Navigation

Inhaltsbereich

Dumonda Loepfe concernent la reussida da las maturandas grischunas e dals maturands grischuns tar il test da qualificaziun per il studi da medischina

Sessiun: 24.08.2004
Tenor ils resultats dals tests da qualificaziun per il studi da medischina da maturandas e da maturands dals onns 1998 2003 ch'èn vegnids publitgads dacurt sa chattan las Grischunas ed ils Grischuns sin il rang 16 da 20 chantuns. L'expressivitad po vegnir resguardada sco garantida tar 5000 scolaras e scolars ch'èn vegnids examinads.

Tenor il rapport dal test na permettian quests resultats nagina valitaziun da la scolaziun, perquai ch'il test saja plitgunsch independent da l'instrucziun scolastica. Plinavant na sajan ils resultats betg represchentativs per conclusiuns areguard in'evaluaziun cumplessiva e regiunala da las instituziuns da furmaziun e da las vias da furmaziun. Tuttina ha Hans Peter Märchy, rectur da la scola chantunala grischuna e manader da l'uffizi per las scolas medias, numnà en la pressa quotidiana grischuna quest resultat sco in input interessant ch'ins stoppia prender serius e che stoppia vegnir analisà detagliadamain.

Las sutsegnadras ed ils sutsegnaders partan las constataziuns restrictivas dal rapport dal test mo cun resalvas. Tenor nossa opiniun permetta il rapport dal test la constataziun ch'il Grischun haja proporziunalmain main maturandas e maturands che auters chantuns ch'èn adattadas u adattads per il studi da la medischina umana u veterinara. Ultra da la qualitad da la furmaziun pon en quest connex giugar ina rolla er circumstanzas socialas e culturalas.

En sia resposta sin il postulat Arquint concernent l'augment da la quota da maturitad en il Grischun dals 27 da schaner 2001 scriva la regenza tranter auter: "La finamira da la maturitad gimnasiala è quella da furnir la basa per reussir in diplom ad ina universitad u ad ina scola politecnica federala. Schebain ch'il diplom reussì vegn influenzà da fitg differents facturs, sa chattavan fin uss las quotas dals diploms universitars da las absolventas e dals absolvents da la scola chantunala grischuna sur la media svizra."

Las sutsegnadras ed ils sutsegnaders dumondan perquai la regenza:

1. Datti ulteriurs tests cumparativs davart la qualificaziun per il studi d'autras professiuns academicas che pon eventualmain vegnir consultads sco cumplettaziun da l'evaluaziun da la furmaziun da scola media grischuna en confrunt cun auters chantuns?

2. È gia avant maun in'analisa pli detagliada dals resultats dal test numnà ed eventualmain d'auters tests?
Sche gea, tge resultats han pudì vegnir obtegnids da quellas analisas?
Sche na, cura ha la regenza l'intenziun da far e da terminar in'analisa correspundenta?

3. Po la regenza generalisar per tut las scolas medias dal Grischun la constataziun ch'ella ha fatg l'onn 2001 davart la quota da studis terminads ed er confermar quella trais onns pli tard?

4. È la regenza er da l'avis da las sutsegnadras e dals sutsegnaders che tals "benchmarks" che cumpareglian ils chantuns in cun l'auter e che sa refereschan a la professiun èn impurtants en l'avegnir per giuditgar las consequenzas da midadas da la furmaziun da scola media? Vegn ella a s'engaschar en il rom da la CDEP per la creaziun da "benchmarks" adattads?

Cuira, ils 24 d'avust 2004

Name: Loepfe, Claus, Caviezel (Tusaun), Arquint, Augustin, Bischoff, Casty, Cavegn-Kaiser, Cavigelli, Christoffel, Conrad, Demarmels, Donatsch, Dudli, Fasani, Feltscher, Frigg-Walt, Geisseler, Hardegger, Hess, Jäger, Janom Steiner, Krättli-Lori, Luzio, Maissen, Meyer-Grass (Claustra), Michel, Parolini, Perl, Pfiffner, Portner, Robustelli, Tomaschett, Trachsel, Tremp, Zanetti, Zarn, Caviezel (Cuira), Candinas, Hartmann (Cuira), Gartmann

Session: 24.08.2004
Vorstoss: rg Anfrage


Resposta da la regenza

La dumonda concernent la reussida da las maturandas grischunas e dals maturands grischuns sa referescha a l'artitgel da la "Sonntagszeitung" dals 15 d'avust 2004.

La rangaziun ch'è vegnida fatga da la "Sonntagszeitung" sa basa sin las datas dal rapport davart la realisaziun ed ils resultats dal test da qualificaziun per il studi da medischina dal center per il svilup da tests e la diagnostica da l'universitad da Friburg. En la prefaziun da la tabella cun ils resultats dal test haja num: "Quels na permettan sco punctuà in pèr giadas nagina valitaziun da la scolaziun, perquai ch'il test è plitgunsch independent da l'instrucziun scolastica e las candidatas ed ils candidatas n'èn betg repeschentativs per las maturandas e per ils maturands."

Las singulas dumondas sa laschan respunder sco suonda:

1. Cun excepziun dal test da qualificaziun per il studi da medischina na datti nagins tests cumparegliabels. En cas dal test da qualificaziun per il studi da medischina stoi plinavant vegnir resguardà ch'il test vegn applitgà mo per las universitads da lingua tudestga. Perquai na po el er betg vegnir duvrà per cumparegliaziuns naziunalas.

2. Il center per il svilup da tests e la diagnostica da l'universitad da Friburg è vegnì incumbensà dal chantun Grischun da far in'analisa pli detagliada dals resultats da quel test. Quella analisa n'è anc betg disponibla.

3. Sin basa da las ultimas datas che stattan a disposiziun da l'onn 2002 (uffizi federal da statistica, mars 2004) sa chatta la quota da studis terminads da las maturandas e dals maturands da la scola chantunala grischuna da las annadas 1993 e 1994 sur la media svizra e chantunala. Qua sto vegnir menziunà che la media chantunala sa chatta datiers da la media svizra.

4. Benchmarks permettan er al sectur da la scola media da cumparegliar las prestaziuns scolasticas. In concept naziunal n'exista actualmain betg ed i na stattan er betg a disposiziun las resursas finanzialas e persunalas correspundentas.

Datum: 3 da november 2004