Navigaziun principala

Cuntegn da la pagina

Incumbensa da fracziun da la PPS Vetsch Introducziun d'in scumond da sa mascrar

sessiun: 10.02.2004
Tar demonstraziuns cunter il WEF ed autras demonstraziuns ha stuì vegnir constatà che demonstrants èn stads mascrads. Quests demonstrants mascrads han confermà la tendenza che persunas mascradas entran en acziun sut lur mascrada en moda pli agressiva e violenta che participants betg mascrads. Demonstrants agressivs e tendenzialmain violents pericliteschan dentant la segirezza publica. Las mascradas mainan ultra da quai er al fatg che demonstrants paschaivels vegnan periclitads e restrenschids en lur libertad da demonstrar.
Pervi da la mascrada vegn rendida pli greva la surveglianza publica ed il chasti d'acts da violenza. Questa situaziun na po però betg vegnir acceptada en in stadi da dretg. Ils sutsegnaders pretendan perquai la creaziun d'ina basa legala per relaschar in scumond da sa mascrar tar demonstraziuns.
Perquai ch'ina lescha chantunala da polizia è en preparaziun, vegn la regenza envidada d'integrar en quella disposiziuns che permettan da pudair relaschar in scumond da sa mascrar tar demonstraziuns.

Cuira, ils 10 da favrer 2004

Name: Vetsch, Beck, Bleiker, Brüesch, Brunold, Butzerin, Caviezel-Suter (Tusaun), Christoffel, Conrad, Dudli, Fleischhauer, Giovannini, Göpfert, Gredig, Hardegger, Hübscher, Jeker, Lemm, Mani-Heldstab, Märchy-Michel, Möhr, Montalta, Nigg, Parolini, Pedrini, Ratti, Stiffler, Stoffel, Trachsel, Tscholl, Loi, Mainetti


Session: 10.02.2004
Vorstoss: rg Auftrag


Resposta da la regenza

Cun in scumond da sa mascrar duai d'ina vart vegnir reducida la ristga d'acts da violenza tar demonstraziuns. I correspunda, sco ch'il tribunal federal ha er constatà en sia decisiun 117 Ia 472, ad enconuschientschas segiras ch'il privel d'acts da violenza crescha considerablamain, sch'i sa chattan persunas, ch'èn sa mascradas, tranter las demonstrantas ed ils demonstrants. Ultra da quai èn savens las persunas ch'èn sa mascradas quellas che han la tendenza d'esser violentas e da chaschunar donns materials. Da l'autra vart vegn la lavur da retschertga da la polizia engrevgiada u schizunt rendida impussibla da la mascrada. Pervi da quai resguarda la regenza persunas che sa preschentan mascradas a demonstraziuns sco in problem serius.


Da l'optica da la polizia da segirezza e da dretgira po per quest motiv sa giustifitgar in scumond da sa mascrar. In tal scumond prenda en mira primarmain quellas persunas che promovan en general la prontadad da violenza tras lur esser nunenconuschaivlas u che vulan duvrar l’anonimitad per pudair commetter acts da violenza. En quest senn tschentass il scumond da sa mascrar in signal. Uschia vegnissan chastiads depurtaments ch'èn notorics avant manifestaziuns violentas e che na chattan da princip nagina acceptanza da la societad.

Sch'ins introducescha in scumond da sa mascrar ston ins però esser conscients da la relevanza pratica. Ils chantuns Basilea-Citad, Berna e Turitg enconuschan in scumond da sa mascrar en lur giurisdicziun; in tal vegn previsiblamain introducì anc quest onn en il chantun Lucerna. Tar la realisaziun dal scumond da sa mascrar sa mussan en la pratica savens difficultads considerablas.

Las experientschas dals chantuns che han gia dapi in temp pli lung ina tala regulaziun legala sco er las experientschas en il chantun Grischun en connex cun las demonstraziuns a chaschun dal WEF laschan vegnir la regenza a la conclusiun ch'i stoppia vegnir renunzià al fatg d'integrar in scumonda da sa mascrar en il dretg penal material dal chantun Grischun u en la lescha da polizia ch'è en preparaziun e che na cuntegna betg ina tala disposiziun penala, perquai ch'in scumonda da sa mascrar na po betg vegnir fatg valair. Per questa tenuta èn decisivs ils suandants arguments:

1. Il scumond da sa mascrar restrenscha la libertad da las acziuns tacticas da la polizia, perquai ch'igl exista uschia d'ina vart l'obligaziun da far valair quest scumond, sia realisaziun stricta chaschuna però da l'autra vart in effect cuntraproductiv, perquai ch'igl exista regularmain il privel d'ina escalaziun, sche la polizia entra en acziun. Quai na fiss da l'autra vart betg cumpatibel cun la strategia da deescalaziun ch'è vegnida duvrada cun success tar il WEF ils ultims onns.

2. Per las forzas da polizia ch'èn en acziun tar ina demonstraziun èsi fitg difficil da pudair cumprovar ina cuntravenziun dal scumond da sa mascrar, perquai che gist la mascrada ha per consequenza che l'identificaziun da las persunas delinquentas fa pretensiuns pli grondas. I na fiss betg cumpatibel cun in diever dals meds cun cleras finamiras che las forzas d'acziun stuessan – per tegnair a mastrin ina demonstraziun – sa concentrar sin las persunas mascradas che n'han anc betg commess ulteriurs delicts. Tar ina cuntravenziun dal scumond da sa mascrar sa tractassi mo da chastiar in surpassament. Las forzas d'acziun duain sa pudair concentrar principalmain sin quai d'impedir che donns materials vegnian fatgs e ch'i vegnia fatg diever da la forza.

3. La dumonda, tge che saja da mez enviern en in chantun muntagnard gia ina mascrada u tge che saja anc protecziun cunter il fraid, chaschunass senza dubi difficultads d'interpretaziun, e per las forzas da polizia en acziun malsegirtads ed ulteriurs problems.

4. Surpassaments n'èn per regla nagin titel per in'arrestaziun. Senza ulteriuras cuntravenziuns pli gravantas na dastgass ina persuna mascrada pia betg vegnir tegnida en fermanza suenter che la polizia ha controllà las persunalias ed ha constatà ils fatgs, quai che liass capacitads considerablas da la polizia. La regenza supplitgescha il cussegl grond da na betg acceptar l'incumbensa.

4 da matg 2004