Navigaziun principala

Cuntegn da la pagina

Dumonda Stoffel concernent il traffic pesant sin la A13 suenter l'onn 2006

sessiun: 10.02.2004
Suenter che las votantas ed ils votants han mussà cleramain en la votaziun dals 8 da favrer 2004 davart il "cuntraproject a l'iniziativa avanti" da betg render pli flaivel l'artitgel per la protecziun da las Alps en la constituziun federala, duess quai er esser per noss chantun in motiv da far ponderaziuns davart il futur dal traffic pesant per il temp suenter che la sanaziun dal tunnel dal San Bernardin è terminada. En ils passa dus onns, durant ils quals il traffic pesant vegn uss dosà, è sa mussà cleramain che la segirezza per ils ulteriurs utilisaders da la via ha pudì vegnir meglierada fermamain. Quai che n'ha percunter betg pudì vegnir schlià en moda cuntentaivla, èn las plazzas da spetga gist avant ils portals dal tunnel; il mument n'è quai però betg pussaivel en autra moda pervi da las lavurs da construcziun. Questa procedura duess – sche pussaivel – vegnir remplazzada d'in sistem da reservaziun.
En quest connex vegn la regenza intimada da respunder las suandantas dumondas:
- Tge plans concrets existan per il temp suenter la terminaziun da las lavurs da construcziun?
- Vegn mantegnì in sistem da dosar er suenter la terminaziun da las lavurs da construcziun?
- Sche gea, co vegn quest sistem concepì?
- È la regenza pronta – sche pussaivel ensemen cun ils ulteriurs chantuns alpins – da s'engaschar tar la confederaziun per in sistem da dosar?
- Pudess eventualmain vegnir lantschà latiers in project da pilot?

Valragn, ils 10 da favrer 2004

Name: Stoffel, Righetti, Hess, Bachmann, Bär, Barandun, Baselgia, Biancotti, Brunold, Bucher-Brini, Bühler, Caviezel-Sutter (Tusaun), Christ, Conrad, Donatsch, Dudli, Fasani, Feltscher, Fleischhauer, Giovannini, Gredig-Hug, Hardegger, Jäger, Jeker, Joos-Buchli, Keller, Koch, Krättli-Lori, Lemm, Mani-Heldstab, Märchy-Michel, Marti, Meyer-Grass (Claustra), Mengotti, Michel, Montalta, Noi, Parolini, Pedrini, Perl, Peyer, Pfister, Plozza, Portner, Quinter, Ratti, Rizzi, Schütz, Stiffler, Trachsel, Kunz, Mainetti, Gartmann

Session: 10.02.2004
Vorstoss: rg Anfrage


Resposta da la regenza

Las lavurs da sanaziun vi dal tunnel dal San Bernardin vegnan ad esser terminadas l'onn 2007. Suenter vegn il tunnel ad avair in standard da segirezza cumparegliabel cun il tunnel da via dal Gottard, e la regulaziun da direcziun unica per il traffic pesant che vegn pratitgada oz na po betg pli vegnir argumentada cun la segirezza dal traffic. Areguard la segirezza dal traffic ed il moviment dal traffic para dad esser necessari da regular il traffic pesant er suenter che las lavurs da sanaziun vi dal tunnel dal San Bernardin èn terminadas.

Cun dosar il traffic pesant al San Bernardin èn ils viadis da camiuns sa sminuids considerablamain. I sto vegnir fatg tut il pussaivel per che quai restia uschia er suenter che las lavurs da sanaziun vi dal tunnel dal San Bernardin èn terminadas, e per ch'il traffic pesant na sa spostia betg sin la A13 u sin l'ulteriura rait da vias chantunalas. Per che questa finamira possia vegnir cuntanschida, ston vegnir prendids en mira per las duas transversalas da las Alps al Gottard ed al San Bernardin sistems operativs ch'èn almain equivalents.

Cun metter en funcziun il center per controllar il traffic pesant a Giuvaulta l'atun 2004 pon il medem mument vegnir intensivadas las controllas dal traffic pesant da transit sin la ruta dal San Bernardin. L'augment planisà da la taxa sin il traffic da camiuns pesants tenor prestaziun dad actualmain 1.6 raps sin 2.4 raps per tonna e kilometer, che vegn previsiblamain mess en vigur 2005, duess medemamain contribuir ad ina stagnaziun dal traffic da camiuns che traversa las Alps.

Las dumondas fatgas pon vegnir respundidas sco suonda:

1. Per regular il traffic pesant suenter che las lavurs da sanaziun èn terminadas na datti anc nagins plans concrets. Ils motivs fatgs valair fin uss per la regulaziun da direcziun unica en il tunnel dal San Bernardin vegnan a crudar. Il sistem da dosar che vegn pratitgà oz tras il traffic a direcziun unica na vegn alura betg pli a pudair vegnir mantegnì.
2. Tras la sanaziun pon vegnir eliminads mo ils deficits da segirezza en il tunnel dal San Bernardin, betg però sin las rampas d'access. Areguard la segirezza dal traffic ed il moviment dal traffic para dad esser necessari da regular il traffic pesant er suenter che las lavurs da sanaziun vi dal tunnel dal San Bernardin èn terminadas.

3. Tge sistem da regulaziun che duai vegnir applitgà sin la ruta dal San Bernardin è anc avert per il mument. Sin la ruta dal Gottard è da princip sa cumprovà il "sistem da dumbrar dagut a dagut". Perquai fiss ina tala regulaziun tuttavia imaginabla. Quest sistem na dastgass però betg sa restrenscher mo al tunnel, mabain stuess er cumpigliar las rampas d'access. En quest connex sto vegnir prendì en mira dad endrizzar eventualas zonas da spetga per il traffic pesant en distanza dals vials da la A13.

4. La regenza dal chantun Grischun vegn vinavant a s'engaschar ch'il traffic na sa spostia betg sin la A13 u sin l'ulteriura rait da vias chantunalas suenter la sanaziun dal tunnel. Per che quai possia vegnir evità, ston vegnir prendidas en mira soluziuns equivalentas – er areguard il temp – per il Gottard e per il San Bernardin. Sustegnidas vegnan er mesiras accumpagnantas che han lieu parallelamain, che pon gidar a limitar il traffic da camiuns che traversa las Alps.

5. Il sistem actual da dosar sto vegnir mantegnì fin che las lavurs da sanaziun dal tunnel èn terminadas l'onn 2007. In project da pilot na po betg vegnir realisà per motivs pratics e per motivs da temp. Cun il "sistem da dumbrar dagut a dagut" che vegn applitgà al Gottard stat a disposiziun in model pussaivel.

4 da matg 2004