Navigaziun principala

Cuntegn da la pagina

Dumonda Arquint concernent abitaziuns secundaras

sessiun: 09.02.2004
Il boom da construir en l’Engiadin’ota cuntinuescha. Da vart da la populaziun da l’Engiadin’ota sco er sin plaun naziunal èn sa fatgas udir pli e pli vuschs criticas ch’han pretendì in svilup da construcziun moderà en l’interess da la cuntrada, dal turissem sco er da la populaziun indigena. Ultra da quai è il boom da construir vegnì incità da la nova reglamentaziun, tenor la quala persunas da la UE/AECL cun domicil en Svizra pon medemamain s’acquistar abitaziuns secundaras.
En quest connex obtegna er il chantun ina responsabladad entaifer ses champ da cumpetenza. Actualmain è la repartiziun dal contingent per l’acquist da bains immobigliars tras persunas da l’exteriur a las singulas vischnancas ina da las pussaivladads – schebain betg cuntentaivla – per diriger tant enavant il svilup da construcziun. La repartiziun a las vischnancas succeda correspundentamain a l’intent da l’art. 9 al. 2 e 3 LAFE per promover il turissem ed il svilup local. Cun in’explotaziun betg cumplaina resp. ina repartiziun restrictiva dals contingents a las vischnancas cun ina memia gronda voluntad da construir, p.ex. da l’Engiadin’ota, pudess il chantun sche betg franar, almain limitar ina tendenza problematica per l’economia publica.
Igl è sa mussà che quests contingents èn vegnids repartids ils ultims tschintg onns en media per passa in terz a las vischnancas da l’Engiadin’ota. Cun ina repartiziun mesauna d’annualmain 290 contingents ha quai impurtà 105 contingents per las vischnancas da l’Engiadin’ota. La repartiziun dals contingents da quest onn ha la regenza fatg en il rom dals ultims onns, senza tegnair quint da la memia gronda activitad da construcziun.
Nus dumandain la regenza:
1. Co giuditgescha ella il boom actual d’abitaziuns secundaras en Engiadin’ota?
2. Quals èn ils motivs per betg duvrar la repartiziun – anc valaivla – dals contingents per l’acquist da bains immobigliars tras persunas da l’exteriur en il senn d’in svilup en favur da las abitantas e dals abitants sco er raschunaivel dal puntg da vista dal turissem e da la cuntrada, e per betg prescriver a las vischnancas ina tenuta pli reservada cun las repartir damain contingents?
3. Tge mesiras, p.ex. en la nova lescha davart la planisaziun dal territori per il chantun Grischun, prevesa la regenza per restrenscher il boom d’abitaziuns secundaras sco ch’el sa mussa per l’onn 2004 ed eventualmain er per ils onns successivs?
4. L’instrument da la lex Friedrich ha fatg ses servetsch e vegn eventualmain abolì senza cumpensaziun. È la regenza da l’avis – en cas d’ina proxima aboliziun da la lex Friedrich – che la confederaziun stuess prevair mesiras per pudair impedir in svilup da construcziun illimità en ils centers da turissem pertutgads? Sche gea, ha ella manifestà sia opiniun davart questa fatschenta visavi la confederaziun u ha ella l’intenziun da far quai?

Cuira, ils 9 da favrer 2004

Name: Arquint

Session: 9.02.2004
Vorstoss: rg Anfrage


Resposta da la regenza

Dumonda 1:
En parts da l’Engiadin’ota sa lascha observar dapi in tschert temp in’activitad da construcziun extraordinariamain ferma, en emprima lingia en il sectur da las abitaziuns secundaras. Quest svilup sto, malgrà ils aspects positivs per l’economia regiunala, vegnir giuditgà criticamain dal puntg da vista da la planisaziun dal territori. Quitads fan d’ina vart las midadas d’utilisaziun d’hotels e da l’autra vart l’augment unilateral d’abitaziuns da vacanzas pauc frequentadas. En quest senn ston ins beneventar che las autoritads regiunalas e las vischnancas han gia fatg pass concrets per far frunt adequatamain a la memia gronda voluntad locala da construir. Menziunar ston ins qua las mesiras ch'èn vegnidas prendidas dacurt a San Murezzan ed a Schlarigna cunter las midadas d'utilisaziun d’hotels resp. cunter il boom da construir abitaziuns secundaras. Prender en consideraziun ston ins finalmain er las activitads regiunalas lantschadas en il rom da la realisaziun dal nov plan directiv chantunal sco er l'iniziativa dal circul davart la restricziun da construir abitaziuns secundaras inoltrada avant pauc temp.

Dumonda 2:
Tenor la concepziun da la lescha federala davart l'acquist da bains immobigliars tras persunas a l'exteriur (uschenumnada lex Koller) èsi da princip chaussa da las vischnancas da restrenscher l’aquist d'abitaziuns da vacanzas. Dentant fiss da princip er
il chantun autorisà da far quai. Resguardond l’autonomia communala ha il legislatur chantunal però destistì expressivamain da far restricziuns generalas u er mo regiunalas da l’acquist d’abitaziuns da vacanzas tras persunas a l’exteriur, e quai a chaschun d’ina revisiun succedida dacurt da la lescha introductiva chantunala tar la lex Koller (LItLAFE). Tuttina vulain nus agiuntar che tut las vischnancas da l'Engiadin'ota han restrenschì sezzas e per part considerablamain la vendita d'abitaziuns da vacanzas a persunas a l'exteriur (duas vischnancas schizunt a la quota nulla).

Dumonda 3:
En il rom da la revisiun currenta da la LPTGR, la quala vegn suttamessa proximamain al cussegl grond, prevesa la regenza da nov ina basa legala expressiva per sustegnair las vischnancas en lur stentas d’etablir ina proporziun equilibrada tranter abitaziuns principalas ed abitaziuns da vacanzas tras mesiras da la planisaziun dal territori. A l’avis da la regenza duai la concepziun concreta da talas mesiras dentant esser chaussa da las vischnancas, tant dapli che la realitad è localmain vaira differenta schizunt en Engiadin’ota. Las vischnancas pertutgadas il pli ferm dal boom actual da construir abitaziuns secundaras han er gia instradà emprimas acziuns. Tuttina è la regenza da l’avis ch’ina coordinaziun regiunala da las acziuns correspundentas saja indispensabla. Per quest intent prevesa il nov plan directiv chantunal d’elavurar concepts regiunals d’abitadi. La regiun da l’Engiadin’ota ha, sco menziunà, cumenzà cun las lavurs respectivas.

Dumonda 4:
En regiuns da turissem da grond prestige èsi da far quint cun in augment da la dumonda da segundas abitaziuns, sche la lex Koller vegniss abolida. Per diriger ina tala dumonda augmentada vegnan discutadas tant mesiras da la planisaziun dal territori sco er mesiras fiscalas. I po senz’auter esser raschunaivel che la confederaziun s’engascha en retschertgas e lavurs da basa correspundentas e ch’ella coordinescha las mesiras substitutivas tranter ils chantuns. La realisaziun concreta da la legislaziun duai dentant succeder sin plaun chantunal.

4 da matg 2004