Navigation

Inhaltsbereich

Dumonda Jäger concernent la basa giuridica da l’obligaziun d’archivar sco er ils scumonds da publicaziun per ils archivs communals, cirquitals e districtuals

Sessiun: 10.02.2004
Las autoritads ed ils uffizis da las vischnancas, dals circuls e dals districts èn obligads da tegnair en salv las scrittiras che resultan da lur lavur. Per quest intent ston els manar archivs. Questa obligaziun d’archivar vegn reglada oz mo en in’ordinaziun da la regenza ch’è vegnida relaschada en la versiun vertenta ils 5 da settember 1988 (DG 490.150, ordinaziun davart ils archivs communals, cirquitals e districtuals).
En ils art. 20 ss. da questa ordinaziun vegnan fixads ils scumonds da publicaziun per il material da l’archiv. Da princip n’è quest material betg accessibel a la publicitad durant 35 onns dapi sia emissiun. Las actas dal persunal, da las dretgiras e da taglia sco er ils protocols da las suprastanzas communalas èn schizunt suttamess ad in scumond da publicaziun da 50 onns. Da las actas tutelaras dastgan ins prender invista il pli baud 50 onns suenter la mort da l’avugadà.
Sin il champ da las datas persunalas èn lungs scumonds da publicaziun segiramain giustifitgads. Per l’auter material d’archiv ch’è d’interess public paran ils scumonds da publicaziun che valan en il Grischun dentant fitg lungs.
Il terz chapitel da l’ordinaziun menziunada (art. 26 ss.) regla las inspecziuns. L’inspectura ed ils inspecturs d’archiv actuals han ina incumbensa fitg impurtanta per l’archivaziun segira e constanta da las communitads.
Nus supplitgain la regenza da respunder las sequentas dumondas:
1. È er la regenza da l’avis ch’il princip da l’obligaziun d’archivar da las vischnancas e d’autras corporaziuns publicas stuess vegnir fixà en ina lescha? Vegn quai a succeder per exempel a chaschun da la proxima revisiun da la lescha da vischnancas?
2. Po l’inspecziun periodica dals archivs cuntinuar en la furma da fin uss u datti difficultads che pudessan vegnir eliminadas d’ina autra organisaziun u surveglianza?
3. Co vegnan ins ad ademplir en il futur las incumbensas da la cumissiun chantunala d’archiv da fin uss che vegn schliada la fin da zercladur 2004?
4. En tge relaziun stattan ils scumonds da publicaziun che valan en il Grischun cun las disposiziuns d’auters chantuns u da la confederaziun?
5. È er la regenza da l’avis ch’ils scumonds da publicaziun che valan oz stuessan vegnir reducids almain parzialmain?
6. Sche gea, cura ed en tge furma è previsa ina revisiun da las disposiziuns menziunadas?

Cuira, ils 10 da favrer 2004

Name: Jäger, Portner, Butzerin, Arquint, Baselgia, Bucher-Brini, Büsser, Casanova (Vignogn), Casty, Dermont, Fasani, Federspiel, Feltscher, Frigg-Walt, Geisseler, Giovannini, Hanimann, Jaag, Jenny, Joos-Buchli, Keller, Koch, Krättli-Lori, Maissen, Mani-Heldstab, Marti, Meyer-Grass (Claustra), Meyer Persili (Cuira), Mengotti, Michel, Noi, Perl, Peyer, Pfenninger, Pfiffner, Pfister, Plozza, Quinter, Righetti, Robustelli, Schütz, Tremp, Zanolari, Zarn, Zindel, Nay, Caviezel (Cuira), Gartmann, Mainetti

Session: 10.02.2004
Vorstoss: rg Anfrage


Resposta da la regenza

1. La regenza beneventa la fixaziun da l’obligaziun d’archivar da las vischnancas e d’autras corporaziuns publicas en ina lescha. Questa fixaziun è gia vegnida proponida da l’archiv dal stadi a chaschun dal project “essenzialisaziun da l’administraziun”.
En connex cun la proxima revisiun totala da la lescha da vischnancas vegn examinada l’integraziun da l’obligaziun d’archivar tras il departament directiv da l’intern e da l’economia publica.
2. La surveglianza reglada en l’art. 6 da l’ordinaziun davart l’archiv dal stadi ed en ils art. 26-30 da l’ordinaziun davart ils archivs communals, cirquitals e districtuals dals archivs regiunals e locals tras l’archiv dal stadi cun agid d’inspecturs d’archivs regiunals è sa cumprovada. Grazia a quest sistem d’inspecziun sa chattan ils archivs grischuns pertutgant l’urden, l’archivaziun e l’assistenza sin in aut stadi en la cumparegliaziun naziunala. La regenza ha l’intenziun, da mantegnair per il mument il sistem existent, er sch’i daventa pli e pli difficil da chattar persunas adattadas per l’inspecziun dals archivs.
3. La cumissiun d’archiv è naschida en in temp, en il qual na stevan anc betg a disposiziun al departament sin tut ils champs d’incumbensa uffizis bain equipads cun enconuschientschas professiunalas respectivas. En il rom da la restructuraziun dal departament è l’archiv dal stadi vegnì suttamess a l’uffizi da cultura. Sin fundament da las cundiziuns generalas midadas crodan davent las incumbensas las pli impurtantas da la cumissiun ed il champ da lavur sa diminuescha. La cumissiun d’archiv perda particularmain sia funcziun sco gremi da surveglianza; er las cumpetenzas electoralas èn vegnidas regladas da nov.
En il futur vegnan las incumbensas da la cumissiun d’archiv da fin uss accumplidas da l’uffizi da cultura e dal departament. Ultra da quai ha l’archivari chantunal la pussaivladad da convocar in gremi ad hoc per dumondas specificas.
4. Las ordinaziuns davart l’archiv dal stadi e davart ils archivs communals, cirquitals e districtuals prevesan en ils art. 20ss. scumonds da publicaziun u termins da protecziun per l’invista en l’inventari da l’archiv.
Ils archivs dal Grischun enconuschan in scumond da publicaziun general da 35 onns per documents generals ed in scumond da publicaziun prolungà da 50 onns per actas persunalas, actas giudizialas e fiscalas sco er per protocols d’autoritads executivas. Quests termins da scumond correspundan circa a quels da l’archiv federal e dals archivs da la gronda part dals chantuns. Per las categorias d’actas specificas (actas d’avugadia, da stadi civil, actas da notariat e penalas) valan plinavant ils scumonds da publicaziun tenor il dretg surordinà. En plirs chantuns èn ils scumonds generals da publicaziun vegnids reducids sin 30 onns ils ultims onns.
5. Ina reducziun dal termin da protecziun sin 30 onns vali da cuntanscher ord vista da la regenza. Gist uschè impurtanta è er in’applicaziun liberala da las excepziuns, sco ch’ella vegn fixada en l’art. 21 da las ordinaziuns citadas.
6. L’adattaziun dals termins da protecziun chaschuna ina revisiun da las ordinaziuns davart l’archiv dal stadi e davart ils archivs communals, cirquitals e districtuals.

27 d’avrigl 2004