Navigaziun principala

Cuntegn da la pagina

Incumbensa da fracziun da la PPS concernent l'aboliziun da la taglia sin l'ierta per ils descendents directs

sessiun: 18.06.2004
Suenter ch'il pachet fiscal è vegnì refusà ston ins ussa tschertgar pussaivladads fiscalas attractivas. Gia ussa èn vegnidas fatgas pretensiuns per distgargiar la taglia en ils secturs famiglia ed imposiziun da taglia sin interpresas. Tenor la fracziun da la PPS na tanschi dentant betg d'agir unicamain en quests secturs. En il rom d'ina ponderaziun generala sto il dretg fiscal chantunal vegnir suttamess ad ina revisiun parziala er en il sectur da la taglia sin l'ierta.

La fracziun da la PPS è cunter mantegnair vinavant la taglia sin l'ierta per ils descendents directs, perquai che questa facultad vegn suttamessa a la taglia gia pliras giadas en il rom da la taglia sin las entradas e da la taglia sin la facultad. L'idea da la prevenziun tras spargnar ch'è preschenta tar burgaisas e burgais è ina part da l'atgna responsabladad da mintga singula persuna e na dastga betg vegnir chastiada. Las consequenzas negativas sentan ins ultra da quai fitg bain er sin il plaz economic Grischun . Gist per persunas bainstantas che abitan en noss chantun è la situaziun fiscala nuncuntentaivla e quai va savens uschè lunsch che quellas transfereschan lur facultad resp. lur scrittiras en il rom da las reglementaziuns dals descendents en auters chantuns, uschia ch'i va a perder a noss chantun anticipadamain substrat da taglia. Cun l'aboliziun da la taglia sin l'ierta per ils descendents directs pudess ins ultra da quai avair en mira da render il Grischun pli attractiv per dapli glieud che gudogna bain e posseda bler. Er per far avanzar e cuntinuar activitads d'interprendider fiss l'aboliziun da questa taglia da grond avantatg. Cun l'aboliziun da la taglia sin l'ierta per ils descendents directs pudess ins pia a lunga vista segir er evitar augments da taglia.

Per quests motivs dumonda la fracziun da la PPS la regenza da midar la lescha da taglia per il chantun Grischun uschia che la taglia sin l'ierta per ils descendents directs vegn abolida.

Cuira, ils 18 da zercladur 2004

Name: Vetsch, Beck, Bleiker, Butzerin, Casty, Caviezel-Sutter (Tusaun), Christoffel, Conrad, Dudli, Fleischhauer, Giovannini, Göpfert, Gredig-Hug, Hardegger, Heinz, Janom Steiner, Jeker, Lemm, Mani-Heldstab, Märchy-Michel, Montalta, Nigg, Parolini, Pedrini, Ratti, Stiffler, Stoffel, Trachsel, Campell, Jecklin, Mainetti

Session: 18.06.2004
Vorstoss: rg Auftrag


Resposta da la regenza

La fracziun da la PPS dumonda la regenza da midar la lescha da taglia per il chantun Grischun uschia che la taglia sin l'ierta per ils descendents directs vegn abolida.

Gist suenter ch'il pachet fiscal 2001 da la confederaziun è vegnì refusà han las represchentantas ed ils represchentants dal departament da finanzas proponì en la cumissiun per economia, taxas e politica da stadi (CETPS) ch'i stoppia ussa vegnir fatga in'examinaziun generala dals differents problems e da las differentas pretensiuns. Questa proposta è vegnida acceptada da la CETPS e communitgada uschia al cussegl grond en la sessiun da zercladur. La regenza resguarda quest proceder sco raschunaivel ed efficazi. Las differentas pretensiuns duain vegnir rimnadas e quantifitgadas. Sch'ils documents correspundents èn avant maun, po vegnir concludì politicamain nua ch'ils accents duain vegnir tschentads. En questa examinaziun generala duain vegnir discutadas, ultra da las taglias sin il gudogn e sin il chapital da las persunas giuridicas, da la distgargia da conjugals, da l'augment da las deducziuns relevantas per uffants e d'eventualas mesiras per domiciliar persunas natiralas bainstantas, er l'aboliziun da la taglia sin l'ierta per ils descendents directs. Ultra da la necessitad e da la giavischaivladad da mesiras da distgargia sto en quest connex er vegnir examinada spezialmain la dumonda da la finanziabladad.

L'incumbensa da fracziun parta en l'introducziun d'ina ponderaziun generala, tar la quala ins duai includer er l'aboliziun da la taglia sin l'ierta per ils descendents directs. En quest senn è la regenza pronta d'acceptar l'incumbensa.
Cun la pretensiun concreta d'abolir la taglia sin l'ierta per ils descendents directs anticipescha la fracziun da la PPS dentant il resultat da la ponderaziun generala giavischada. Questa incumbensa va per il mument memia lunsch e na po uschia betg vegnir acceptada da la regenza.

Sa basond sin las explicaziuns qua survart è la regenza pronta d'examinar l'aboliziun da la taglia sin l'ierta per ils descendents directs en il rom da la ponderaziun generala planisada.

Datum: 25 d'avust 2004