Navigaziun principala

Cuntegn da la pagina

Incumbensa da cumissiun, cumissiun per economia, taxas e politica da Stadi concernent l'introducziun d'in program federal analog al EFLAD

sessiun: 17.06.2004
En differents secturs fraina in grond dumber da leschas federalas in svilup economic. Mintg'onn vegnan relaschadas novas leschas, las leschas existentas na vegnan dentant bunamain mai abrogadas. Ils chantuns, las vischnancas e las persunas privatas èn restrenschidas en lur pussaivladads pervia da l'execuziun dal dretg federal pertutgant las taxas.
Ils territoris da muntogna èn spezialmain pertutgads da questas restricziuns. Ellas impedeschan l'atgna iniziativa, sco ch'ella vegn pretendida da la nova politica regiunala da la confederaziun.
La cumissiun per economica, taxas e politica da stadi supplitgescha la regenza da prender influenza cun cleras finamiras per ina legislaziun federala concisa e redimensiunada, e quai cun tut sias pussaivladads e tras la CdC. Ils parlamentaris grischuns a Berna duain vegnir appellads d'inoltrar ina intervenziun al parlament federal; ina intervenziun cun la finamira d'essenzialisar e flexibilisar la legislaziun e l'applicaziun dal dretg sin plaun federal, sco che quai è vegnì fatg cun bainquant success en il Grischun.
Ultra da quai duai in program entaifer il chantun examinar la necessitad executiva, cun la finamira d'eliminar las cundiziuns e restricziuns memia concisas.

Cuira, ils 17 da zercladur 2004

Name: Trachsel, Bachmann, Barandun, Bühler-Flury, Casanova (Cuira), Cavigelli, Christ, Claus, Crapp, Donatsch, Feltscher, Giacometti, Hanimann, Hartmann, Hess, Jeker, Rizzi, Telli, Tuor, Vetsch, Wettstein, Zegg, Guetg

Session: 17.06.2004
Vorstoss: rg Auftrag


Resposta da la regenza

La regenza enconuscha las consequenzas negativas ch'ina legislaziun federala memia excessiva po avair per il svilup economic gist en ils territoris perifers sco il chantun Grischun. Là, nua ch'igl è necessari e pussaivel, s'engascha ella perquai gia oz energicamain per ina legislaziun federala concisa, saja quai en la conferenza da las regenzas chantunalas u er a chaschun da contacts bilaterals cun la confederaziun, sco per exempel en il rom da las consultaziuns davart projects federals. La regenza vegn sa chapescha a cuntinuar cun questas stentas. En il rom d'ina da las scuntradas regularas cun las commembras ed ils commembers da la delegaziun grischuna en las chombras federalas è ella er pronta da preschentar la dumonda da la cumissiun d'introducir sin plaun federal in project analog a l'EFLAD en il Grischun. Perencunter na la para in program spezial entaifer il chantun per examinar la necessitad executiva, sco che la cumissiun pretenda, betg necessari. Cun exequir il dretg federal e chantunal sa dattan la regenza e l'administraziun numnadamain gia uss bregia da trair a niz consequentamain las libertads d'agir existentas en favur dal svilup economic.

Sin basa da questas explicaziuns è la regenza pronta d'acceptar l'incumbensa en il senn da las ponderaziuns.

Datum: 31 d'avust 2004