Navigaziun principala

Cuntegn da la pagina

Dumonda Noi concernent ils documents per ils examens d'admissiun a la scola chantunala grischuna redigids unicamain en tudestg

sessiun: 21.04.2004
Als sutsegnads da questa dumonda èsi enconuschent che la scola chantunala grischuna ha publitgà tant ils documents d'annunzia per ils examens d'admissiun al gimnasi sco er ils resultats dals examens unicamain en tudestg.
Ultra dal fatg che quai signifitga ina mancanza da respect nunacceptabla visavi la populaziun da las autras linguas dal chantun èsi er dischagreabel per quels geniturs ch'èn dependents d'agid extern, perquai ch'els na chapeschan betg tudestg.

Sin fundament da questa constataziun tschentain nus las suandantas dumondas:

Pertge èn vegnids redigids ils documents per ils examens d'admissiun mo en tudestg?

Pudain nus far quint che questa pratica vegnia midada proximamain?

È questa pratica cumpatibla cun l'artitgel 3 da la constituziun chantunala ch'è en vigur dapi il 1. da schaner 2004?

Cuira, ils 21 d'avrigl 2004

Name: Noi, Fasani, Augustin, Giovannini, Keller, Mengotti, Pedrini, Plozza, Righetti

Session: 21.04.2004
Vorstoss: rg Anfrage


Resposta da la regenza

Ils ultims onns è la procedura d'admissiun a las scolas medias dal chantun Grischun vegnida midada fundamentalmain ed adattada permanentamain a las novas pretensiuns. L'ultima adattaziun radicala è stada necessaria per l'onn da scola 2003/04, suenter ch'il cussegl grond aveva cun la mesira 331 en il rom da l'examinaziun da las structuras e da las prestaziuns per sanar las finanzas dal chantun limità la fin d'avust 2003 ils dumbers d'admissiun a las scolas medias grischunas.

L'emprim sto vegnir rendì attent ch'i na sa tracta en cas dals documents menziunads betg forsa da dumondas d'examen. Las dumondas d'examen ed auters documents per ils examens d'admissiun èn en mintga cas vegnids redigids e distribuids en tut las trais linguas, uschia ch'ils examens d'admissiun sco tals èn stads gists e corrects. Igl è dentant capità che singulas brevs da communicaziun e singuls formulars èn vegnids tramess als geniturs ed als giuvenils mo per tudestg. En quest sectur sa mussa ina mancanza en la communicaziun ch'i vala d'eliminar.
Tar las singulas dumondas po vegnir menziunà il suandant:

1. Pervi da la cumplexitad da las midadas e pervi dals curts termins da realisaziun n'han cun las resursas a disposiziun betg tut ils documents pudì vegnir translatads a temp, uschia che singuls documents, p.ex. brevs da communicaziun per s'annunziar e brevs per communitgar ils resultats dals examens, han stuì vegnir tramess als geniturs ed als giuvenils unicamain per tudestg. Che quai è capità, vegn deplorà expressivamain.

2./3. En il futur duain ils documents relevants per ils examens ed er ils ulteriurs documents che sa refereschan als examens d'admissiun vegnir redigids da l'uffizi en las trais linguas chantunalas tudestg, rumantsch e talian, da maniera che la pratica saja cumpatibla cun l'artitgel 3 da la constituziun chantunala.

Datum: 17 da zercladur 2004