Navigation

Inhaltsbereich

Sessiun: 09.12.2003
La Tele Rätia SA è vegnida fundada l'onn 1980 sin basa d'in conclus dal cussegl grond sco societad anonima dal maun public cun l'intent da proveder il chantun Grischun cun programs da televisiun da l'exteriur e cun programs da radio locals.
Cun passa 18 staziuns d'emissiun resp. reemetturs da televisiun e 21 reemetturs da UUC proveda la Tele Rätia oz 115 da 209 vischnancas grischunas cun programs da televisiun da l'exteriur, cun la televisiun locala Tele-Südostschweiz sco er cun ils radios locals Grischa e Piz.
In'extensiun da la paletta da programs n'è betg pussaivla cun il provediment da televisiun analog actual pervi da motivs da frequenza. Perquai vul la Tele Rätia introducir la nova tecnologia da DVB-T (digital video broadcasting-terrestrial) che avra novas pussaivladads attractivas (qualitad excellenta da tun e maletg, gronda varietad da programs en tut las regiuns da noss chantun, chanals d'infurmaziun locals etc.).

Sco ch'ins auda planisescha la regenza da vender la Tele Rätia. En quest connex ston vegnir tschentadas las suandantas dumondas a la regenza:

1. Ha la regenza l'intenziun da vender la Tele Rätia, resp. èn ins londervi da far tractativas correspundentas? Sche gea, ston vegnir tschentadas las suandantas sutdumondas:
– Cun tge interessents?
– È la regenza da l'avis ch'ella saja suletta responsabla per in'eventuala vendita da las aczias da la Tele Rätia u basegni latiers il consentiment dal cussegl grond?
– Co vegn fixà il pretsch da vendita da la Tele Rätia e co vesan or las eventualas ulteriuras cundiziuns contractualas?
– Co vul la regenza en cas d'ina vendita da la Tele Rätia realisar cun success las finamiras, strategias e mesiras definidas en la dumonda 2?
– Co vul la regenza garantir il provediment actual da persunas privatas tenor ils contracts da provediment cun regiuns, circuls e vischnancas?
– Tge meds finanzials basegnan proprietaris privats per l'installaziun da DVB-T dal chantun e da la confederaziun? Co garanteschan proprietaris privats il rembursament da credits d'agid d'investiziun?
– Datti da vart d'interessents privats in concept d'amplificaziun da DVB-T e vegn garantì da vart privata in provediment da DVB-T per tut ils territoris?
– Co vegnan integradas las regiuns e las vischnancas en cas d'ina interpresa privata?
– Co valitescha la regenza las reacziuns da la SRG SSR idée suisse e da la RTR sin la stretga collavuraziun actuala (projectaziun, cumplettaziun communabla da SF1, SF2, TSI1, TSR1)?

2. Co valitescha la regenza il concept da DVB-T preschentà da la Tele Rätia per in provediment per tut ils territoris dal chantun Grischun, e quai d'ina vart dal puntg da vista da las directivas da la regenza en il program da la regenza 2001 fin 2004 (finamiras / strategias / realisaziun) e da l'autra vart en connex cun il svilup futur da la tecnologia d'infurmaziun e communicaziun (strategia generala da NTIC per il chantun Grischun) tenor incarica da la regenza en ils conclus da la regenza dals 5-3-2002 e dals 18-3-2003? Sut tge premissas è la regenza pronta da garantir la finanziaziun tenor la proposta da la Tele Rätia e da realisar en etappas in provediment da DVB-T per tut ils territoris?

Cuira, ils 9 da december 2003

Name: Quinter, Thomann, Parpan, Arquint, Bachmann, Bär, Beck, Bleiker, Brüesch, Bucher-Brini, Büsser, Caviezel-Sutter (Tusaun), Cavigelli, Crapp, Dudli, Fallet, Farrér, Feltscher, Frigg-Walt, Gredig-Hug, Hardegger, Hess, Jaag, Jäger, Jeker, Joos-Buchli, Kleis-Kümin, Loepfe, Luzio, Maissen, Marti, Meyer-Grass (Claustra), Peyer, Portner, Rizzi, Schütz, Stiffler, Stoffel, Tremp, Tuor, Zanetti, Gartmann, Gunzinger, Nay

Session: 9.12.2003
Vorstoss: rg Anfrage


Resposta da la regenza

La Tele Rätia SA è vegnida fundada l'onn 1980 cun l'intent da proveder il chantun Grischun cun programs da televisiun da l'exteriur. La purschida actuala da la Tele Rätia (4 programs da l'exteriur, q.v.d. ARD, ZDF, ORF1 ed ORF2, sco er TSO ed ils radios locals) n'è betg pli confurma al temp e na po lunschor betg pli cuvrir ils basegns da la populaziun. La tecnologia analoga vegn a pudair esser en funcziun mo pli paucs onns. La SSR vegn a midar fin l'onn 2008 sin la nova tecnologia da DVB-T (digital video broadcasting-terrestrial). La Tele Rätia stat uschia davant la sfida ubain da sviluppar ina nova purschida sin basa da DVB-T che po resister a la concurrenza ubain da liquidar l'interpresa ils proxims onns.

La regenza è sa fatschentada intensivamain cun las differentas variantas per l'avegnir da la Tele Rätia. La regenza metta la prioritad sin la realisaziun d'ina avertura dal chantun cun DVB-T tras investurs privats. Il chantun ha gia menziunà differentas giadas ch'el saja en contact cun investurs privats. En quest connex è la regenza er pronta da vender la part d'aczias dal chantun vi da la Telerätia, che importa 84.4 %, a persunas privatas. Pervi dal caracter confidenzial ch'è vegnì concludi n'èn indicaziuns pli detagliadas davart las tractativas currentas betg pussaivlas.

La participaziun vi da la Tele Rätia ha appartegnì dapi il cumenzament a la facultad administrativa dal chantun. En il fratemp è la tecnologia sa sviluppada en moda rasanta. La transmissiun da programs da televisiun da l'exteriur en la furma sco che la Tele Rätia fa oz quai na correspunda betg pli ad ina incarica publica. Sche valurs da facultad da la facultad administrativa na vegnan permanentamain betg pli duvradas per accumplir ina incarica publica, transporta la regenza quellas per la valur commerziala en la facultad finanziala (art. 9 al. 5 da la lescha davart las finanzas dal chantun Grischun). Tras quai è la regenza definitivamain cumpetenta per il transport da valurs da facultad administrativa en la facultad finanziala e per eventualmain vender pli tard la participaziun.
Ils interessents privats han l'intenziun d'avrir il chantun cun DVB-T. La moda e maniera duain ils investurs pudair fixar tenor lur atgnas ideas. Ina midada en l'acziunariat n'ha nagina influenza directa sin las relaziuns contractualas da las regiuns, dals circuls e da las vischnancas cun la Tele Rätia resp. sin l'incarica actuala da la Tele Rätia. En il rom d'ina vendita d'aczias na vul la regenza betg dar ina incarica da prestaziun a la Tele Rätia resp. ad investurs privats per uschia betg esser liada vinavant tras quai. La regenza è dentant pronta da sustegnair en moda liada a l'intent las investiziuns futuras da la Tele Rätia per l'avertura cun DVB-T cun emprests da daners da l'agid d'investiziun e cun la prestaziun equivalenta dal chantun. Sch'i na pudessan vegnir chattads nagins finanziaders privats, examinescha la regenza la participaziun chantunala vi da l'emprima etappa da realisaziun e fa sche necessari la dumonda da credit correspundenta al cussegl grond. Davart las ulteriuras etappas vegniss alura decidì pir suenter che questa emprima regiun da pilot fiss vegnida averta cun success. Sch'ina finanziaziun adequata dal project da DVB-T na po betg vegnir chattada ils proxims mais, sto vegnir prendida per mauns la liquidaziun da la Tele Rätia.

La strategia da la regenza cuntegna la promoziun da projects da cabel en singulas vischnancas fitg populadas e l'avertura cun DVB-T en ils territoris senza cabel. En la tecnologia da DVB-T vesa la regenza pussaivladads interessantas en il sectur dals servetschs purtabels e mobils sco er la basa per transmetter cuntegns locals e regiunals en ils territoris senza cabel. L'avertura sto succeder spert, uschè ditg che bleras chasadas han anc en funcziun las installaziuns da recepziun terrestras. Per ils singuls projects duain ils investurs respectivs esser cumpetents e responsabels. Tenor pussaivladad duai il chantun sa restrenscher al sustegn dals projects cun ils instruments da la promoziun da l'economia. Questa strategia da promoziun sa cuvra cun il program da la regenza 2001 2004 e cun la missiva da la regenza davart la revisiun da la lescha per promover l'economia publica. Perquai n'è ina participaziun directa dal chantun betg stringentamain necessaria.

Datum: 9 da favrer 2004