Navigaziun principala

Cuntegn da la pagina

Dumonda Berther concernent las mesiras per meglierar la situaziun tar ils fatgs d'emprendistas e d'emprendists

sessiun: 21.10.2003
Enconuschentamain è la situaziun en il sectur da las plazzas d'emprendissadi fitg difficila e quai en l'entira Svizra, ma er en il chantun Grischun. Prognosas fundadas na laschan betg spetgar in midament spert. Quai maina al fatg ch'adina dapli giuvenils che vegnan ord scola na chattan nagina plazza d'emprendissadi adequata. Las consequenzas gravantas da questas circumstanzas na ston betg vegnir explitgadas qua pli detagliadamain. Bain han manaschis che furman emprendistas u emprendists avantatgs directs, ma tuttina vegn lur engaschament per l'economia publica betg onurà u onurà memia pauc.
La confederaziun ha per fortuna prendì mesiras per augmentar il dumber da plazzas d'emprendissadi. Questa mesira da princip allegraivla na porta però betg ina detensiun suffizienta sin il martgà da lavur.

En vista a quests fatgs supplitgesch jau la regenza da respunder las suandantas dumondas:
a) Tge mesiras ha la regenza l'intenziun da prender per promover il martgà da plazzas d'emprendissadi?
b) Èn previsas er tar il chantun sez mesiras concretas en il senn d'ina funcziun d'exempel?
c) Tge pussaivladads vesa il chantun per promover manaschis d'emprendissadi che porschan plazzas d'emprendissadi?
d) Prevesa er la regenza sco contribuziun per schliar il problem ina distgargia finanziala da manaschis che furman emprendist(a)s?

Cuira, ils 21 d'october 2003

Name: Berther (Mustér), Hanimann, Augustin, Baselgia-Brunner, Berther (Sedrun), Biancotti, Bundi, Casanova (Vignogn), Demarmels, Dermont, Fallet, Fasani, Federspiel, Jenny, Keller, Kessler, Kleis-Kümin, Loepfe, Maissen, Marti, Portner, Righetti, Sax, Schmid, Wettstein, Zanetti, Zanolari, Nay, Gubelmann, Candinas, Monigatti, Toschini

Session: 21.10.2003
Vorstoss: rg Anfrage


Resposta da la regenza

Pervi da la situaziun economica critica, las annadas cun in dumber da naschientschas relativamain grond che vegnan uss ord scola e pervi da diversas malsegirezzas en il svilup da la furmaziun professiunala è la situaziun sin il martgà da plazzas d'emprendissadi en Svizra propi stada pli critica questa stad che auters onns. Fin ussa han ins però pudì constatar en il Grischun, ch'ils manaschis mussan anc adina ina gronda prontezza da scolar lur generaziun professiunala giuvna e ch'els mettan a disposiziun avunda plazzas da scolaziun. Per il cumenzament da l'emprendissadi 2003/2004 ha chattà cun paucas excepziuns la gronda part dals giuvenils en il Grischun ina plazza da scolaziun.

Davart las dumondas concretas prenda la regenza posiziun sco suonda:

a) A partir da la stad 2004 vegn offrida en il Grischun da nov la scolaziun sco emploiada/emploià spezialisà per il sectur da sanadad. I vegn quintà cun var 65 plazzas d'emprendissadi supplementaras en questa nova professiun. L'uffizi per la furmaziun professiunala vegn er a contactar vinavant sistematicamain manaschis che adempleschan las premissas per la scolaziun da giuvenils per als motivar da mantegnair las plazzas d'emprendissadi existentas u per stgaffir plazzas d'emprendissadi supplementaras. L'onn passà han uschia pudì vegnir concedidas 111 novas permissiuns da scolaziun.

b) Grazia a la rolla centrala da l'uffizi da persunal e d'organisaziun ha pudì vegnir augmentà il dumber da plazzas d'emprendissadi en l'administraziun chantunala ils ultims tschintg onns per bundant 30 % da 62 a 83, e quai tranter auter cun introducir il princip da rotaziun. Ultra da quai èn vegnidas purschidas plazzas da praticum supplementaras che servan er a la scolaziun. Malgrà las stentas da spargnar er en il sectur dal persunal vul la regenza extender vinavant la purschida da plazzas d'emprendissadi.

c) En il rom da las resursas persunalas dals uffizis chantunals ch'èn avant maun vegnan sustegnids manaschis che vulan furmar emprendistas u emprendists sche pussaivel cun infurmaziun, documentaziun e cussegliaziun.

d) Il sistem dual da la furmaziun professiunala sa basa sin la participaziun da l'economia e dal maun public. Quest princip è vegnì confermà il matg da quest onn dal pievel svizzer cun refusar l'iniziativa federala da plazzas d'emprendissadi.Ina distgargia finanziala dals manaschis per la scolaziun d'emprendistas e d'emprendists na po perquai betg vegnir dada sin fundament da la basa legala existenta.

Datum: 16 da december 2003