Navigation

Inhaltsbereich

Dumonda Barandun concernent la muntada e las consequenzas dal collaps dal provediment d'electricitad dals 28 da settember 2003 per il Grischun

Sessiun: 10.02.2004
Durant las uras da la damaun dals 28 da settember 2003 ha il collaps dal provediment d'electricitad en l'Italia e – per ina curta durada – er en in pèr regiuns dal sid dal Grischun chaschunà ina interrupziun dal current electric.
Sco motiv è vegnì constatà silsuenter ina surchargia da la rait electrica che ha fatg che las lingias da transit dal nord al sid sur il Lucmagn ed il San Bernardin èn vegnidas interruttas.
Tge consequenzas ch'in collaps dal provediment d'electricitad po avair per la societad e sia economia publica han mussà divers eveniments en l'Europa ed en ils Stadis Unids da l'America. Ils sutsegnaders s'interessan per las consequenzas ch'èn vegnidas tratgas per il Grischun dal blackout da l'Italia e supplitgeschan la regenza da respunder las suandantas dumondas:
1. Tgenins en stads ils motivs che er parts dal Grischun èn vegnidas pertutgadas da l'interrupziun dal current electric en l'Italia?
2. Tgi è responsabel per il manaschi e per tegnair liber il trassé da las lingias d'auta tensiun al liber?
3. Sto vegnir fatg quint cun ina repetiziun u schizunt cun in augment d'eveniments che sumeglian il blackout da l'Italia sco consequenza dal creschament dal commerzi internaziunal d'electricitad e tgeninas èn las cuntramesiras?

Cuira, ils 10 da favrer 2004

Name: Barandun, Capaul, Arquint, Bachmann, Bleiker, Büsser, Casanova (Cuira), Caviezel-Sutter (Tusaun), Conrad, Crapp, Donatsch, Farrér, Fasani, Federspiel, Feltscher, Geisseler, Giovannini, Gredig, Hanimann, Hartmann (Champfèr), Hess, Jaag, Jäger, Jeker, Jenny, Joos-Buchli, Keller, Kessler, Kleis-Kümin, Koch, Krättli-Lori, Luzio, Märchy-Michel, Marti, Meyer-Grass (Claustra), Mengotti, Michel, Noi, Parolini, Parpan, Pedrini, Perl, Peyer, Plozza, Portner, Quinter, Righetti, Rizzi, Sax, Schütz, Stiffler, Stoffel, Thomann, Tremp, Vetsch Wettstein, Zanetti, Zanolari, Zindel, Caviezel (Cuira), Gartmann, Kunz, Mainetti

Session: 10.02.2004
Vorstoss: rg Anfrage


Resposta da la regenza

1. Las lingias da transit dal nord al sid tras la Svizra èn stadas inchargiadas fitg ferm durant las uras da la damaun marvegl dals 28 da settember 2003. Encunter las quantitads d'electricitad maximalas fixadas tenor la cunvegna tranter la Frantscha, la Svizra e l'Italia che prevesa per l'enviern 2003 in transport d'electricitad per ura da la Svizra a l'Italia da maximalmain 3'050 MW, èn vegnids exportads il termin pertutgà 3'610 MW. Quel mument ha quai chaschunà ina surchiargia da las lingias da transit Svizra – Italia.

La damaun menziunada è la lingia da 380 kV sur il Lucmagn vegnida interrutta suenter in uschenumnà artg electric tranter la suga da la lingia ed ina planta. Las relaziuns da la rait electrica probablamain instabilas en Italia n'han betg permess da puspè metter en funcziun ad uras la lingia dal Lucmagn. La flussiun cuntinuanta da transit en direcziun da l'Italia è alura sa repartida sin la segunda lingia da 380 kV da Seglias-Soazza e sin autras colliaziuns. Uschia è er vegnida surchargiada la lingia dal San Bernardin cun la consequenza che quella è s'interrutta automaticamain.

En las regiuns da l'Engiadin'auta, dal Puschlav e dal Mesauc haja dà – sco consequenza da la rait d'auta tensiun surchargiada – ina cascada d'interrupziuns da lingias da cunfin ed ina interrupziun temporara dal provediment regiunal d'electricitad. Per evitar il pli pussaivel donns da las lingias d'electricitad, dals indrizs e dals apparats han sistems da protecziun automatics en la rait da provediment la funcziun da registrar immediatamain tals incaps e d'interrumper il medem mument la tensiun nuschaivla. Andaments sumegliants datti er sch'in chametg tutga ina lingia d'electricitad.

2. Il possessur da l'implant electric è mintgamai responsabel per tegnair liber il trassé da las lingias d'auta tensiun al liber e per observar las prescripziuns da segirezza per exempel er areguard las distanzas verticalas tranter plantas e las sugas nunisoladas da las lingias d'auta tensiun al liber. En Svizra è quel quasi adina identic cun il proprietari da la lingia. La surveglianza da las controllas aifer il manaschi è chaussa da l'inspecturat federal d'installaziuns a current ferm.

3. La Svizra posseda en general ina rait da tensiun fitg auta moderna e mantegnida bain. Tuttina na po er en l'avegnir betg vegnir exclus dal tuttafatg in collaps pli grond da la rait. Interrupziuns curtas da la lingia pervi da cirquits curts n'èn betg chaussas extraordinarias. Per gronda part vegnan ellas eliminadas uschia, che las lingias vegnan puspè messas en funcziun automaticamain, q.v.d. directamain senza ch'ins percurschess insatge.

Cun in augment da tals incaps n'èsi betg da far quint. Per garantir a lunga vista il provediment d'electricitad vegni però ad esser decisiv ch'ils interess commerzials resguardian las pussaivladads tecnicas sco er che reglas e cumpetenzas vegnian definidas ed observadas en il martgà internaziunal d'electricitad.

9 da mars 2004