Navigaziun principala

Cuntegn da la pagina

Dumonda Augustin concernent la segirezza interna

sessiun: 21.04.2004
Dacurt è vegnì terminà resp. per esser pli correct "sepulì" il project da segirezza USIS (examinaziun dal sistem da segirezza interna da la Svizra) da la confederaziun ed dals chantuns, suenter che betg il pli davos l'intercessura la pli ferventa dal project, cussegliera federala Metzler, è sortida la fin da l'onn da ses uffizi. La USIS sto esser stada memia ambiziusa. Il favrer è la conferenza dals schefs dals departaments chantunals da giustia e polizia (CCDGP) a Berna vegnida a la quintessenza or dal naufragi dal project: la segirezza interna resta en emprima lingia ina incumbensa dals chantuns.
Parallelamain tar quai sto vegnir constatà che la confederaziun, oravant tut il departament federal da defensiun, protecziun da la populaziun e sport, amplifitgescha en moda persistenta ed efficazia las acziuns da l'armada per sustegnair la polizia. Gea sco quai che la posiziun la pli nova da cusseglier federal Schmid mussa è ella vi da posiziunar strategicamain da nov l'armada, q.v.d. dad ir davent da la segirezza externa perquai ch'in inimitg n'è lunsch enturn betg visibel e d'arrivar a la segirezza interna, per zuppentar uschia la crisa d'identitad e da senn da la nova armada.

En vista a quests fatgs resultan differentas dumondas che concernan er ils chantuns sco corporaziuns ch'èn tenor la constituziun cumpetentas per la segirezza interna:

1. Co giuditgescha la regenza en moda dal tuttafatg generala il naufragi dal project USIS?

2. È la regenza er da l'avis che schuldads na sajan betg polizists e na duaian er betg esser polizists en il futur?

3. È la regenza er da l'avis ch'i saja delicat da maschadar la segirezza interna ed externa ord vista dal dretg sco er da la politica constituziunala e che quai fetschia donn al sistem da milissa?

4. È la regenza pronta en il rom da sias cumpetenzas da procurar a Berna che l'armada na vegnia betg malduvrada anc pli fitg che oz per incumbensas da la polizia?

5. È la regenza en il rom da sias pussaivladads pronta da prender correspundentamain posiziun a Berna, oravant tut tar ils cussegliers federals Schmid e Blocher, cunter il departament naziunal da segirezza ch'è vegnì prendì en mira, perquai che la suveranitad da polizia chantunala è bain sin ina via indirecta, ma tuttina en moda intenziunada vegnida sutminada uschia?

6. Dacurt han il corp da guardias da cunfin II e la polizia chantunala da la Turgovia concludì da collavurar pli stretgamain per far frunt uschia betg il pli davos a novas furmas da la criminalitad transcunfinala. Co vesa or oz resp. en il futur la collavuraziun tranter la polizia chantunala ed il corp da guardias da cunfin en il Grischun? È la regenza er da l'avis ch'i stuess valair er en quest sectur il princip: ina regiun in schef?

7. Dapi il cumenzament da l'onn 2002 na dastgan ils chantuns betg pli far retschertgas en cas cumplexs da lavada da daners suspectus, corrupziun e criminalitad organisada. Tenor differentas infurmaziuns na persvada questa polizia criminala federala betg. È questa valitaziun da la situaziun tenor l'avis da la regenza er il cas per noss chantun? Vul il Grischun, sco auters chantuns er, en il futur puspè far sez retschertgas en tals cas?

Cuira, ils 21 d'avrigl 2004

Name: Augustin, Righetti, Berther (Sedrun), Büsser, Cavigelli, Demarmels, Farrér, Federspiel, Geisseler, Kleis-Kümin, Loepfe, Maissen, Parpan, Plozza, Quinter, Sax, Tremp, Tuor, Thurner

Session: 21.04.2004
Vorstoss: rg Anfrage


Resposta da la regenza

Ils 20 da favrer 2004 ha la conferenza dals schefs dals departaments chantunals da giustia e polizia (CCDGP) en enclegientscha cun la confederaziun terminà il project d'examinaziun dal sistem da segirezza interna (USIS) e fixà l'ulteriura elavuraziun d'aspects parzials. Spezialmain duai vegnir examinada pli detagliadamain la posiziun dal corp da guardias da cunfin (Cgcf) en vista a la participaziun da la Svizra a la cunvegna da Schengen. La segirezza interna en il sectur da la polizia è tenor l'art. 57 CF primarmain ina incumbensa dals chantuns. Las mancanzas persunalas ch'èn vegnidas renconuschidas dal project USIS duain vegnir eliminadas, uschenavant sco pussaivel, en il rom da la subsidiaritad, da las cumpetenzas e da la scolaziun tras l'armada. Per garantir la segirezza als eveniments gronds vegnan ad esser necessarias er en il futur acziuns interchantunalas da la polizia.

Davart las singulas dumondas prenda la regenza posiziun sco suonda:

1. La regenza beneventa la terminaziun dal project USIS e na giuditgescha quest resultat betg sco naufragi, mabain sco schanza e conferma dal federalissem constituziunal che vala per accumplir las incumbensas da la polizia.

2. Ils appartegnents da l'armada na duain er betg esser activs sco polizists en il futur, mabain accumplir lur incumbensa subsidiarmain per sustegnair il corp da polizia chantunal e quai sut la direcziun d'autoritads civilas. L'armada na duai er betg vegnir clamada per sustegnair la polizia en incumbensas permanentas ed ella na duai er betg surpigliar incumbensas en il servetsch d'urden betg paschaivel.

3. La reuniun u schizunt la maschaida da las responsabladads en ils secturs da la segirezza interna ed externa è delicata. La regenza defenda l'opiniun che l'armada surpiglia, tenor ils conclus dal project USIS, mo pli quellas incumbensas, per las qualas ella è vegnida scolada e cun las qualas ella distgargia e na concurrenzescha betg la polizia. Quai vala tant per federaziuns professiunalas sco er per federaziuns da milissa.

4. e 5. L'armada na vegn da princip betg malduvrada per accumplir incumbensas da la polizia. Ella sustegna e distgargia la polizia per che quella possia accumplir sias incumbensas. La regenza vegn a s'engaschar, en il senn da las explicaziuns surmenziunadas, cunter ina sutminaziun da la suveranitad da polizia chantunala.

6. La polizia chantunala ed il Cgcf han gia dapi onns in'ordra da servetsch communabla. Las incumbensas èn repartidas tenor las cumpetenzas. In nov contract vegn elavurà. Il contract vegn a tegnair quint uschè bain sco pussaivel dal princip "ina regiun, ina incumbensa, in schef" e vegn a resguardar uschia la soluziun "chantuns" che vegn preferida dals chantuns da la Svizra orientala. Tenor questa varianta duain ils corps da polizia chantunals esser cumpetents per mesiras da la polizia e per mesiras substitutivas naziunalas (controllas mobilas, investigaziun zuppada) tenor la cunvegna da Schengen e da Dublin, entant ch'il Cgcf duai accumplir las incumbensas da duana e da cunfin.

7. La nova cumpetenza federala per la persecuziun penala da lavada da daners suspectus, da corrupziun e da criminalitad organisada na vala betg illimitadamain, ella vala dentant mo, sch'ils acts chastiabels èn vegnids commess per gronda part a l'exteriur u en plirs chantuns e sch'i n'exista betg in center evident da l'acziun en in chantun. En tals cas na vegn il chantun Grischun betg ad eruir sez, perquai che las resursas necessarias al mancan. Quellas èn vegnidas creadas tar la confederaziun. Da constatar èsi dentant che las cumpetenzas d'inquisiziun da la confederaziun vegnan pir constituidas. Plinavant sto la confederaziun er s'acquistar las enconuschientschas necessarias. Tut quai sto l'emprim sa consolidar. La polizia chantunala sa concentrescha sin ils fatgs che han ina relaziun cun il chantun.

Datum: 6 da fanadur 2004