Navigaziun principala

Cuntegn da la pagina

Incumbensa Arquint concernent la participaziun dal parlament a la collavuraziun interchantunala ed internaziunala

sessiun: 10.02.2004
La constituziun chantunala prevesa en l’artitgel 32 da laschar participar il cussegl grond en furma adattada, sch’i sa tracta da preparar contracts interchantunals ed internaziunals impurtants. En la missiva da la regenza al cussegl grond “rapport da las relaziuns externas dal chantun Grischun” sco er en la debatta dal cussegl grond èn vegnidas interpretadas las pussaivladads da prender influenza dal parlament, sco quai ch’ellas èn fin ussa, sco fitg malcuntentaivlas. Igl è incontestà ch’ils dretgs da condecisiun ston vegnir extendids tras infurmaziun, pussaivladads da prender posiziun e da cooperaziun. Igl è er incontestà ch’igl è necessari d’elavurar las disposiziuns legalas en quest connex.
La regenza vegn incumbensada, tenor ils art. 32 al. 3 ed art. 47 cifra 1 da la CC ed en il senn da la missiva menziunada e da la debatta dal cussegl grond dal december 2003, da crear la basa legala per rinforzar e concepir ils dretgs da condecisiun dal parlament en la cooperaziun interchantunala ed internaziunala e da preschentar quella al parlament per la deliberaziun.

Cuira, ils 10 da favrer 2004

Name: Arquint, Zanolari, Baselgia, Biancotti, Dermont, Fasani, Frigg-Walt, Jaag, Jäger, Kessler, Koch, Meyer Persili (Cuira), Mengotti, Noi, Peyer, Pfenninger, Pfiffner, Righetti, Schütz, Trachsel, Wettstein, Zindel, Caviezel (Cuira), Gartmann

Session: 10.02.2004
Vorstoss: rg Auftrag


Resposta da la regenza

En il rapport „relaziuns externas dal chantun Grischun/futura orientaziun strategica“ da la regenza cun data dals 2 da settember 2003 è la cooperaziun dal cussegl grond vegnida tractada vastamain sin basa da la nova constituziun chantunala (cf. carnet da missivas nr. 6/2003-2004, p. 211 ss.). Il cussegl grond ha discutà quest rapport en la sessiun da december 2003 ed è s’exprimì - pertutgant la dumonda da la cooperaziun tar tractativas contractualas interchantunalas ed internaziunalas sin il champ legislativ - en favur dal “model B” modifitgà: cooperaziun cun ina cussegliaziun accumpagnanta da la regenza durant las tractativas contractualas da la cumissiun permanenta (spezialisada) mintgamai responsabla (cf. protocol dal cussegl grond 4/2003-2004, p. 502 ss.). Gia en il rapport menziunà aveva la regenza empermess che las concretisaziuns ch’èn anc necessarias en la lescha ed en l’ordinaziun duajan succeder cun realisar la nova constituziun chantunala (cf. carnet da missivas nr. 6/2003-2004, p. 214). Uss èsi previs da crear la basa legala correspundenta cun adattar ils relaschs parlamentars a la nova constituziun chantunala. La tavla da termins per quest project prevesa d’elavurar fin la fin d’october 2004 in sboz che duai vegnir deliberà il december 2004 da la conferenza dals presidents per la consultaziun. La discussiun dal project en il cussegl grond è alura previsa per l’onn 2005 e l’entrada en vigur dals relaschs parlamentars revedids duai finalmain succeder ad uras avant il cumenzament da la nova perioda d’uffizi il 1. da fanadur 2006.


La regenza è pronta d’acceptar questa incumbensa en il senn da questas explicaziuns.

11 da matg 2004