Navigation

Inhaltsbereich

Dumonda Farrér concernent la finanziaziun futura dal fond da megliuraziun

Sessiun: 11.02.2004
Tenor l'art. 50 da la lescha da megliuraziun dal chantun Grischun (DG 915.100) vegn installà in fond da megliuraziun per la realisaziun da megliuraziuns, da las qualas la finanziaziun è difficila. Fin ussa è vegnì alimentà il fond da megliuraziun tranter auter cun ina contribuziun da gulivaziun tar l'alienaziun da cultira. Quests meds èn vegnids duvrads essenzialmain per ovras da megliuraziun, per sanaziuns d'alps, per edifizis agriculs (construcziuns autas e stabiliments), ma er per mesiras per mantegnair la productivitad potenziala e per levgiar la cultivaziun. Er èn vegnids pajads mintg'onn – en connex cun meglieraziuns fundamentalas – sin basa da la lescha chantunala davart las vias var 2 fin 2.5 milliuns francs per construir vias da colliaziun en regiuns, en las qualas l'agricultura è in purtader essenzial da l'economia.
Il fond da megliuraziun è er ordvart impurtant or dal puntg da vista da l'economia publica e regiunala, cunquai che ses meds finanzials na servan betg mo als pertutgads directs mabain er al mastergn.
Cun la sentenzia da la dretgira administrativa dal Grischun dals 17 da zercladur 2003 è vegnì approvà in recurs cunter l'imposiziun da la taxa per la reducziun da cultira. Tenor quella sentenzia stat la pratica chantunala en cuntradicziun cun l'art. 15 da la lescha federala davart la planisaziun dal territori (CS 700). Damai ch'il tribunal federal n'è betg entrà en il recurs da dretg administrativ da la regenza grischuna, mitschan al chantun ed uschia al fond da megliuraziun annualmain 4 fin 4.5 milliuns francs tras l'aboliziun da la taxa per la reducziun da cultira. Sco consequenza da quai, ma er pervi dals conclus prendids en il rom da l'examinaziun da structura e prestaziun per sanar las finanzas dal chantun, è periclitada la realisaziun da numerus projects da megliuraziun.
En quest connex vegn la regenza intimada da respunder las suandantas dumondas:
1. Renconuscha la regenza l'impurtanza dal fond da megliuraziun per la politica agrara e d'occupaziun?
2. È la regenza pronta da metter a disposiziun meds finanzials per il preventiv 2005 en il rom dal preventiv da quest onn?
3. Co giuditgescha la regenza la garanzia dal fond da megliuraziun cun attribuir apports dal quint administrativ ordinari, sco che l'art. 50 al. 2 da la lescha da megliuraziun (DG 915.100) prevesa quai?
4. Resguarda la regenza la creaziun d'ina nova basa legala per alimentar il fond da megliuraziun sco raschunaivla e politicamain realisabla?
5. È il chantun – suenter la sentenzia da la dretgira administrativa – confruntà cun prentensiuns da restituir taxas per la reducziun da cultira gia pajadas?

Cuira, ils 11 da favrer 2004

Name: Farrér, Michel, Beck, Barandun, Berther (Mustér), Bischoff, Brüesch, Büsser, Capaul, Casanova (Vignogn), Casty, Caviezel (Pitasch), Cavigelli, Christoffel, Dermont, Donatsch, Fallet, Fasani, Giovannini, Hanimann, Hardegger, Jeker, Joos-Buchli, Keller, Kleis-Kümin, Koch, Luzio, Meyer-Grass (Claustra), Mengotti, Noi, Parpan, Pedrini, Perl, Pfister, Quinter, Righetti, Rizzi, Sax, Schmid, Stiffler, Telli, Thomann, Tomaschett, Tuor, Zanetti, Zanolari, Zarn, Caviezel

Session: 11.02.2004
Vorstoss: rg Anfrage

Resposta da la regenza

Cun il conclus dals 14 d'october 2003, protocol nr. 1455, ha la regenza incumbensà il departament da l'intern e da l'economia publica d'elavurar in concept che dat tranter auter infurmaziuns davart las meglieraziuns currentas e futuras ed en general davart las mesiras per meglierar la structura. Il medem mument duain pudair vegnir stimads il basegn finanzial necessari ed eventualmain l'ulteriura existenza dal fond da meglieraziun. Il concept ch'è avant maun en furma da sboz cuntegna ils suandants puncts essenzials resumads qua sutvart.
En il rom da las meglieraziuns da structura vegnan realisads construcziuns autas da l'agricultura, stabiliments d'avertura en la regiun champestra (vias, pendicularas, provediments d'aua, electrificaziuns e.u.v.), meglieraziuns d'alps (construcziun auta, provediment d'aua e.u.v.), indrizs agriculs da producziun (chascharias, chasas da maz e.u.v.), mesiras da planisaziun sco regruppaments dal terren e mesiras ecologicas. Cun questas meglieraziuns da structura gida l'agricultura, sco previs en l'art. 104 CF, a mantegnair e tgirar la cuntrada cultivada sco er la colonisaziun decentrala. Ozendi èsi cumprovà che l'agricultura suletta na po betg pli garantir ina colonisaziun decentrala.
La nova politica agrara PA 2007 exprima che cun las meglieraziuns da structura na vegnian betg pli persequitadas finamiras puramain agriculas. Uschia po la confederaziun pajar contribuziuns er per "sustegnair projects per il svilup regiunal e per la promoziun da products indigens e regiunals, vi dals quals è primarmain participada l'agricultura". Sin basa da questa nova orientaziun èn meglieraziuns da structura en l'avegnir en general instruments per il svilup en la regiun champestra. Questa nova orientaziun correspunda er a la nova politica regiunala (NPR) che s'allontanescha da la promoziun da l'infrastructura e s'avischina a la promoziun da process d'innovaziun. Ils meds finanzials da l'uffizi d'agricultura, meglieraziun da structura e mesiraziun per meglieraziuns da structura sa reduceschan – cumpareglià cun ils onns precedents – per annualmain var 10 milliuns francs; da quels èn 4 milliuns francs dal fond da meglieraziun ed ulteriurs 5 fin 6 milliuns francs per onn èn la consequenza da las mesiras da spargn chantunalas.

Sa basond sin questas explicaziuns respunda la regenza las dumondas sco suonda:
1. La construcziun da vias da colliaziun en la regiun champestra, finanziada da meds dal fond da meglieraziun, ha ina gronda impurtanza per la politica agrara e regiunala. En quest connex na dastga er betg vegnir sutvalitada l'impurtanza dals differents projects agriculs da construcziun auta che pon vegnir finanziads mo cun meds dal fond, sco er las ulteriuras mesiras per l'agricultura che ston vegnir realisadas senza agid finanzial federal.
2. Per la fin da l'onn 2004 vegnan ins anc a stuair ademplir obligaziuns da var 3 milliuns francs dal fond da meglieraziun, en emprima lingia per la construcziun currenta da vias da colliaziun. Questas garanzias da finanziaziun sa basan sin conclus da la regenza e ston probablamain vegnir pajadas cun assegnaziuns (art. 50 al. 2 lescha da meglieraziun) en il fond. Per il preventiv 2005 pon vegnir mess a disposiziun – pervi da las mesiras da spargn prendidas – mo ils meds ch'èn absolutamain necessaris per ademplir las obligaziuns pendentas en l'autezza da var 2.75 milliuns francs; quai però er mo alura, sche quests apports pon vegnir spargnads tar autras posiziuns da conto.
3. Fin ch'ils consentiments da finanziaziun garantids èn pajads or dal fond da meglieraziun èn inditgads apports en il fond or dal quint administrativ ordinari. Perquai ch'i sa tracta d'ina finanziaziun speziala n'èn apports che surpassan quella summa betg raschunaivels.
4. Autras pussaivladads alternativas per alimentar il fond da meglieraziun (finanziaziuns spezialas) n'èn betg avant maun u la creaziun d'ina nova basa legala per quest intent è politicamain strusch realisabla. La tematica da la prelevaziun da la plivalur da planisaziun è vegnida examinada en il rom da la revisiun currenta da la LPTGR; ella na vegn per entant però betg persequitada vinavant.
5. Tar la dretgira administrativa èn actualmain pendentas proceduras en quatter cas che concernan restituziuns. Ulteriuras pretensiun restan pendentas tar l'UAMM fin che las decisiuns da la dretgira administrativa èn avant maun.

11 da matg 2004