Navigation

Inhaltsbereich

Dumonda Montalta concernent plazzas da guntgida per camiuns tranter La Punt e Glion

Sessiun: 17.06.2004
L'onn 2007 vegn il sviament da Flem a pudair vegnir surdà al traffic. Cun quella surdada vegn in'ulteriura stretga vers la Surselva guntgida tras in tunnel. Ils abitants da la Surselva èn cuntents cun quai, perquai ch'il temp da viadi vegn segiramain reducì. Tuttina vegn in fatg dentant resguardà bler memia pauc. I n'è numnadamain betg vegnì pensà al traffic pesant che serpegia mintga di sur il culm ed impedescha il traffic, pervia ch'i na dat betg plazzas da guntgida.

Tar il tunnel da Trin datti ina plazza da guntgida. Quella è dentant vairamain previsa sco sortida d'urgenza (lingia da segirezza nuninterrutta) e na dastgass betg vegnir duvrada sco plazza d'untgida.

Tar il tunnel da Flem che vegn construì actualmain na vegn questa circumstanza insumma betg resguardada, pertge tenor il scleriment da la direcziun da construcziun locala n'èn planisadas plazzas da guntgida ni tar il portal vers vest ni tar il portal vers ost. Quai vul pia dir ch'il traffic cula puspè main bain, perquai ch'oz exista numnadamain ina plazza d'untgida a l'entrada da Flem vest.

Cun paucs meds finanzials pudessan las fermadas per autos da posta a Caltgera, Staderas ed Auas Sparsas sco er las plazzas da guntgida tar il tunnel da Trin vegnir adattadas uschia, ch'il traffic pesant pudess porscher als auters participants dal traffic ina pussaivladad da passar. En la resposta da la regenza a l'interpellaziun Dermont dals 9 d'october 2001 statti scrit:

Il mantegniment necessari ed eventualmain ina correcziun moderada stattan pia er en vista a la meglieraziun da la circulaziun dal traffic....
Tge quinta la regenza da far per meglierar la situaziun da traffic sin il traject da La Punt a Glion?

Cuira, ils 17 da zercladur 2004

Name: Montalta, Dermont, Caviezel (Pitasch), Bachmann, Beck, Berther (Mustér), Berther (Sedrun), Bleiker, Brunold, Bundi, Büsser, Cahannes, Capaul, Casanova (Vignogn), Cavegn-Kaiser, Caviezel (Tusaun), Cavigelli, Christoffel, Claus, Dudli, Farrér, Fasani, Fleischhauer, Göpfert, Gredig-Hug, Hardegger, Jeker, Jenny, Joos-Buchli, Lemm, Maissen, Mani-Heldstab, Märchy-Michel, Parolini, Pedrini, Peyer, Pfister, Plozza, Portner, Quinter, Righetti, Sax, Schmid, Schütz, Stiffler, Stoffel, Telli, Trachsel, Tscholl, Tuor, Vetsch, Zanetti, Alig, Guetg, Hartmann (Cuira), Jecklin, Mainetti, Nay

Session: 17.06.2004
Vorstoss: rg Anfrage


Resposta da la regenza

Camiuns pesants che charreschan mo plaun impedeschan il moviment dal traffic e mainan adina puspè a surpassaments privlus. Quai vala per tut las vias da muntogna ed uschia er per il traject La Punt Flem Glion. Plazzas da guntgida muntan ina solaziun pussaivla per mitigiar quest problem.

En connex cun il postulat Claus dals 22 da schaner 2001 ha l'uffizi da construcziun bassa dal Grischun examinà ensemen cun la polizia chantunala grischuna tut las vias principalas pertutgant plazzas da guntgida ch'existan e che vegnan en dumonda. Mo otg plazzas han ademplì las directivas davart la tecnica da segirtad ed han pudì vegnir signalisadas correspundentamain senza che adattaziuns architectonicas avessan stuì vegnir fatgas. Il signal "plazza da guntgida" (sig. 4.15) inditgescha plazzas, sin las qualas vehichels che charreschan plaun ston sviar ora, per facilitar il surpassament a vehichels pli svelts. Ina plazza da guntgida sto esser almain uschè gronda ch'in camiun cun char annex possia bandunar la via e turnar puspè senza problems. Per motivs da segirezza sto ultra da quai vegnir renunzià da far plazzas da guntgida en curvas.

Dal traject La Punt Flem ademplescha mo ina plazza da guntgida las disposiziuns da segirtad necessarias. I sa tracta qua da la plazza da guntgida "Val Maliens" tranter Tumein e Trin. En vista a las relaziuns localas n'han betg pudì vegnir signalisadas autras plazzas sco plazzas da guntgida uffizialas. Las distanzas da vista minimalmain necessarias per bandunar las plazzas respectivas n'èn betg avant maun.

Ultra da quai han las experientschas fatgas fin ussa mussà cleramain che las plazzas da guntgida, che stattan actualmain a disposiziun, vegnian duvradas mo darar da vehichels che charreschan plaun. Motivs pussaivels per quest fatg dastgassan esser las relaziuns localas sco la pendenza da la via e la situaziun da la plazza da guntgir, però betg sco davos er l'interrupziun dal temp da viadi e la perdita da temp.

Pervi da l'impurtanza da la via sursilvana per l'avertura da la Surselva è la regenza pronta d'incumbensar l'uffizi da construcziun bassa e la polizia chantunala grischuna d'examinar las plazzas da guntgida ch'èn vegnidas enumeradas en la dumonda sco er ulteriuras plazzas da guntgida pussaivlas che adempleschan las pretensiuns respectivas per camiuns ed eventualmain da realisar ellas pass per pass ed en il rom dals meds finanzials che stattan a disposiziun.

Datum: 6 da fanadur 2004