Navigation

Inhaltsbereich

Dumonda Kleis-Kümin concernent las differenzas chantunalas tar la zavrada dal guaud da protecziun e lur consequenzas finanzialas

Sessiun: 21.04.2004
En il rom da las mesiras da spargn da la confederaziun è spezialmain periclità il guaud da protecziun en sia funcziunalitad persistenta. Cun ils meds finanzials che stattan oz a disposiziun resp. che vegnan mess oz a disposiziun po vegnir tgirada en il Grischun mo la mesadad da la surfatscha dal guaud da protecziun che stuess vegnir tgirà en reguard a la persistenza e l'efficacitad.

Il program forestal svizzer (PF-CH) numna sco ina da sias finamiras prioritaras cun resguardar il princip da subsidiaritad e pervi da las resursas stgarsas (program da distgargia) che la prestaziun dal guaud da protecziun stoppia esser garantida. En quest connex in citat da la retscha da publicaziuns "ambient" nr. 363, program forestal svizzer (PF-CH), program d'activitad 2004-2015; UFAGC, Berna 2004: "La prestaziun dal guaud per la protecziun dals umans e da lur infrastructura (abitadis, viafier, via e.u.v.) è garantida en moda persistenta sin in nivel da protecziun ch'è cumparegliabel en tut la Svizra."

La zavrada da guaud cun ina funcziun da protecziun particulara (guaud GFPP) sco er da guaud che n'ha betg ina funcziun da protecziun particulara è vegnida fatga en il chantun Grischun la mesadad dals onns 90 sin basa da criteris generals naziunals da la direcziun federala da selvicultura (D+S: circulara nr. 8). Oz sto vegnir constatà ch'i dat grondas differenzas chantunalas tar la zavrada dal guaud da protecziun. Quai segir betg a favur dal chantun Grischun, tar il qual mo gist var 1/3 da la surfatscha da guaud è vegnida definida sco guaud cun ina funcziun da protecziun particulara. En la cumparegliaziun interchantunala stuess la part da la surfatscha da guaud cun ina funcziun da protecziun particulara importar bler dapli che 50% (cf. axas da traffic, topografia, abitadis).

La confederaziun ha fixà sco finamira d'elavurar tenor criteris standardisads ina charta d'infurmaziuns davart ils guauds da protecziun che sa basa sin process e sin il potenzial da donn per tranter auter evaluar las grondas differenzas chantunalas tar la zavrada da guaud da protecziun e per manar ils chantuns ad in standard unifitgà. Sco orizont da temp èn previs ils onns 2006/07.

En il fratemp restan però anc adina las grondas differenzas chantunalas. En vista a las mesiras da spargn e da l'orizont da temp presumtiv da l'unificaziun planisada da la dumonda dals guauds da protecziun stoi vegnir partì dal fatg ch'il chantun Grischun perdia eventualmain en la cumparegliaziun interchantunala areguard las contribuziuns per la tgira dal guaud da protecziun.

1. Tgenins èn ils motivs per questas grondas differenzas chantunalas tar la zavrada dal guaud da protecziun e nua stat il chantun Grischun en la cumparegliaziun interchantunala?

2. Cun tge consequenzas finanzialas sto il chantun Grischun far quint en vista da questas differenzas cumpareglià cun auters chantuns (eventualmain cun cundiziuns generalassumegliantas concernent la topografia, la populaziun e.u.v.) fin tar la realisaziun dals standards unifitgads e cumparegliabels che la confederaziun ha planisà?

3. Tge mesiras vegnan prendidas da la regenza per cumbatter fin alura in'eventuala repartiziun ineguala da las contribuziuns?

Cuira, ils 21 d'avrigl 2004

Name: Kleis-Kümin, Thomann, Augustin, Bachmann, Bär, Barandun, Beck, Berther (Mustér), Berther (Sedrun), Biancotti, Bleiker, Bundi, Büsser, Cahannes, Capaul, Casanova (Vignogn), Cavigelli, Crapp, Demarmels, Dermont, Fallet, Farrér, Federspiel, Geisseler, Hardegger, Keller, Loepfe, Maissen, Meyer-Grass (Claustra), Noi, Parpan, Pfenninger, Pfister, Plozza, Portner, Quinter, Righetti, Rizzi, Schmid, Tomaschett, Tremp, Tuor, Zanolari, Zarn, Florin-Caluori, Nay, Thurner

Session: 21.04.2004
Vorstoss: rg Anfrage


Resposta da la regenza

La legislaziun da la confederaziun davart il guaud differenziescha tranter guauds cun ina funcziun da protecziun generala e guauds cun ina funcziun da protecziun speziala. En quest connex vala il princip ch'ils chantuns stoppian garantir ina tgira minimala da tut ils guauds cun funcziuns da protecziun. Ina funcziun speziala da protecziun ademplescha in guaud che crescha sin spundas, da las qualas deriva in privel direct per l'uman u per valurs materialas considerablas tras lavinas, bovas, erosiun, ruttivas u crudada da crappa. Per guauds cun ina funcziun da protecziun generala paja la confederaziun per regla mo contribuziuns per mesiras da tgira minimalas limitadas. En guauds cun ina funcziun da protecziun speziala vegnan perencunter confinanziadas mesiras forestalas che van pli lunsch. La confederaziun ha dentant renunzià da far ina zavrada da guauds da protecziun ed ha surlaschà als chantuns spezialmain la cumprova, sch'in guaud adempleschia ina funcziun da protecziun speziala. Partind da las finamiras da la confederaziun (circulara nr. 8 da la direcziun federala da selvicultura D+S) ha il chantun Grischun definì cleras directivas per la zavrada da guauds cun ina funcziun da protecziun speziala e designà ils onns 1994/1995 var in terz (ca. 60'000 ha) da l'entira surfatscha dal guaud sco guauds cun ina funcziun da protecziun speziala. Partind da questas constataziuns generalas pon las dumondas vegnir respundidas sco suonda:

1. Tenor ina retschertga da la confederaziun da l'onn 2002 importa la part dals guauds cun ina funcziun da protecziun speziala tranter 0% e 50% dal total dal guaud en ils singuls chantuns. Il Grischun sa chatta cun var 33% sin la settavla plazza. Questas grondas differenzas sa basan dentant mo per part sin fatgs objectivs (p.ex. topografia). Il motiv principal è quel ch'igl èn vegnids fixads en la circulara nr. 8 da la D+S mo criteris rudimentars per la zavrada da guauds cun ina funcziun da protecziun speziala ch'èn alura vegnids interpretads differentamain dals chantuns.

2. La finamira d'origin dal chantun è stada da realisar successivamain entaifer 20 onns las mesiras da tgira necessarias per ils guauds cun ina funcziun da protecziun speziala. Pervi da las mesiras da spargn rigurusas da la confederaziun na po la tgira dals guauds da protecziun actualmain però betg pli vegnir ademplida en la dimensiun giavischada. L'onn 2004 pon uschia vegnir realisadas las mesiras correspundentas mo pli per var 1'400 ha guaud. Necessarias fissan dentant mesiras da tgira dal guaud per var 3'000 ha. Areguard la situaziun finanziala critica da la confederaziun e dal chantun èsi per quai inevitabel da metter prioritads. Gia pervi da quests fatgs na sto il chantun Grischun betg far quint cun effects finanzials negativs fin a la realisaziun dals standards planisads da la confederaziun concernent la zavrada da guauds cun ina funcziun da protecziun speziala. E quai er pervi da quai che la confederaziun ha fatg la repartiziun dals meds finanzials quasi exclusivamain sin basa dals rapports da basegn dals chantuns e perquai ch'ella n'ha strusch resguardà la surfatscha dal guaud da protecziun.

Il chantun ha protestà diversas giadas tar la confederaziun ed ha pretendì che las autoritads federalas cumpetentas defineschian standards unifitgads per l'entira Svizra en connex cun la zavrada da guaud da protecziun. La confederaziun ha satisfatg a questas pretensiuns e las lavurs respectivas vegnan ad esser terminadas cun integrar il chantun Grischun previsiblamain la mesadad da l'onn 2005. Plinavant han la conferenza dals directurs forestals chantunals ed il chantun Grischun rendì attent la confederaziun a la discrepanza tranter las finamiras dal program forestal svizzer e las mesiras da spargn rigurusas tar la tgira dal guaud da protecziun. Latiers ha spezialmain il chantun Grischun punctuà cun l'enclegentaivladad necessaria ch'ils meds limitads da la confederaziun stoppian vegnir duvrads prioritarmain per la tgira dal guaud da protecziun. Quest puntg da vista vegn il chantun Grischun a confermar er en connex cun ils programs da distgargia da la confederaziun che ston anc vegnir tractads.

Datum: 17 da zercladur 2004