Navigaziun principala

Cuntegn da la pagina

Incumbensa Feltscher concernent l'undraziun da la lavur voluntara

sessiun: 17.06.2004
Avant trais onns ha l'onn internaziunal da las voluntarias e dals voluntaris, proclamà da l'ONU, rendì attent a la lavur immensa e nunpajabla da milliuns da Svizras e da Svizzers. 40 % da las Svizras e dals Svizzers prestan lavur voluntara. Quai èn 500 milliuns uras lavur en favur da la societad. Per quai èn vegnids postulads l'onn 2001 indemnisaziuns, attests socials e scolaziun gratuita. En la resposta a l'interpellaziun Cavegn dal 1-6-2001 ha la regenza menziunà: "A la lavur voluntara en tut ils secturs da la societad attribuescha la regenza ina gronda impurtanza. En il rom da la basa legala e dals meds finanzials sustegna ella activitads correspundentas." Tge è vegnì realisà? Fitg pauc! Per il solit mancan ils meds finanzials.

Bleras conburgaisas e blers conburgais che tgiran gratuitamain persunas malsaunas ed uffants pitschens, che prestan voluntarmain lavur sociala, che instrueschan giuvenils en il sport ed en la musica, che mainan uniuns, che fan lavur culturala, che tgiran la natira e.u.v., fan quai or da persvasiun interna e na pretendan nagina indemnisaziun finanziala. Tras lur lavur per la publicitad èn els dentant savens er suttamess a critica. Tenor nossa opiniun han els almain il dretg d'ina renconuschientscha publica. La confederaziun, ils chantuns, las vischnancas e las instituziuns surdattan premis da daners per prestaziuns spezialas en la cultura, en il sport ed en la scienzia. Na fissi betg er inditgà da renconuscher moralmain prestaziuns spezialas en la lavur voluntara? La renconuschientscha duess avair in effect sin la societad ed esser effizienta. Indemnisaziuns finanzialas n'èn strusch realisticas, ina renconuschientscha morala però è realisabla e savens pli efficazia che daners.

Ina tala renconuschientscha pudess vegnir exprimida tras in document suttascrit da la regenza e tras ina gluva correspundenta dal chantun. La dumonda pudess vegnir inoltrada a la regenza tras las autoritads communalas e regiunalas sco er tras las federaziuns chantunalas. Las dumondas stuessan vegnir giuditgadas tenor in reglament unifitgà che avess da fixar las premissas per ina renconuschientscha chantunala per la "lavur voluntara". Il dretg d'ina tala renconuschientscha duess vegnir fatg dependent da la durada e da l'engaschament spezial. La surdada da la renconuschientscha pudess succeder a chaschun d'ina occurrenza regiunala u communala adattada, e quai tras la proponenta ensemen cun ina commembra u cun in commember da la regenza u dal parlament.

I dovra la voluntariadad per che la cultura en las vischnancas e per che nossa societad funcziunian. Nus supplitgain la regenza d'elavurar in program da renconuschientscha correspundent sco er in reglament respectiv per "prestaziuns spezialas en la lavur voluntara" e d'organisar la surdada da la renconuschientscha.

Cuira, ils 17 da zercladur 2004

Name: Feltscher, Cavegn, Märchy-Michel, Bär, Baselgia-Brunner, Bucher, Bundi, Büsser, Casanova (Vignogn), Casanova (Cuira), Caviezel (Pitasch), Caviezel (Tusaun), Cavigelli, Christ, Crapp, Donatsch, Dudli, Fallet, Fasani, Federspiel, Frigg, Hanimann, Hartmann (Champfèr), Hess, Jäger, Jeker, Jenny, Joos-Buchli, Koch, Krättli-Lori, Lemm, Loepfe, Maissen, Mani-Heldstab, Meyer-Grass (Claustra), Meyer Persili (Cuira), Mengotti, Michel, Parpan, Pfister, Portner, Robustelli, Schmid, Telli, Trachsel, Tremp, Zanetti, Zegg, Alig, Caviezel (Cuira), Valär

Session: 17.06.2004
Vorstoss: rg Auftrag


Resposta da la regenza

Dapi l'onn internaziunal da las voluntarias e dals voluntaris, proclamà da l'ONU (2001), e suenter che la regenza ha respundì a l'interpellaziun Cavegn concernent la lavur voluntara dals 21 d'avust 2001, protocol nr. 1090, sco er acceptà la petiziun da la gruppa da lavur "onn da las voluntarias e dals voluntaris" ils 13 d'avust 2002, protocol nr. 1133, èn tscherts princips vegnids resguardads dapli e singulas mesiras vegnidas realisadas:

- Da princip vala ch'i vegn attribuì ina gronda impurtanza a la lavur voluntara en tut ils secturs da la societad. Activitads correspundentas vegnan sustegnidas en il rom da la basa legala e dals meds finanzials.

- Sch'ina persuna s'annunzia per ina plazza e per fixar il salari vegnan ultra da la scolaziun e da la carriera professiunala er resguardadas tar il chantun experientschas acquistadas ordaifer la professiun, sco per exempel en l'educaziun, en la tgira u en l'organisaziun. Il questiunari standardisà per ils discurs da preschentaziun è vegnì cumplettà cun ina rubrica correspundenta. En l'art. 17 da las disposiziuns executivas tar l'ordinaziun dal persunal (DERtOP) è vegnida integrada ina regulaziun correspundenta areguard la fixaziun da la categoria da salari.

- Sin dumonda vegn (per part) concedì a las collavuraturas ed als collavuraturs da l'administraziun chantunala in congedi pajà per lavurs voluntaras en il sectur social, cultural e politic, ma er en il sectur da sport e giuventetgna.

- Las collavuraturas ed ils collavuraturs da l'administraziun chantunala èn vegnids fatgs attents da laschar confermar lur lavur voluntara. Uschia duai en general vegnir promovì d'emetter attests per la lavur voluntara.

En il sectur da la lavur voluntara è pia inqual chaussa vegnida messa sin via en il fratemp.

Cun l'incumbensa Feltscher qua avant maun vulan las sutsegnadras ed ils sutsegnaders en emprima lingia porscher ina renconuschientscha morala resp. sociala a conburgaisas ed a conburgais che prestan lavur voluntara en differentas organisaziuns privatas e publicas en favur da la societad. Er la regenza è da l'avis che bleras conburgaisas e blers conburgais che tgiran gratuitamain persunas malsaunas ed uffants pitschens, che prestan voluntarmain lavur sociala, che instrueschan giuvenils en il sport ed en la musica, che mainan uniuns, che fan lavur culturala e che tgiran la natira, fan quai or da persvasiun interna e na pretendan probablamain er nagina indemnisaziun finanziala per questas lavurs. In'autra furma da renconuscher questa lavur voluntara en favur da la generalitad sa lascha dentant giustifitgar senz'auter. La premissa per ina tala renconuschientscha sto dentant esser in engaschi extraordinari durant plirs onns. Ina proposta correspundenta sto succeder en scrit e sto vegnir documentada cleramain tras l'instanza che fa la proposta.

La regenza sustegna l'idea d'undrar la lavur voluntara. Ella è pronta d'elavurar in reglament per quest intent. Quest reglament duai reglar en furma concisa la renconuschientscha e la procedura da renconuschientscha. L'andament duai vegnir concepì en in rom modest ed efficazi ed ils custs da persunal correspundents per l'administraziun duain vegnir tegnids en terms stretgs. Quai è mo pussaivel, sch'i vegn per gronda part desistì da laschar examinar ils uffizis chantunals las propostas. En quest senn è la regenza pronta d'acceptar l'incumbensa.

Datum: 14 da settember 2004