Navigaziun principala

Cuntegn da la pagina

Dumonda Noi concernent ils privels actuals en il tunnel dal San Bernardin

sessiun: 09.12.2003
Avant bundant in mais han ins percurschì ch'il vial en il tunnel dal San Bernardin è sa sbassà considerablamain en divers lieus. Quests sbassaments èn stads uschè gronds ch'il tunnel ha stuì vegnir serrà per il traffic pesant per almain tschintg dis. La cuvrida da la via examinada ha mussà gronds sbagls, isada dal material, sfessas ed entradas d'aua. Tenor las explicaziuns d'in funcziunari statal fatgas en la Televisione Svizzera di lingua italiana (TSI) èn ins malapaina mitschà ad ina catastrofa. La tragedia dal Gottard avess er pudì sa repeter facilmain en il tunnel dal San Bernardin. Il medem funcziunari statal ha dà d'encleger durant l'emissiun televisiva ch'i na saja betg vegnì duvrà material irreproschabel il mument da la construcziun. En il tunnel dal San Bernardin èn anc adina en gir lavurs da renovaziun che han per consequenza il diever da maschinas grevas cun vibraziuns dal terren correspundentas; questas lavurs vegnan a durar anc in pèr onns.

Perquai dumandain nus la regenza il suandant:

1. Tge examinaziun dal stadi da la cuvrida en il tunnel dal San Bernardin è vegnida fatga? Sch'ina tala è vegnida fatga, è ella succedida tras experts?

2. Co è vegnì giuditgà il ristg d'in eventual sbassament?

3. Datti gia, tenor la regenza, responsabladads existentas (qualitad dal material duvrà il mument da la construcziun)?

4. È il stadi momentan dal vial cumpatibel cun il transit dal traffic pesant?

5. Po l'intactadad da las persunas che traversan il tunnel vegnir garantida tar il stadi momentan da la via? E co vegn giuditgada l'intactadad da las persunas che lavuran en il tunnel?

6. N'avess l'utilisader en connex cun l'infurmaziun betg il dretg d'infurmaziuns pli precisas davart il stadi actual dal vial e davart eventuals privels?

7. Na fissi betg inditgà d'infurmar las persunas che traversan il tunnel cun tablas e cun scrittiras co ch'ellas avessan da sa cumportar en cas d'in accident?

Cuira, ils 9 da december 2003

Name: Noi

Session: 9.12.2003
Vorstoss: rg Anfrage


Resposta da la regenza


La renovaziun dal tunnel da via dal San Bernardin è mantegnend en circulaziun il traffic ina incumbensa fitg pretensiusa e difficila per ils inschigners responsabels e per las interpresas da construcziun. Ni per las lavurs da planisaziun ni per las lavurs da construcziun na pon ins sa basar sin experientschas correspundentas ed uschia sin soluziuns standardisadas. Ultra da quai è la substanza da construcziun sa pegiurada vinavant en il decurs dal temp, perquai ch'il cumenzament da la sanaziun è vegnì retardà pervi da las mesiras da spargn da la confederaziun. Malgrà scleriments ed examinaziuns conscienziusas ston ins adina puspè far quint cun surpraisas tar lavurs da sanaziun. Natiralmain vegn dentant fatg tut il pussaivel per minimar il ristg da schabetgs uschè bain sco pussaivel.

Qua sutvart vegnan respundidas las dumondas sco suonda:

1. En il rom da l'elavuraziun dal project da sanaziun è la platta da la via cun la cuvrida vegnida giuditgada e controllada permanentamain ils ultims onns cun vasts programs d'examinaziun da divers instituts e spezialists sco il EMPA ed inschigners da construcziun e da controlla.

2. Sin basa dals scleriments detagliads è il ristg che la platta da la via possia rumper e dar ensemen vegnì stimà sco improbabel.

3. L'examinaziun dal betun ch'è vegnì duvrà avant var 40 onns al lieu nua ch'igl ha dà in donn da la platta da la via l'october 2003 ha mussà ina qualitad localmain spezialmain nauscha. La sdrima d'ina ladezza da 2.5 m aveva ina consistenza da betun fitg pitschna, ina concentraziun da betun insuffizienta ed era vegnida elavurada en moda manglusa. Suenter in temp uschè lung na sa laschan eruir pli nagins responsabels per quai. Ultra da quai èn ils termins da garanzia scrudads gia daditg.

4. Entant è la platta da la via existenta vegnida examinada d'inschigners da construcziun anc ina giada areguard la statica. Latiers è vegnì constatà che la platta basta da princip per il pais dal traffic pesant. Questa constataziun vala però mo per il betun intact. Perquai èn vegnidas sustegnidas tut las parts q.v.d. cunzunt las chavas da la platta da la via ch'èn sur onns vegnidas donnegiadas da l'influenza dal sal e da las svapurs. Il sal vegn displaschaivlamain importà permanentamain dals vehichels en il tunnel pervi da la rumida da naiv a terrain sin la via averta.

5. I vegn fatg tut il pussaivel per garantir da tuttas uras la segirezza tant da las participantas e dals participants da traffic sco er dals lavurers da construcziun.

Uschia vegn controllà e giuditgà permanentamain il stadi da la platta da la via da persunal qualifitgà sco manaders da construcziun locals, inschigners da project e da controlla. Nua ch'igl è necessari vegnan ordinadas ulteriuras mesiras.

La segirezza dals lavurers da construcziun che lavuran en il tunnel vi da las lavurs da renovaziun vegn garantida en il sectur dal plazzal tranter auter d'ina saiv d'atschal massiva. Per l'entira lunghezza dal sectur dal plazzal dad 800 meters vala la sveltezza reducida da 50 km/h. Plinavant exista ina vasta organisaziun d'alarm per ils lavurers en cas da schabetgs.

6. Cunquai che las participantas ed ils participants dal traffic ston gia oz observar in grond dumber da signals vegnan tavlas d'infurmaziun supplementaras resguardadas sco betg cunvegnentas. Las participantas ed ils participants dal traffic èn uschiglio tenor experientscha surdumandads e na pertschaivan betg pli la massada da signals.

7. Per il cumportament da las participantas e dals participants dal traffic en il tunnel dal San Bernardin valan las medemas reglas ch'èn suenter ils gronds accidents en tunnels adina puspè vegnidas publitgadas en la pressa e cun broschuras d'infurmaziun. Concretamain vala tar ina stagnaziun dal traffic en il tunnel: fermar il vehichel a l'ur, stizzar il motor, betg bandunar il vehichel e metter en funcziun il radio. Tar in incendi en il tunnel duain ins: fermar il vehichel a l'ur, stizzar il motor, laschar fitgada la clav da contact, bandunar immediatamain il vehichel e s'allontanar svelt dal lieu dal schabetg.

Datum: 13 da schaner 2004