Navigation

Inhaltsbereich

Sessiun: 09.12.2003
Il tractament da la "construcziun nova e sanaziun da la scola chantunala da Cuira" (missiva da la regenza al cussegl grond, carnet nr. 7 / 2003 2004) è vegnì spustà da la sessiun dal cussegl grond dal december 2003 per differents motivs.

La scola chantunala a la Halde ha mancanzas da construcziun gravantas (missiva p. 231) che drovan urgentamain ina soluziun. Quest fatg è incontestà ed è vegnì calculà da la regenza gia en la missiva al cussegl grond dals 16 da december 1997 cun custs da 37 milliuns! Tant il cussegl grond sco er il pievel han approvà quai indirectamain.

Sin il stgalim da scola secundara 2 èn gia vegnidas fatgas (RRM), concludidas (consequenzas da las mesiras da spargn) u prendidas en mira midadas da structura cumplessivas (metter en vigur la lescha federala davart la furmaziun professiunala e l'ordinaziun correspundenta dal cussegl federal fin il 1. da schaner 2004).

La gronda regressiun da las naschientschas en il chantun Grischun pretenda ina planisaziu adattada.

Sco quai che gia deputà Martin Jäger (Cuira) constatescha en sia incumbensa a la regenza concernent la controlla dals purtaders da las scolas professiunalas en il chantun Grischun dals 27 d'avust 2003 è la "situaziun actuala en il chantun Grischun ... fitg nunsurvesaivla, en blers puncts er cleramain nuncuntentaivla".

Tenor la constituziun dal chantun Grischun art. 89 al. fa il chantun 3 "attenziun d'avair ina purschida decentrala da scolas medias e professiunalas...", custs d'investiziun a la scola chantunala che surpassan ils 37 milliuns dals custs da sanaziun (missiva da la regenza al cussegl grond dals 16 da december 1997) stattan directamain en connex cun quest'incumbensa da la constituziun.

Per garantir la planisaziun ch'è urgentamain necessaria en il sectur da la furmaziun pretendan ils suandants commembers dal cussegl grond da la regenza, ch'ella s'exprimia immediat en in concept cumplessiv chantunal co ch'ella quinta da realisar en l'avegnir l'incumbensa da la constituziun numnada. Da nov ston tut ils participads vegnir integrads en l'elavuraziun dal concept.

Cuira, ils 9 da december 2003

Name: Bundi, Claus, Berther (Mustér), Augustin, Bachmann, Berther (Sedrun), Biancotti, Bleiker, Bühler-Flury, Capaul, Casanova (Vignogn), Caviezel (Pitasch), Christoffel-Casty, Conrad, Dermont, Fallet, Farrér, Giacometti, Göpfert, Hanimann, Hardegger, Hartmann, Hess, Jenny, Joos-Buchli, Kessler, Kleis-Kümin, Krättli-Lori, Loepfe, Luzio, Maissen, Mani-Heldstab, Mengotti, Michel, Montalta, Noi, Parolini, Pedrini, Perl, Pfister, Portner, Quinter, Ratti, Righetti, Rizzi, Robustelli, Sax, Stiffler, Thomann, Tomaschett, Trachsel, Tramèr, Tscholl, Tuor, Wettstein, Zanetti, Zegg, Zindel, Blumenthal Gartmann, Gunzinger, Hartmann (Cuira), Hauser, Mainetti

Session: 9.12.2003
Vorstoss: rg Auftrag


Resposta da la regenza


L'intervenziun dumonda la regenza da s'exprimer immediat en in concept cumplessiv chantunal co che l'art. 89 al. 3 da la constituziun chantunala, tenor il qual il chantun resguarda ina purschida decentrala da las scolas medias e las scolas professiunalas, possia vegnir realisà. Uschia duai vegnir garantida la planisaziun en ils secturs da la furmaziun. L'intervenziun pretenda ultra da quai che tut ils participads stoppian vegnir integrads en l'elavuraziun dal concept.

La regenza ha declerà gia a chaschun da la resposta a la dumonda inoltrada dal deputà Bundi ed dals sutsegnads durant la sessiun d'october 2003 ch'ella veglia s'orientar en il sectur da la scola media al concept vertent, elavurà en collavuraziun intensiva cun la conferenza grischuna dals recturs gimnasials l'onn 1996. Ultra da quai ha ella fatg attent ch'i saja per il mument memia baud d'elavurar in concept per il sectur da la scola professiunala, perquai ch'ins na possia strusch giuditgar las consequenzas da las grondas midadas actualas en il sectur da la furmaziun professiunala (CR prot. nr. 1808 dals 16 da december 2003)

En la sessiun da favrer 2004 ha la regenza confermà a chaschun da las tractativas parlamentaras davart la missiva concernent la construcziun nova e sanaziun da la scola chantunala da Cuira da vulair s'orientar tar la decisiun concernent il sectur da la scola media vinavant al concept vertent da las scolas medias che prevesa ina purschida decentrala ed ina rolla impurtanta irrenunziabla da las scolas medias privatas. Svilups socials e demografics ston dentant vegnir resguardads per optimar la purschida da la scolaziun. Segund questa tenuta serva il concept vertent da las scolas medias vinavant sco basa da planisaziun solida ed accordada a l'art. 89 al. 3 da la constituziun chantunala.

Areguard la purschida da las scolas professiunalas ha la regenza persistì ch'ella veglia s'engaschar per mantegnair e sustegnair las purschidas decentralas. En vista a las proximas revisiuns da la lescha federala davart la furmaziun professiunala vegnan ins a stuair far lavurs da basa concepziunalas. Ils circuls pertutgads, spezialmain las scolas professiunalas, duain vegnir integradas ad ura en questas lavurs. En questa moda pon ils responsabels da las scolas cooperar ad elavurar soluziuns per ina planisaziun optimada da la purschida en il chantun ed als singuls lieus da scola. Quellas ston vegnir accordadas a las cundiziuns da basa decisivas socialas, demograficas ed economicas.

Tant per il sectur da las scolas medias sco er per la furmaziun professiunala vala che nagin na po dar ina garanzia per in dumber suffizient da scolaras e scolars.
La regenza è pronta d'acceptar l'incumbensa en quel senn, che tar las proximas lavurs concepziunalas vegnian integrads ils circuls pertutgads, spezialmain las scolas medias u las scolas professiunalas pertutgadas en il cas concret. Questa integraziun serva a las instanzas cumpetentas d'elavurar la basa da decisiun che pussibilitescha ina planisaziun optimada da la purschida en il chantun ed en ils lieus da scola, resguardond las cundiziuns da basa decisivas.

Datum: 16 da mars 2004