Navigation

Inhaltsbereich

Sessiun: 11.02.2004
Tenor l’art. 11 da la lescha chantunala (LARP) pon autoritads u terzas persunas che concedan ad ina persuna in pajament anticipà da la premia da la cassa da malsauns obligatoria, sa far ceder il dretg a la reducziun da las premias, sch’il pajament na succeda betg als assicuraders.
La terza persuna che ha pajà anticipadamain las premias e las pretenda enavos, sto laschar suttascriver la disposiziun da cessiun a la persuna cun dretg da retratga ed inoltrar sia dumonda tar ils posts da la cassa da cumpensaziun da l’AVS. Senza disposiziun da cessiun na po vegnir sbursà nagut a las vischnancas. Uschia èn las vischnancas a partir da l’onn 2004 obligadas da pretender ina disposiziun da cessiun da persunas che na pajan betg las premias da la cassa da malsauns – cun excepziun da persunas che retiran supplements socials –, uschiglio vegnan las contribuziuns pajadas directamain a la persuna assicurada.
La difficultad principala è quella da survegnir la decleranza da cessiun necessaria.
A la persuna assicurada che na suttascriva betg la decleranza da cessiun e na paja betg las premias, vegn pajada la reducziun da las premias directamain sin ses conto. I na dat davaira naginas pussaivladads da sfurzar la persuna assicurada da suttascriver la decleranza da cessiun.
Igl è gia capità suvent che las vischnancas han pajà las premias e la persuna assicurada ha survegnì las contribuziuns e na las ha betg pajà a la cassa communala; per la vischnanca n’èsi uschia betg pli stà pussaivel da survegnir enavos las contribuziuns.
Considerond al fatg che las reducziuns da las premias na vegnan, cuntrari ad auters chantuns, en noss chantun betg pajadas directamain a la cassa da malsauns (votaziun dal pievel 03-03-2002) ed en vista al fatg ch’i n’è betg pussaivel d’obligar a burgaisas e burgais da far suttascriver la decleranza da cessiun, faschain nus las suandantas dumondas a la regenza:
1) Pon las vischnancas vegnir autorisadas d’annunziar la fin da l’onn a la cassa da cumpensaziun da la AVS ils cass enconuschents da persunas che na pajan betg regularmain las premias da la cassa da malsauns, schebain che las cassas pajan a chaschun da la reducziun da las premias mintga mez onn l’import directamain a las persunas assicuradas?
2) Sche quai n’è betg pussaivel, co pensa la regenza da gidar las vischnancas tar quest problem?

Cuira, ils 11 da favrer 2004

Name: Pedrini, Noi, Fasani, Giovannini, Mengotti, Plozza, Righetti, Zanetti, Mainetti

Session: 11.02.2004
Vorstoss: rg Anfrage


Resposta da la regenza

Il pajament da la RIP tras ils assicuraders, cun il qual la problematica ch’è la raschun da questa intervenziun pudess vegnir evitada, n’ha fin ussa betg pudì vegnir realisà da l’institut d’assicuranza sociala dal chantun Grischun (IASG), perquai che cun la software existenta dal IASG e dals assicuraders da malsauns na sa lascha betg definir l’intersecziun unifitgada da las datas dal IASG ch’è necessaria per il barat da datas automatic cun ils assicuraders da malsauns activs en il chantun. Ils assicuraders da malsauns vulessan per motivs chapaivels far pli paucas adattaziuns da la EED sco pussaivel avant l’introducziun dal sistem VISTA tras il IASG, che succeda previsiblamain en dus fin trais onns. Quest nov program da software vegn sviluppà d’ina firma d’informatica per la plipart dals chantuns e cuntegna er in nov andament da la RIP.

A las vischnancas na resta per il mument nagut auter che d’intimar ils assicuraders d’admonir uschè spert sco pussaivel ils debiturs en retard e d’introducir la procedura d'execuziun. Sche questa finescha cun emetter in attest da perdita sto l’assicurader tenor l’art. 90 al. 3 OAM annunziar quai a l’autoritad d’agid social cumpetenta. Quella po suenter tenor l’art. 11 al. 3 da la lescha davart l'assicuranza da malsauns e la reducziun da las premias far ceder il dretg sin la reducziun da las premias. Tras in andament speditiv da la procedura d’execuziun po uschia vegnir minimada la dimensiun dal pajament da las vischnancas.

En quest connex ston ins far attent ch’il cussegl federal ha previs – sin fundament da l’augment da las premias nunpajadas e d’auters debits – da midar la lescha federala davart l'assicuranza da malsauns LAM per il 1. da schaner 2005 uschia ch’ils assicuraders ston suenter avair admonì en scrit senza success mo pli pretender la cuntinuaziun da la procedura da scussiun, fin ch’els pon dad ina vart suspender las prestaziuns e da tschella vart infurmar las autoritads chantunalas cumpetentas davart la suspensiun da las prestaziuns. Cun quai vegnissan las vischnancas a savair pli spert davart las premias nunpajadas, uschia ch’ellas pudessan er intervegnir pli baud tar las persunas assicuradas ch’èn en retard cun lur pajament. Da la vista dal chantun e da las vischnancas n’è questa proposta betg nunproblematica. Igl exista en quest cas il privel ch’ils assicuraders na sa stentan betg pli uschè fitg per incassar las premias nunpajadas e transfereschan questa fatschenta pli e pli al maun public.

La regenza respunda las dumondas sco suonda:

1. Na. En cas che las vischnancas annunzian a la cassa da cumpensaziun da la AVS persunas cun RIP che na pajan betg regularmain las premias, ston vegnir fatgas protestas areguard il dretg da protecziun da las datas. I vegn vitiers che la cassa da cumpensaziun da la AVS na po cumenzar nagut cun questa infurmaziun – sch’i n’è betg avant maun ina decleranza da cessiun – quai vul dir: ella na po en quest cas betg far in pajament da la RIP a la vischnanca.

2. La regenza vegn a supplitgar als assicuraders faschend attent a la problematica, sin la quala l’intervenziun preschenta sa basa, ch’ella vegnia suenter ch’il sistem VISTA è introducì il tras il IASG a gidar tar ils pajaments da la RIP.

27 d’avrigl 2004