Navigation

Inhaltsbereich

Dumonda Jäger concernent l'instrucziun da lingua en la scola primara

Sessiun: 21.04.2004
Tenor il dretg vertent survegnan las scolaras ed ils scolars en las scolas primaras grischunas sper l'instrucziun da lingua materna l'instrucziun d'ina ulteriura lingua chantunala. Sin il stgalim superiur I vegn vitiers supplementarmain l'englais sco lingua estra obligatoria. L'ulteriura instrucziun da linguas estras è facultativa.
La conferenza svizra dals directurs chantunals da l'educaziun publica (CDEP) recumonda uss d'instruir sin il stgalim primar ultra da la lingua materna obligatoriamain gia duas linguas estras. Las opiniuns èn differentas areguard las dumondas, en tge classa primara che l'instrucziun da linguas estras duaja cumenzar e sch'ina segunda lingua naziunala u l'englais duaja esser l'emprima lingua estra.
Betg pir ils resultats dischillusiunants dal studi PISA han mussà ch'ina promoziun consequenta da la lingua materna stoppia esser ina da las finamiras las pli impurtantas da la scola populara. En quest connex sto er vegnir fatg attenziun en las scolas tudestgas che la lingua da standard a bucca ed en scrit na vegnia betg negligida.
Las sutsegnadas ed ils sutsegnads èn da l'avis ch'i na duess betg vegnir introducida in'ulteriura lingua estra en las scolas primaras dal chantun Grischun, e quai primarmain ord ponderaziuns pedagogicas (memia gronda chargia per ils uffants da scola).

En quest connex vegn la regenza supplitgada da respunder las suandantas dumondas:

1. È la regenza er da l'avis che la promoziun consequenta da la lingua materna a bucca ed en scrit stoppia star en il center da la promoziun da la lingua en la scola populara?

2. Tge experientschas han ins fatg fin uss en il Grischun cun l'instrucziun da la segunda lingua en las scolas primaras? È la regenza er da l'avis ch'i stuessan vegnir messas finamiras anc pli liantas en quest reguard?

3. È la regenza plinavant er da l'avis ch'i na duaja betg vegnir introducida ils proxims onns in'ulteriura lingua estra en las scolas primaras grischunas? Tge posiziun prenda la regenza envers il model 3/7 (= emprima lingua estra a partir da la 3. classa primara / segunda lingua estra a partir dal 7. onn da scola)?

4. Tgeninas fissan tenor l'avis da la regenza las consequenzas pedagogicas da l'introducziun d'ina segunda lingua estra sin il stgalim primar?

5. Cun tge custs approximativs fiss da quintar per il chantun sco er per las vischnancas, en cas che l'englais vegniss introducì gia sin il stgalim primar?

6. È la regenza er da l'avis che las scolaras ed ils scolars survegnian per colliar l'instrucziun da lingua sin tut ils stgalims in "portfolio da linguas" individual, il qual vegn manà vinavant suenter la scola populara er en las scolas professiunalas e/u en las scolas medias?

Cuira, ils 21 d'avrigl 2004

Name: Jäger, Butzerin, Demarmels, Arquint, Beck, Berther (Sedrun), Brunold, Bucher-Brini, Casty, Caviezel-Sutter (Tusaun), Christoffel, Fasani, Frigg, Giacometti, Giovannini, Hardegger, Hübscher, Jaag, Jenny, Keller, Maissen, Mani-Heldstab, Meyer Persili (Cuira), Mengotti, Noi, Pedrini, Peyer, Pfenninger, Pfiffner, Plozza, Righetti, Rizzi, Schütz, Tomaschett, Tremp, Trepp, Zanolari, Zarn, Zindel, Florin-Caluori, Mathis, Toschini

Session: 21.04.2004
Vorstoss: rg Anfrage


Resposta da la regenza

La conferenza svizra dals directurs chantunals da l'educaziun publica (CDEP) ha relaschà la fin da mars 2004 recumandaziuns che prevesan tranter auter a lunga vista duas linguas estras per il stgalim da scola primara e che postuleschan standards liants tar puncts fixs definids durant il temp da scola obligatori. La CDEP è conscienta ch'i sa dattan problems regiunals supplementars per l'instrucziun da linguas estras en ils chantuns plurilings sco er en il chantun Tessin. Perquai vegn concedì als chantuns Tessin e Grischun in agen status en vista a la realisaziun da las recumandaziuns menziunadas.

Davart la dumonda concernent l'instrucziun da lingua en la scola primara s'exprima la regenza sco suonda:

Tar 1: Gea. Il program da la regenza 20052008 prevesa perquai da rinforzar la lingua da standard en tut il sectur da scola.

Tar 2: En il Grischun rumantsch e talian vegnan fatgas cun finamiras formuladas cleramain bunas experientschas concernent l'instrucziun da tudestg sco segunda lingua. Er en il Grischun tudestg è la maioritad da las persunas pertutgadas directamain cuntenta cun la soluziun actuala concernent l'instrucziun da la segunda lingua (rumantsch resp. talian). Durant ils proxims onns ston dentant vegnir fatgs ulteriurs sforzs per satisfar a la pretensiun da qualitad d'ina instrucziun da linguas estras che s'orientescha al futur. En vista a l'introducziun d'in nov med d'instrucziun ed a la realisaziun d'instruments accumpagnants adattads (p.ex. portfolio da linguas) vegn examinà da prescriver finamiras pli liantas er per l'instrucziun da rumantsch resp. talian sco segunda lingua.

Tar 3: La regenza è da l'avis ch'i na duaja betg vegnir introducida in'ulteriura lingua estra en las scolas primaras grischunas avant che la purschida da linguas existenta n'è betg consolidada. Il project da l'instrucziun da la segunda lingua va a fin la fin da l'onn 2004. In'evaluaziun dals emprims resultats ha tranter auter mussà ch'igl exista per las persunas d'instrucziun er per ils onns vegnints in basegn da furmaziun supplementara cun cleras finamiras e ch'igl è necessari da far ina introducziun en in nov med d'instrucziun. Ina furmaziun supplementara senza interrupziun en il sectur da l'englais engrevgiass enormamain il sistem da scola dal Grischun en vista a la gronda quantitad da projects da svilup da scola ch'èn gia instradads.
Ina midada dal model actual 4/7 al model 3/7 (q.v.d. in'emprima lingua estra a partir dal 3. onn da scola ed ina segunda lingua estra a partir dal 7. onn da scola) fiss en cas da basegn relativamain simpla en il rom dal concept grischun da linguas sco ch'el sa preschenta oz.

Tar 4: Concernent las consequenzas pedagogicas da l'introducziun d'ina segunda lingua estra sin il stgalim primar han schizunt expertas ed experts cun renconuschientscha internaziunala differentas opiniuns. Ils ins vesan la schanza d'ina promoziun cun cleras finamiras, ils auters il privel che las scolaras ed ils scolars vegnian surdumandads. Cunquai che mintgamai tut las scolaras e tut ils scolars, q.v.d. en il cas concret tant ils uffants talentads en linguas sco er ils uffants pli flaivels en linguas, vegnan pertutgads d'ina mesira concreta en il sectur da la scola populara, stuess ins en il senn d'ina mesira accumpagnanta pudair revegnir ad ina didactica differenziada da la segunda resp. da la terza lingua. Models d'instrucziun ch'èn madirs e vegnids experimentads en quest reguard na stattan però betg anc a disposiziun.

Tar 5: Sin basa dal princip "ina classa ina persuna d'instrucziun" che vala sin il stgalim primar stuess la maioritad da las persunas d'instrucziun da la scola primara vegnir scolada uschia ch'ella cuntanschess areguard la cumpetenza linguistica il nivel C 1 (Cambridge advanced, tenor il "rom da referenza europeic per linguas"). Ils custs da scolaziun per var 600 persunas d'instrucziun dastgassan importar ca. 11 milliuns francs. En questa calculaziun n'èn betg cuntegnids ils custs per la direcziun dal project sco er ils custs per adattaziuns tar la furmaziun fundamentala e tar ils meds d'instrucziun (tranter auter adattaziuns per il Grischun rumantsch e talian). En tut dastgass quai anc ina giada importar plirs milliuns francs. Tenor las prescripziuns da la lescha da scola van ils custs a donn e cust dal chantun e dals purtaders da scola.

Tar 6: La formulaziun da standards liants a la fin da la scola primara ed a la fin dal temp da scola obligatori maina ad in'armonisaziun ed ad in augment da la valur da l'instrucziun da linguas estras. En quest connex po il "portfolio da linguas" ch'è en svilup daventar in med d'agid impurtant.

Datum: 2 da fanadur 2004