Dumonda Noi concernent l'introducziun d'ina basa legala per la surveglianza da las societads da finanzas cun domicil en il chantun Grischun
Sessiun: 09.12.2003
L'onn 1978 han las burgaisas ed ils burgais dal chantun Grischun acceptà en ina votaziun dal pievel ina lescha davart la controlla da las societads da finanzas en noss chantun. L'onn 1985, mo set onns suenter sia entrada en vigur, han la regenza ed il cussegl grond proponì a la populaziun d'abolir questa lescha. Il motiv principal per abolir questa lescha è stà sia uschenumnada "inapplitgabladad".
Suenter 17 onns stuain nus constatar e questa discussiun n'è betg nova che la mancanza d'ina regulaziun che sa fundescha sin la basa legala da noss chantun favurisescha ina derasaziun selvadia da societads nunseriusas per betg dir criminalas d'auters chantuns e stadis che prendan domicil en noss chantun profitond da la situaziun giuridica "favuraivla". Ina spezia da turissem che donnegescha la reputaziun da noss chantun e da las societads da finanzas seriusas e dals biros fiduziars serius.
En il Moesano datti per exempel tar ina populaziun totala da 7601 abitantas ed abitants bundant 1791 societads da finanzas (919 sulettamain a Roveredo). Tar duas societads da finanzas cun domicil en il Moesano ha gist ultimamain intervegnì la cumissiun federala da bancas ed en in cas er la procura publica federala pervi da suspect da la lavada da daners e da relaziuns tar la criminalitad internaziunala. Quests eveniments na fan betg bain a nossa regiun ch'è, pervi da sia vischinanza al Tessin, nua ch'i dat anc adina ina lescha che regulescha e surveglia la domiciliaziun da societads da finanzas e che vegn a vegnir rendida anc pli rigurusa, spezialmain exposta al ristg che firmas che "fugian" dal Tessin sa domicilieschan là.
Las firmas, cunter las qualas i vegn investigà, che fan concurs e serran, laschan alura enavos, sper in donn ch'ellas han fatg en tscherts cas a burgaisas e burgais senza presentiment ch'èn laschads "s'engianar" (10 milliuns ha ina societad da finanzas annullada a Roveredo retratg a sia clientella), er in mantun starmentus da daivets ch'il chantun sto alura extinguer. En in temp sco quel actual ch'è segnà da stentas dolurusas da spargn dal chantun n'è quai betg acceptabel.
Per quest motiv è urgentamain necessaria ina regulaziun dictada betg sco ultim da l'explosiun da la bursa la mesadad dals onns otganta ed er da la situaziun economica en noss pajais ch'è sa midada. (En tscherts chantuns è quella surveglianza chaussa da la giustia.) Enconuschentamain è la tendenza da far diever da meds illegals pli gronda en temps d'ina crisa economica.
Per proteger noss chantun sco plazza da finanzas, las societads da finanzas per gronda part seriusas en noss chantun e las burgaisas ed ils burgais (sco er ils daners da taglia) dumond jau, sche la regenza è pronta da stgaffir la basa legala che ha la finamira da registrar e controllar las societads da finanzas cun intents dubius ch'èn sa domiciliadas en noss chantun.
Cuira, ils 9 da december 2003
Name: Noi
Session: 9.12.2003
Vorstoss: rg Anfrage
Resposta da la regenza
Per il 1. da schaner 1979 è vegnida messa en vigur liquidond la moziun da Gian Mohr dals 28 da matg 1973 la lescha chantunala davart l'execuziun da la professiun da fiduziari. La lescha preveseva in examen obligatori per l'execuziun da l'activitad professiunala sco fiduziari, ina funcziun da surveglianza da la regenza sco er tschertas disposiziuns disciplinaras e penalas (M 1977/78, p. 84 ss. PCG 1977/78, p. 223 ss, 441 ss.). Mo il chantun Tessin ha er relaschà 1985 ina lescha sumeglianta. Paucs onns pli tard han la regenza, il parlament ed il pievel constatà che quest relasch era ì al vid en il chantun Grischun e la lescha da fiduziaris è vegnida abolida senza cumpensaziun. En la missiva davart l'aboliziun da quest relasch ha la regenza fixà ch'i possia vegnir prendida en il meglier cas pervi da las activitads fiduziarias interchantunalas ina soluziun sin plaun federal. Ultra da quai na saja la protecziun giavischada da la populaziun betg da realisar sin plaun chantunal senza lavurs administrativas sproporziunadas (M 1984/85, p. 626 ss., PCG 1984/85, p. 816 ss.).
Sin plaun federal è la politica sa fatschentada dapi alura gia diversas giadas cun ils problems menziunads. Causa il svilup svelt e la midada structurala en il sectur da finanzas è vegnida enconuschida er per il plaz economic Svizra l'impurtanza d'ina regulaziun efficazia sco er d'instruments da surveglianza correspundents per proteger la populaziun. Entant èn entradas en vigur la lescha federala davart la bursa ed il commerzi cun valurs (1. da favrer 1997) e la lescha federala davart la lavada da daners suspectus en il sectur da las finanzas (lescha davart la lavada da daners, 1. d'avrigl 1998). Ensemen cun las disposiziuns tar la lescha federala davart las bancas e cassas da spargn concernent la procedura da permissiun per novs instituts da finanzas sco er cun il project che sa chatta actualmain en consultaziun davart la surveglianza integrada dal martgà da finanzas e cun ils relaschs d'organisaziuns d'autoregulaziun (bursa svizra, associaziun svizra da bancas, swiss funds association, associaziun svizra d'assicuranzas) dattan quests relaschs la garanzia ch'interpresas nunseriusas da finanzas na vegnian gnanc fundadas u almain svelt scuvridas sco talas. Ils numerus projects da refurma che curran en quest sectur vegnan publitgads sin ina pagina d'internet infurmativa che vegn drizzada en ed actualisada mintga mez onn dal departament federal da finanzas (www.finweb.admin.ch).
Areguard las experientschas cun la legislaziun chantunala davart l'execuziun da la professiun da fiduziari e cun la legislaziun federala ch'è vegnida stgaffida en il fratemp u che sa chatta en planisaziun sco er pervi dal dumber pitschen da cas penalmain relevants e la gronda lavur administrativa ch'è colliada cun quai na vesa la regenza nagina necessitad per stgaffir ina regulaziun chantunala correspundenta.
Datum: 17 da favrer 2004