Navigation

Inhaltsbereich

Incumbensa Felscher concernent las prescripziuns concretas per la reducziun da plazzas da lavur tar l'administraziun chantunala pli stretga

Sessiun: 21.04.2004
Dapi che plirs indizis han mussà l'ultim temp che l'incumbensa Feltscher ch'era vegnida acceptada n'è betg vegnida realisada correctamain e confurmamain al senn, duai cun la precisaziun sutmenziunada vegnir creada la basa per sia realisaziun.

Il titel da l'incumbensa da la cumissiun dals 11-6-2003 sa clamava: “incumbensa davart la reducziun supplementara da plazzas da lavur tar l'administraziun chantunala”. Il president da la cumissiun ha explitgà la resposta da la regenza en il cussegl grond (protocol p. 261 dals 26-8-03): “Il potenzial da reducir supplementarmain plazzas da lavur proponì da la cumissiun sa referiva unicamain a l'administraziun chantunala. Organisaziuns excorporadas e manaschis subvenziunads n'ha la cumissiun betg examinà. Tenor nossas retschertgas stuess il potenzial da spargn da 170 plazzas vegnir chattà en l'administraziun publica. Quai n'excluda betg ch'er ils instituts autonoms ed ils manaschis subvenziunads pudessan demussar supplementarmain a las mesiras gia previsas in ulteriur potenzial da spargn. Dentant stuess la regenza surpigliar la direcziun dals manaschis autonoms plitost tras cunvegnas da prestaziun che tras contingents da plazzas da lavur.”

Per reducir plazzas da lavur ha la maioritad da la cumissiun proponì en l'incumbensa exclusivamain secturs en l'administraziun pli stretga ed en instituts dependents da dretg public: “cussegliaziun da manaschis agriculs, uffizi da planisaziun, uffizi per industria, mastergn e lavur, uffizi per l'ambient, scol'auta professiunala da pedagogia, gimnasi inferiur (direcziun e services), stabiliments da retenziun, uffizi per la protecziun civila, uffizi da construcziun auta, uffizis districtuals da construcziun bassa, uffizi forestal.” Tenor il conclus da la regenza dals 16-12-2003 ha la regenza deducì da l'incumbensa da cumissiun che l'administraziun chantunala duaja spargnar 32 plazzas da lavur ed interpresas u instituts autonoms e subvenziunads 38. Sche la regenza emprova da realisar l'incumbensa acceptada ordaifer l'administraziun, ha ella interpretà fallidamain l'incumbensa da cumissiun. Ella ha plinavant ignorà la proposta da l'incumensa: “La regenza vegn supplitgada d'elavurar ensemen cun il parlament mesiras che mainan fin l'onn 2007 ad ina reducziun d'ulteriuras 70 plazzas da lavur en l'administraziun chantunala” e n'ha betg infurmà u integrà en quest process ni la cumissiun, ni la CdG. I fa surstar per exempel che tenor l'enumeraziun fatga il DIEP duai spargnar mo 3.3 plazzas da lavur.

La cumissiun ha exprimì cleramain en sia incumbensa ch'ils respargns supplementars da plazzas da lavur per 70 ulteriuras plazzas duaja succeder en l'administraziun pli stretga. Ils manaschis subvenziunads na figureschan insumma betg en l'incumbensa. Instituts autonoms e subvenziunads da dretg public sco er interpresas da dretg privat na dastgan betg vegnir controllads da la regenza tras prescripziuns da plazzas da lavur. Sche la regenza vesess in potenzial da spargn tar talas instituziuns, in fatg ch'i fiss d'evaluar accuratamain, stuess ella controllar quel cun adattar las incaricas da prestaziun e suttametter quellas al parlament. Davart las resursas persunalas e localas ston ils gremis directivs da las instituziuns autonomas anc adina pudair decider sezs. Adequatas n'èn ni reducziuns linearas en francs, ni prescripziuns davart il persunal. La reducziun da plazzas da lavur ha per consequenza ch'en quests manaschis ch'èn savens prosperants na resultan betg respargns mabain perditas surproporziunalas da rendita e transferiments dals custs en auters secturs (ospitals, scolas).

Tuttina para la regenza da spetgar prescripziuns pli cleras che mo indicaziuns da plazzas. Tenor il program da la regenza p. 51 concretisescha ella sezza ch'i saja da far quint cun 100'000 francs per plazza da lavur, tar ina reducziun da 70 plazzas resulta in volumen da spargn da 7 milliuns. Questa reducziun dals custs da persunal sto vegnir repartida sin tut ils departaments, e quai en proporziun cun il dumber total da plazzas e cun las mesiras gia prendidas. Ils respargns duain sa referir en emprima lingia als uffizis menziunads ed in'eventuala reducziun da las prestaziuns duai avair in effect deregulativ. Per instituziuns ordaifer l'administraziun pli stretga ston las mesiras dal CR cità vegnir suspendidas fin che l'incumbensa vegn tractada en il cussegl grond.

La regenza vegn incumbensada d'elavurar mesiras che mainan fin l'onn 2008 ad in respargn supplementar da persunal da var 70 plazzas da lavur e ad ina reducziun dals custs da persunal da ca. 7 milliuns en l'administraziun pli stretga. Ils manaschis subvenziunads ed ils instituts autonoms da dretg public n'èn betg pertutgads da questa incumbensa.

Cuira, ils 21 d'avrigl 2004

Name: Feltscher, Tscholl, Geisseler. Augustin, Bachmann, Bär, Barandun, Berther (Sedrun), Biancotti, Bischoff, Brüesch, Bühler-Flury, Büsser, Cahannes, Casanova (Vignogn), Casanova Cuira, Caviezel (Pitasch), Cavigelli, Christ, Claus, Crapp, Demarmels, Donatsch, Federspiel, Giacometti, Hanimann, Hardegger, Jenny, Joos-Buchli, Keller, Kessler, Kleis-Kümin, Koch, Krättli-Lori, Loepfe, Maissen, Marti, Meyer-Grass (Claustra), Mengotti, Michel, Nigg, Parpan, Perl, Pfister, Plozza, Rizzi, Robustelli, Sax, Schmid, Telli, Thomann, Tomaschett, Tramèr, Tuor, Wettstein, Zanetti, Zanolari, Zarn, Zegg, Hartmann (Cuira), Pool, Thurner

Session: 21.04.2004
Vorstoss: rg Auftrag


Resposta da la regenza

En la resposta da l'incumbensa Feltscher (Feltscher I) dals 8 da fanadur 2003 (prot. nr. 1090) ha la regenza menziunà en connex cun las 70 plazzas da lavur supplementaras che duain vegnir spargnadas, ch'ella vegnia a s'engaschar ch'ina part commensurada da quests respargns vegnia realisada er tar las organisaziuns excorporadas e tar ils manaschis subvenziunads. Il cussegl grond ha acceptà l'incumbensa cun 75 cunter 19 vuschs en il senn da las explicaziuns en scrit da la regenza (cf. protocol dal cussegl grond dals 26 d'avust 2003, p. 263). Silsuenter èn las organisaziuns excorporadas ed ils manaschis subvenziunads medemamain vegnids integrads en l'analisa davart la reducziun supplementara da plazzas da lavur.

En l'incumbensa che vegn respundida qua (Feltscher II) vegn explitgà rinviond a las explicaziuns en il cussegl grond che las organisaziuns excorporadas ed ils manaschis subvenziunads na sajan anc betg vegnids analisads da la cumissiun dal cussegl grond. Quai n'è dentant betg in argument cunter lur integraziun, tant pli ch'il cussegl grond ha acceptà l'incumbensa Feltscher I en il senn da las explicaziuns da la regenza.

En quest connex sto vegnir resguardà ch'ils custs da salari da l'administraziun centrala èn s'augmentads mo minimamain, cumbain ch'igl èn vegnidas vitiers novas incumbensas. Perencunter èn las contribuziuns als manaschis subvenziunads creschidas considerablamain durant ils ultims onns. Tenor l'avis da la regenza na pari perquai betg giustifitgà da concentrar ils respargns da plazzas da lavur unicamain sin l'administraziun interna ed en spezial sin indesch posts da servetsch menziunads en moda exemplara, e da negliger ils manaschis subvenziunads.

En quest connex èsi cler che unitads d'organisaziun ch'èn vegnidas excorporadas pir dacurt sco ils servetschs psichiatrics dal Grischun cun in volumen da 400 plazzas da lavur u il center da furmaziun per la sanadad ed ils fatgs socials cun 14 plazzas da lavur relevantas per il plan da plazzas ston en mintga cas vegnir integradas en las mesiras da spargn. La midada da la furma giuridica da quests instituts, che ha gì lieu pir dacurt, n'ha fin uss betg gì in effect da distgargia sin las finanzas dal chantun.

I sto vegnir resguardà ch'il dumber dal persunal en ils ospitals subvenziunads è s'augmentà en l'interval da l'onn 2000 a l'onn 2002 d'in volumen da ca. 1850 plazzas da lavur sin in volumen da 2030 plazzas da lavur. Quai correspunda ad in augment da ca. 10 %. Perencunter è il dumber da plazzas da lavur tenor il plan da plazzas da l'administraziun centrala sa sviluppà a moda pli modesta:

dumber da plazzas da lavur tenor il plan da plazzas, la fin da december 2000: 2767,5creaziuns da plazzas da lavur da la cumissiun da gestiun
e dals posts da servetsch da GRiforma
(da quellas tutgan 12 plazzas da lavur a posts da servetsch da
GRiforma e 5 plazzas a l'administraziun da taglia, mesira da structura
e da spargn 180): 38,5
surpigliada dal servetsch social da la citad da Cuira
senza custs supplementars: 6,5
excorporaziuns, numnadamain da las clinicas psichiatricas chantunalas
e da las chasas chantunalas da dimora (400) e dal center da furmaziun
per la sanadad ed ils fatgs socials (14): - 414,0plazzas stritgadas: - 4,5
dumber da plazzas da lavur tenor il plan da plazzas,
la fin da december 2003: 2394

Dal dumber da plazzas tenor il plan da plazzas da la fin da l'onn 2000, ch'è vegnì rectifitgà per las unitads excorporadas, resulta fin la fin da l'onn 2003 in augment da mo 1,72 %.

Interessant è in sguard sin il svilup dals custs da persunal e dals custs reals or dal puntg da vista interchantunal. Cun ina part dals custs da persunal da mo 15 % vi dals custs currents ha il chantun Grischun la valur la pli bassa da tut ils chantuns. La media dals 26 chantuns importa 31,5 %. Il Grischun na cuntanscha gnanc ina giada la mesadad da questa media. Ultra dal Grischun han mo quatter auters chantuns ina part sut 20 %. Quai èn OW (18,9 %), SZ (18,7 %), AR (18,6 %) ed AI (15,6 %), pia chantuns relativamain pitschens. Questa differenza considerabla tar la part dals custs da persunal sto vegnir attribuida al fatg ch'il chantun Grischun deleghescha bleras incumbensas, las qualas vegnan per regla surpigliadas en auters chantuns dad agen persunal, a terzas persunas u instituziuns, uschia en spezial en il sectur d'ospital e da scola. Er quai giustifitgescha da tschertgar il potenzial da spargn betg mo ed unilateralmain en l'administraziun centrala.

L'analisa ch'è vegnida menziunada da la regenza en la resposta da l'incumbensa Feltscher I è vegnida fatga. Il resultat è avant maun. Il volumen da 70 plazzas da lavur sco quai ch'igl è vegnì pretendì en l'incumbensa ha pudì vegnir eruì. La reducziun da plazzas da lavur è cumbinada cun ina reducziun da prestaziuns. Cunquai che las organisaziuns excorporadas ed ils manaschis subvenziunads na pon betg vegnir controllads tras dumbers da plazzas tenor in plan da plazzas, è dal reminent vegnì concedì a questas instituziuns en emprima lingia als ospitals da remplazzar directivas concretas per spargnar plazzas tras respargns tar la retratga da subvenziuns.
Tenor l'avis da la regenza è la via tschernida per realisar l'incumbensa Feltscher Ia dretga ed er quella che maina a la finamira. Il volumen da spargn che vegn cuntanschì uschia correspunda a las directivas. El è la consequenza d'ina reducziun equilibrada da prestaziuns e da plazzas da lavur.

Las incumbensadras ed ils incumbensaders preciseschan la finala l'emprima incumbensa da la sessiun da zercladur 2003 en quel senn ch'els pretendan ultra dal dumber da plazzas che duai vegnir reducì ina reducziun dals custs da persunal en ina dimensiun correspundenta. Er en quest reguard po vegnir confermà ch'il volumen da spargn en l'autezza da 7 milliuns francs po vegnir cuntanschì, sche tut las 70 plazzas supplementaras vegnan reducidas.

La regenza propona da refusar questa incumbensa en il senn da las explicaziuns.

Datum: 2 da fanadur 2004