Navigation

Inhaltsbereich

Dumonda Janom Steiner concernent l'augment da delicts da violenza

Sessiun: 08.12.2003
Tenor rapports da las medias ils pli novs èn vegnids commess l'ultim temp en il chantun Grischun, cunzunt a Cuira, plirs delicts da violenza commovents e da natira extrem brutala. Ils delinquents vegnan adina pli impertinents e n'han gnanc ina giada retegnientschas da far diever da la forza encunter persunas attempadas che vivan sulettas u encunter persunas impedidas.

Perquai è la situaziun fitg inquietanta, uschia ch'i resultan las suandantas dumondas:

1. Co giuditgescha la regenza ils eveniments ils pli novs?

2. È s'acutisada dal puntg da vista da la regenza la situaziun areguard ils delicts da violenza?

3. Vesa la regenza in basegn d'agir, resp. tge mesiras considerescha la regenza sco urgentas per proteger la populaziun da tals acts da violenza? Vegnan en quest connex prendidas mesiras spezialas per Cuira?

Cuira, ils 8 da december 2003

Name: Janom Steiner, Dudli, Vetsch, Beck, Bleiker, Brüesch, Butzerin, Caviezel-Sutter (Tusaun), Christoffel, Fleischhauer, Giovannini, Göpfert, Gredig, Hardegger, Heinz, Hübscher, Jeker, Mani-Heldstab, Märchy-Michel, Nigg, Parolini, Pedrini, Ratti, Stiffler, Stoffel, Mainetti

Session: 8.12.2003
Vorstoss: rg Anfrage


Resposta da la regenza

Ils davos trais mais da l'onn 2003 èn vegnids commess trais acts da violenza en il chantun Grischun. En quels acts han ils auturs dal crim agì cun extrema brutalitad. In cas, en il qual la victima è vegnida chattada morta, è vegnì commess en il Partenz, ils dus auters a Cuira. Il malfatg cunter ina persuna impedida a Cuira ha pudì vegnir sclerì aifer quatter dis.

1. La regenza ha prendì enconuschientscha da quests eveniments cun quità. Però i na dat nagin connex local, temporal e d'autur dal delict tranter ils trais cas. Fin uss era il chantun Grischun pertutgà plitost punctualmain da tals eveniments. La statistica da plirs onns demussa in dumber da cas ch'è pli pitschen che la media svizra. Il dumber dals delicts cunter corp e vita è restà pli u main nunvarià ils davos tschintg onns. Il medem vala er per ils assagls da rapiment, tar ils quals ins ha dentant registrà in augment l'onn passà.
Ils davos tschintg onns ha la polizia chantunala stuì elavurar dudesch delicts da mazzament (inclusiv emprovas da tals). Ella ha pudì sclerir indesch da quels. Il svilup da la criminalitad ha mussà in augment l'onn 2002 er per il chantun Grischun. Ma quel ha pertutgà en emprima lingia delicts da facultad. En total n'è l'onn 2003 betg sa mussà in augment essenzial da la delinquenza violenta en cumparegliaziun cun pli baud.

2. Ils eveniments dal davos quartal da l'onn 2003 ston vegnir resguardads sco cas singuls. La polizia chantunala constatescha dentant che las retegnientschas da far diever da la violenza èn sa reducidas evidentamain er en il chantun Grischun ils ultims onns. Uschia daventa la differenza tranter il sentiment da segirezza da la populaziun ed il svilup effectiv da la criminalitad adina pli gronda.

3. I na vegn betg ad esser necessari da prender mesiras specificas per delicts singuls. La reorganisaziun da la polizia chantunala vegn a chaschunar dapli preschientscha e cun quai segirtad en l'entir chantun Grischun. L'onn 2004 duai a medem temp pussibilitar ina planisaziun da renunzia che resguarda l'effectiv reglamentar da la polizia chantunala da tschentar accents. Latiers tutga er la prevenziun.
I dat ina fitg stretga collavuraziun cun la polizia da la citad da Cuira che sustegna la polizia chantunala areguard la preschientscha e la prevenziun sin il territori da citad. La polizia da la citad da Cuira ha ina rolla impurtanta ed irrenunziabla en la regiun da Cuira. La regenza è persvadida ch'ins stoppia cumbatter en moda persistenta mintga furma da criminalitad. Mo uschia pon ins crear in clima segir che augmenta il sentiment da segirezza da la populaziun e ch'ha a medem temp ina funcziun preventiva.

Datum: 24 da favrer 2004