Navigaziun principala

Cuntegn da la pagina

Dumonda Meyer Persili concernent l'incassament da multas da la polizia chantunala en il traffic sin via

sessiun: 08.12.2003
Tenor in'enquista da l'uffizi federal da statistica (UST) na fan 56% da las automobilistas e dals automobilists betg quint da vegnir en ina controlla da sveltezza. E 64% n'èn anc mai vegnids controllads sapientivamain. Dacurt han ins pudì leger en in artitgel da las medias che la summa da las multas incassadas da la polizia chantunala en il chantun Grischun saja sa sminuida dals onns 1997 2002 per 18%. L'onn 1997 hai anc dà incassaments da multas da 2'044'000. francs, l'onn 2002 èn quels incassaments sa sbassads a 1'671'000. francs. En il chantun Basilea-Champagna perencunter èn quels incassaments s'augmentads per 677%; sco ch'i para grazia a diesch novs "polizists da tola". Ed ils accidents chaschunads da persunas che van cun l'auto sco la narradira èn sa reducids. Controllas regularas èn pia in med preventiv effectiv cunter delinquentas e delinquents da traffic.
Sin plaun federal ha il parlament revedì la lescha federala davart il traffic sin via (LTV) per meglierar la segirtad dal traffic sin via e decidì in entir fasch da mesiras, tranter auter duai vegnir sbassada la limita da l'alcohol en il sang da 0,8 a 0,5 promils. Ma er questas mesiras pon mo manar ad ina segirtad pli gronda en il traffic sin via sch'i vegnan fatgas dapli controllas.

Perquai dumandain nus la regenza il suandant:

1. Pertge èn las entradas menziunadas da las multas da la polizia chantunala sa sbassadas en moda uschè massiva?

2. N'è la regenza betg er da l'avis che cun dapli controllas preventivas pudessan vegnir reducids ils accidents pervia d'ir cun auto memia svelt u pervia d'ir cun auto cun alcohol ed uschia augmentada la segirtad?

3. Vegn la revisiun da la LTV ad avair consequenzas areguard il persunal?

4. Quant fitg ston las controllas menziunadas qua survart vegnir negligidas pervi dal WEF?

Cuira, ils 8 da december 2003

Name: Meyer Persili, Frigg-Walt, Peyer, Arquint, Baselgia-Brunner, Jaag, Jäger, Noi, Pfenninger, Schütz, Trepp, Zindel, Caviezel (Cuira), Gartmann

Session: 8.12.2003
Vorstoss: rg Anfrage


Resposta da la regenza

1. La sminuziun da las entradas da las multas disciplinaras stat en ina correlaziun directa cun l'effectiv real da la polizia ch'è sa reducì da 400 l'onn 1998 a 356 l'onn 2002. In ulteriur motiv è la serrada dal tunnel dal Gottard l'october 2001 e la cunvegna da prestaziun concernent l'intensivaziun da las controllas dal traffic pesant ch'è vegnida fatga cun la confederaziun suenter quel eveniment. Pervi da l'augment da traffic pesant sin la A 13 èn vegnids spustads ils accents da la lavur da la polizia da traffic sin quel sectur, quai ch'è sa mussà er en il dumber da rapports da denunzia en dumondas da chastis da traffic (senza accidents, inclus las denunzias concernent il traffic pesant). Quellas èn s'augmentadas da 4'531 l'onn 1997 sin 4'982 l'onn 2002.
Mesiraziuns automaticas da la spertadad ("polizists da tola") premettan per l'elavuraziun resursas supplementaras da persunal tar la polizia chantunala. Ord ponderaziuns finanzialas sa rendess l'utilisaziun da tals. Ils polizists da tola han perencunter il dischavantatg dal tractament giuridicamain inegual da persunas svizras e da l'exteriur, perquai che l'exteriur dat agid giuridic mo en moda restrictiva, quai che difficultescha u renda schizunt impussibla la persecuziun posteriura da delicts da traffic.

2. La regenza è er da l'avis che dapli controllas preventivas possian reducir ils accidents pervia d'ir cun auto memia svelt u pervia d'ir cun auto cun alcohol ed uschia augmentar la segirtad. Gist uschè impurtantas èn las controllas per eruir manischunz(a)s che stattan sut influenza da drogas sco er controllas per chastiar autras violaziuns grevas da las reglas da traffic (p.ex. surpassar tar traffic en direcziun cuntraria). Per las controllas menziunadas sco ultimas stattan a disposiziun a la polizia vehichels correspundents cun la pussaivladad da far registraziuns da video. Incumbensas preventivas pon vegnir ademplidas mo en moda subsidiara en il rom da las resursas persunalas che stattan a disposiziun.

3. La revisiun da la lescha federala davart il traffic sin via LTV ch'è previsa per il 1. da schaner 2005 cun la reducziun da la limita d'alcohol en il sang da 0,8 a 0,5 promils e dal chasti da l'ir cun auto sut influenza da drogas vegn a chaschunar dapli lavur e custs tar la realisaziun ed a liar ulteriuras resursas persunalas. Il project da reorganisaziun "P2003" cun la fusiun da la polizia unifurmada per il provediment polizial da basa ed ils elements d'acziun movibels meglierescha la preschientscha sin via. Parallelamain latiers duai vegnir realisada resguardond ils effectivs reals da la polizia ina planisaziun da renunzia che permetta da tschentar accents, nua ch'i sa tracta d'ademplir incumbensas polizialas centralas. Latiers tutga er la prevenziun da traffic. La fin finala duai er vegnir simplifitgada la rapportaziun en dumondas da chastis da traffic. L'effectiv da polizia che sa reducescha vinavant vegn ultra da quai distgargià a curt termin cun il cumenzament da la scola da polizia 2004. Ulteriuras mesiras areguard il persunal n'èn per il mument betg pussaivlas.

4. Betg mo il WEF, mabain er autras incumbensas da la polizia da segirezza tranter auter ils champiunadis mundials da skis alpins a San Murezzan ed acziuns interchantunalas (IKAPOL), p.ex. a favur da l'expo l'onn 2002 sco er da l'inscunter suprem G8 ad Evian e da l'inscunter suprem mundial d'informatica a Genevra sco er mintgamai duas ulteriuras acziuns da concordat a Frauenfeld ed a Vaduz l'onn 2003, engrevgeschan fitg ferm la polizia. Mo l'onn 2003 ha la polizia chantunala grischuna stuì prestar perquai dapli che diesch onns da lavur d'ina persuna. Questas acziuns genereschan ultra da quai sururas e dretgs da cumpensaziun considerabels che na pon betg vegnir cumpensads finanzialmain. Er da quai resultan largias en il sectur da la prevenziun en dumondas dal traffic e da la polizia criminala, quai che disturba supplementarmain il sentiment da segirezza da la populaziun.

Datum: 24 da favrer 2004