Navigaziun principala

Cuntegn da la pagina

Dumonda Claus concernent l'utilisaziun da l'entir areal da la scola chantunala a Cuira

sessiun: 21.10.2003
Cun la nova concepziun e la construcziun nova da la scola chantunala a Cuira (tenor la missiva preschenta), sa tschentan areguard l'utilisaziun futura da l'entir areal las suandantas dumondas:

    1. È in cundiever dal bogn cuvert dal Sand realisabel per la gronda publicitad?

    2. È il chantun er pront da gidar en cas d'in engrondiment futur dal bogn avert dal Sand (en il rom d'ina dischlocaziun da la via)?
Nus supplitgain la regenza da respunder questas dumondas.

Cuira, ils 21 d'october 2003

Name: Claus, Augustin, Brüesch, Brunold, Casanova (Cuira), Jäger, Janom Steiner, Marti, Tremp, Trepp, Tscholl

Session: 21.10.2003
Vorstoss: rg Anfrage


Resposta da la regenza

L'areal definì en la missiva "construcziun nova e sanaziun da la scola chantunala" (carnet nr. 7/2003-2004) sco "campus" cumpiglia il bogn cuvert dal Sand (sco part integrala dals stabiliments chantunals da sport dal Sand) ed il "bogn avert dal Sand" da la citad da Cuira. Il bogn cuvert chantunal dals stabiliments da sport dal Sand è vegnì construì per l'instrucziun da nudar da las partiziuns da scola media en spezial per la scolaziun da futuras persunas d'instrucziun primaras e po vegnir utilisà durant l'entir onn. Il bogn avert dal Sand da la citad da Cuira è public è po vegnir utilisà mo durant ils mais da stad.

Tar la dumonda 1:
L'emprima prioritad tar l'utilisaziun dal bogn cuvert dals stabiliments da sport dal Sand ha l'instrucziun da nudar che sto vegnir instruida en il rom da l'instrucziun obligatoria da gimnastica per las scolaras ed ils scolars da la scola chantunala grischuna. Tras il manaschi d'instrucziun da la scola chantunala è il bogn cuvert perquai occupà durant l'onn da scola da las 08.00 fin ca. las 18.00. En segunda prioritad pon autras scolas chantunalas far cundiever dal bogn cuvert per l'instrucziun. Durant l'ulteriur temp stat il bogn cuvert a disposiziun ad uniuns ed instituziuns, uschenavant che las proceduras da manaschi permettan quai.

Il manaschi d'in bogn cuvert chaschuna gronds custs da persunal e dovra bler temp. I ston vegnir observadas prescripziuns davart la qualitad da l'aua, da l'igiena e da la segirezza da las persunas che fan bogn. I ston vegnir garantidas lavurs regularas da mantegniment e da nettegiament sco er l'engaschament da persunas da surveglianza qualifitgadas (guardiabogn u persunas d'instrucziun cun scolaziun correspundenta). Servetschs da pichet garanteschan en cas da pannas tecnicas che las mesiras necessarias per reparar resp. sminuir il donn pon vegnir introducidas immediatamain. Cunquai ch'i na po betg vegnir engaschà ulteriur persunal per il manaschi dals stabiliments da sport dal Sand, sto il manaschi durant l'onn esser organisà uschia, che las prescripziuns da l'ordinaziun dal persunal concernent il temp da lavur pon vegnir observadas. In'utilisaziun dal bogn cuvert dals stabiliments chantunals da sport dal Sand sur la dimensiun existenta or n'è er pervi da las resursas da persunal avant maun betg realisabla. In cundiever dal bogn cuvert tras in public pli vast n'è perquai betg pussaivel.

Tar la dumonda 2:
La missiva tracta en in agen chapitel (p. 242) pussaivladads per concepir il bogn avert dal Sand en il futur. La regenza respecta la posiziun dal cussegl da la citad da Cuira, tenor la quala il bogn avert dal Sand na dastga betg vegnir surbajegià e betg vegnir reducì en sia dimensiun totala.
En connex cun la dischlocaziun planisada da la via chantunala sa dat per la citad da Cuira dentant er la pussaivladad da reponderar la concepziun da las surfatschas verdas e da l'alimentaziun per il bogn avert dal Sand en il rom d'in project communabel. Cun in concept da schliaziun communabel fissi pussaivel che tant la citad sco er il chantun optimassan lur purschidas e domaduas varts profitassan. Il chantun è pront d'elavurar in concept da schliaziun correspundent ensemen cun la citad da Cuira.

Data: 16 da december 2003