Navigaziun principala

Cuntegn da la pagina

Incumbensa da cumissiun da la CSF Trepp concernent las taxas betg cuvridas en chasas da tgira

sessiun: 20.04.2004
Tenor l'art. 21 b cifra 2 da la lescha per promover la tgira da malsauns na dastgan las taxas da las chasas da tgira betg esser pli autas per las abitantas ed ils abitants che lur entradas imputablas. Las abitantas ed ils abitants dal stgalim da tgira il pli aut na disponan savens betg da las entradas necessarias per pajar las taxas. Las chasas da tgira ston reducir correspundentamain las taxas en tals cas. Quai chaschuna perditas da rendita per las chasas da tgira, las qualas ha gulivà il chantun fin la fin da l'onn 2003 cun contribuziuns pauschalas per las abitantas ed ils abitants dal stgalim da tgira il pli aut che retiran prestaziuns supplementaras maximalas.

A chaschun da la debatta da spargn da la sessiun da zercladur 2003 ha il cussegl grond renunzià cun la mesira da spargn A 13 al fatg ch'il chantun haja da gulivar las perditas da rendita che vegnan chaschunadas per las chasas da tgira tras la reducziun da taxas prescritta da la lescha tar retschavidras e retschaviders da las prestaziuns supplementaras maximalas e cun il basegn da tgira il pli grond. En questa debatta ha in commember da la cumissiun per sanadad e fatgs socials rendì attent che l'aboliziun da las contribuziuns dastgia vegnir acceptada mo cun la resalva ch'ils assicuraders da malsauns observian lur obligaziun prescritta en la LAM da surpigliar cumplainamain las prestaziuns da tgira. La revisiun da la lescha federala davart l'assicuranza da malsauns ha dentant fatg naufragi en las chombras federalas e per las chasas da tgira datti a partir da l'onn 2004 perditas da rendita considerablas che na dastgan tenor l'avis da la cumissiun per sanadad e fatgs socials betg vegnir cumpensadas da subvenziuns cruschadas.

La regenzas vegn incumbensada d'elavurar fin la fin da l'onn 2004 ina revisiun da la lescha per promover la tgira da malsauns che prevesa ina soluziun concernent las taxas betg cuvridas en chasas da tgira cun effect retroactiv a partir dal 1. da schaner 2004.

Cuira, ils 20 d'avrigl 2004

Name: Cumissiun per sanadad e fatgs socials (CSF), il president Trepp, Augustin, Capaul, Caviezel (Pitasch), Christ, Hardegger, Märchy-Michel, Parolini, Portner, Robustelli

Session: 20.04.2004
Vorstoss: rg Auftrag


Resposta da la regenza

1. Tenor l'art. 21 b da la lescha per promover la tgira da malsauns fixescha la regenza tariffas maximalas, graduadas tenor la dimensiun da las prestaziuns, per chasas da tgira sustegnidas dal chantun cun contribuziuns d'investiziun. Las tariffas maximalas ston da princip vegnir calculadas uschia, ch'ellas pon vegnir finanziadas da las retschavidras e dals retschaviders da prestaziuns supplementaras, e quai per la pli gronda part da lur entradas imputablas.
Ils furniturs da prestaziuns dastgan metter a quint a retschavidras e retschaviders da prestaziuns supplementaras (PS) maximalmain quella summa che po vegnir finanziada cun entradas da la AVS, da la PS (suenter la deducziun da las premias da cassas da malsauns e da la summa pauschala per expensas persunalas) sco er da contribuziuns dals assicuraders da malsauns. In'eventuala differenza va a quint da la chasa da tgira.
La lescha per promover la tgira da malsauns aveva correspundentamain previs en l'art. 21 c al. 1 lit. a fin ils 31 da december 2003 ch'il chantun concedia ina contribuziun a chasas da tgira per abitantas ed abitants che retiran ina prestaziun supplementara maximala per surmuntar questa differenza.

2. En connex cun l'aboliziun da questa disposiziun concludida per ils 31 da december 2003 era il cussegl grond da l'avis che la contribuziun dal chantun saja mo necessaria, perquai che las tariffas dals assicuraders da malsauns na cuvran betg ils custs da tgira effectivs dals stgalims da tgira superiurs. Cun realisar l'ordinaziun davart il calcul dals custs e la registraziun da las prestaziuns tras ils ospitals e las chasas da tgira en l'assicuranza da malsauns, relaschada dal cussegl federal per il 1. da schaner 2003, pon las chasas da tgira crear la transparenza dals custs necessaria, per che las assicuranzas da malsauns pajan tut ils custs da las prestaziuns da tgira ch'èn suttamess a la LAM per il 1. da schaner 2005.

En il rom dal sboz per ina revisiun parziala da la LAM, suttamess dal departament federal da l'intern ils 25 da mars 2004 a la consultaziun, vegn bain renconuschì dal cussegl federal che las tariffas dals assicuraders da malsauns na cuvrian betg ils custs dals dus stgalims da tgira superiurs. En vista ad ina nova regulaziun da la finanziaziun da la tgira che sto vegnir prendida per mauns pli tard, vegni tuttina proponì da bloccar las tariffas generalas suenter in'adattaziun en ils dus stgalims superiurs che dastgass probablamain esser insuffizienta or dal puntg da vista dals furniturs da prestaziuns. La problematica da las tariffas da chasas da tgira ch'èn cuvridas insuffizientamain tar retschavidras e retschaviders da PS cun ina prestaziun supplementara maximala vegn pia a restar almain anc per in temp.

3. La motivaziun ch'è vegnida tratga a strada per l'incumbensa da cumissiun che las chasas da tgira na veglian betg cumpensar las taxas da tgira betg cuvridas cun subvenziuns cruschadas, quai vul dir cun tariffas da las ulteriuras abitantas e dals ulteriurs abitants da la chasa da tgira ch'èn vegnidas adattadas vers ensi en la dimensiun da las perditas da rendita, è chapaivla. Sche las perditas da rendita na vegnan betg cumpensadas dal maun public, exista pia il privel che persunas pauc bainstantas pudessan avair difficultads da chattar accoglientscha en ina chasa da tgira.

4. En vista da questa situaziun da partenza prevesa la regenza da suttametter al cussegl grond ina regulaziun, tenor la quala la vischnanca, en la quala la persuna respectiva aveva ses domicil avant l'entrada en la chasa da tgira, haja da surpigliar la differenza en quels cas, tar ils quals las tariffas da la chasa da tgira na pon betg vegnir finanziads da las entradas imputablas. En quest connex renda ella attent che tar la realisaziun da la regulaziun ch'ella ha avisà na vegn ina midada retroactiva da la lescha per promover la tgira da malsauns per il 1. da schaner 2004 betg ad esser pussaivla.

5. La regenza sa declera pronta d'acceptar questa incumbensa en il senn da las explicaziuns qua survart.

Datum: 9 da zercladur 2004