Navigation

Inhaltsbereich

Incumbensa da fracziun da la PCD concernent l'imposiziun da taglia sin conjugals e sin famiglias

Sessiun: 17.06.2004
A la votaziun dal pievel dals 16 da matg 2004 è vegnì refusà cleramain er en il chantun Grischun il project ch'è vegnì numnà pachet fiscal, tenor il qual la legislaziun fiscala dal dretg federal avess stuì vegnir adattada en ils secturs da l'imposiziun da taglia sin famiglias, da l'imposiziun da taglia sin la proprietad d'abitaziuns e da la taxa da svieuta. En il rom da las debattas da votaziun e però er gia il mument ch'il cussegl grond è suandà la dumonda da la regenza per profitar dal referendum dals chantuns cunter quest project federal, èsi atgnamain stà incontestà ch'igl existia in basegn d'agir considerabel en il sectur da l'imposiziun da taglia sin conjugals e sin famiglias betg mo sin plaun federal, mabain cunzunt er sin plaun chantunal e communal.Pli datiers che la dumengia da votaziun vegniva e pli reservadas che las valitaziuns respectivas da la regenza daventan. La fracziun sutsegnada na parta betg questa posiziun ch'è daventada pli reservada.

Las structuras da famiglia èn stadas suttamessas a grondas midadas ils ultims decennis. En spezial è s'augmentada marcantamain p.ex. la rata d'activitad da gudogn er dal segund conjugal. L'introducziun eventuala da scolas dal di che n'è betg tema da questa incumbensa e che vegn a s'etablir tenor noss avis a vista mesauna, vegn ad accelerar quest process. Quai ed auters motivs han gì per consequenza che conjugals pon esser dischavantagiads fermamain en dumondas fiscalas cumpareglià cun pèrs en concubinat, e quai oz sco er en il futur. Il dretg vertent resguarda ultra da quai mo en moda limitada las grevezzas famigliaras, spezialmain ils custs d'uffants che creschan ad in crescher. Quai engrevgescha geniturs resp. parts da geniturs cun uffants cumpareglià cun persunas creschidas senza uffants en moda supplementara ed er smesirada dal puntg da vista fiscal.

Las sutsegnadas ed ils sutsegnads enconuschan e renconuschan las pretensiuns pendentas per ina distgargia en il sectur d'imposiziun da taglia sin interpresas, spezialmain a favur da las persunas giuridicas. Tenor la persvasiun da las sutsegnadas e dals sutsegnads sto quest giavisch perquai vegnir accordà cun il giavisch ch'è avant maun ed examinà ensemen cun quel cun la medema prioritad.

La fracziun da la PCD envida la regenza da suttametter il dretg fiscal dal Grischun ad ina revisiun parziala e da realisar latiers ina legislaziun favuraivla per famiglias e per conjugals spezialmain per ils suandants secturs:

1. chargia supplementara da conjugals cumpareglià cun pèrs en concubinat
La distgargia da conjugals ch'è actualmain insuffizienta cumpareglià cun pèrs en concubinat sto vegnir adattada cun mesiras commensuradas. La discussiun davart las metodas che stattan a disposiziun dastga sa drizzar tenor ils models che la cumissiun d'expertas e d'experts per l'imposiziun da taglia sin famiglias, ch'è vegnida installada dal departament federal da finanzas DFF, ha proponì. Sin basa da las enconuschientschas odiernas pon las sutsegnadas ed ils sutsegnads s'imaginar in splitting parzial u schizunt in splitting general sco model. La regulaziun vertenta (tariffa da conjugals envers tariffa da concubinat) cuntrafa da princip al dretg federal.

2. examinaziun da tut las deducziuns relevantas areguard ils uffants
La revisiun da la lescha sto tegnair quint en moda effizienta da las grevezzas famigliaras che creschan cuntinuadamain e tuttina resguardar ch'il sistem ed il dumber dals tips da deducziun sajan facilmain suandabels e restian a la fin finala tant per il pajataglià sco er per l'administraziun realisabels, e quai cun custs raschunaivels. Ultra d'in augment da la deducziun per uffants pensan las sutsegnadas ed ils sutsegnads concretamain ad in augment da la deducziun per la tgira d'uffants sco er ad in'examinaziun da la deducziun existenta per uffants en scolaziun, p.ex. ina graduaziun tenor classas da vegliadetgna e spezialmain er in augment da la deducziun dals custs da scolaziun d'uffants maiorens (q.v.d. sur 18 onns).

Cuira, ils 17 da zercladur 2004

Name: Cavigelli, Berther (Mustér), Berther (Sedrun), Biancotti, Bundi, Büsser, Cahannes, Capaul, Casanova (Vignogn), Cavegn, Crapp, Demarmels, Dermont, Fallet, Farrér, Fasani, Federspiel, Geisseler, Keller, Kleis-Kümin, Loepfe, Luzio, Maissen, Parpan, Pfister, Pozza, Portner, Quinter, Righetti, Sax, Schmid, Tremp, Tuor, Zanetti, Zanolari, Zarn, Zegg, Alig, Nay

Session: 17.06.2004
Vorstoss: rg Auftrag


Resposta da la regenza

La fracziun da la PCD dumonda la regenza da distgargiar pli ferm ils conjugals en cumparegliaziun cun pèrs en concubinat e d'examinar tut las deducziuns relevantas per uffants.

Gist suenter ch'il pachet fiscal 2001 da la confederaziun è vegnì refusà han las represchentantas ed ils represchentants dal departament da finanzas proponì en la cumissiun per economia, taxas e politica da stadi (CETPS) ch'i stoppia ussa vegnir fatga in'examinaziun generala dals differents problems e da las differentas pretensiuns. Questa proposta è vegnida acceptada da la CETPS e communitgada uschia al cussegl grond en la sessiun da zercladur. La regenza resguarda quest proceder sco raschunaivel ed efficazi. Las differentas pretensiuns duain vegnir rimnadas e quantifitgadas. Sch'ils documents correspundents èn avant maun, po vegnir concludì politicamain nua ch'ils accents duain vegnir tschentads. En questa examinaziun generala duain vegnir discutadas ultra da las taglias sin il gudogn e sin il chapital da las persunas giuridicas, da la taglia sin l'ierta per ils descendents directs e d'eventualas mesiras per domiciliar persunas natiralas bainstantas er la distgargia da conjugals e l'augment da las deducziuns relevantas per uffants. Ultra da la necessitad e da la giavischaivladad da mesiras da distgargia sto en quest connex er vegnir examinada spezialmain la dumonda da la finanziabladad.

La regenza è er da l'avis che l'imposiziun da taglia sin conjugals stoppia vegnir examinada. Ella è dentant da l'opiniun che las cumparegliaziuns da las chargias da las grondas gruppas da la populaziun q.v.d. da las persunas che vivan sulettas d'ina vart e dals conjugals da l'autra vart, stoppian en emprima lingia esser relevantas. In tractament totalmain egual da conjugals e da pèrs en concubinat en tut las constellaziuns imaginablas (pèrs cun gudogn singul e cun gudogn dubel; entradas grondas, mesaunas e pitschnas; pèrs cun e senza uffants) na vegn strusch ad esser pussaivel.

La regenza è er pronta d'examinar tut las deducziuns relevantas per uffants ed eventualmain da las augmentar u da las concepir da nov. La concepziun da las deducziuns sto en quest connex observar il rom che vegn determinà da la lescha d'armonisaziun da taglia. La lescha federala vertenta conceda als chantuns spezialmain en il sectur da las deducziuns per la tgira d'uffants e da las deducziuns da scolaziun mo pussaivladads da concepziun restrenschidas.

Sa basond sin las explicaziuns qua survart è la regenza pronta d'acceptar l'incumbensa en quel senn ch'ella vegn ad examinar la distgargia da conjugals e l'adattaziun da las deducziuns relevantas per uffants en il rom da l'examinaziun generala planisada.

Datum: 25 d'avust 2004