 3 da november 2003 ha la CRCA concludì da persequitar il project sut il titel “rait da cumpetenzas per l'aua en regiuns da muntogna” e d'inoltrar al seco ina dumonda da sustegn respectiva en furma d'in project da pilot en il rom da la nova politica regiunala (NPR).

La Pro Rätia da sia vart sviluppescha vinavant sias ideas per realisar in center da cumpetenzas en connex cun l'aua en il Grischun, en collavuraziun cun la scol'auta da tecnica ed economia a Cuira. Il chantun è er cumpiglià en quest project.

Las dumondas:

1. La regenza beneventa la creaziun d'in center da cumpetenzas en connex cun l'aua en il Grischun. En quest senn sustegna ella las stentas da la Pro Rätia e da la CRCA per crear in center da cumpetenzas resp. ina rait da cumpetenzas per l'aua.

2. La regenza è er da l'avis che l'aua, sco resursa regenerabla, saja fitg impurtanta per l'avegnir dal chantun Grischun.

3. Il project da la CRCA vegn manà da la CRCA sezza resp. dal respectiv secretariat da project “onn da l'aua proclamà da la ONU 2003”. Ina direcziun da la regenza n'è actualmain ni inditgada ni pussaivla.

Il project inizià da la Pro Rätia vegn elavurà actualmain a la scol'auta da tecnica ed economia a Cuira. Il mument na sa tschenta betg la dumonda, sche la regenza duai surpigliar ina rolla decisiva en quest project. Tut tenor l'andament dals dus projects è la regenza dentant pronta d'examinar da surpigliar eventualmain pli tard lur direcziun, sche quai vegn giavischà e para necessari.


Datum: 12 da november 2003