Navigaziun principala

Cuntegn da la pagina

Dumonda Loepfe concernent la finanziaziun da la scolaziun speziala suenter l'introducziun da la RFI

sessiun: 19.10.2004
Ils 28 da november votescha il pievel svizzer davart la refurma da la gulivaziun da finanzas e da la repartiziun da las incumbensas tranter la confederaziun ed ils chantuns (RFI). Las sutsegnadras ed ils sutsegnaders partan dal fatg che las midadas correspundentas da la constituziun vegnian acceptadas.

En consequenza dal detretschament da las incumbensas surpiglian ils chantuns sulets la responsabladad organisatoria e finanziala per il sectur da la scolaziun speziala. La AI sa retira da la finanziaziun da las prestaziuns individualas e collectivas da la scolaziun speziala. Sco soluziun transitoria vegnan ils chantuns obligads da surpigliar tut las prestaziuns da fin uss da la AI vi da la scolaziun speziala, fin ch'els disponan da concepts da scolaziun speziala ch'èn approvads dal chantun, almain dentant durant trais onns.

A chaschun da l'ultima revisiun parziala da la lescha d'impedids (PCG 5 | 1999/2000, paginas 967 ss.) han la regenza ed il cussegl grond gia anticipà che las contribuziuns chantunalas sajan independentas da la confederaziun. En vista a l'introducziun da la RFI è cun il nov artitgel 21a vegnida dada a la regenza la pussaivladad da relaschar reglamentaziuns davart las prestaziuns che ston vegnir furnidas, davart l'approvaziun da preventivs e da plans da plazzas, davart la fixaziun dals custs imputabels sco er davart las contribuziuns che ston vegnir pajadas. Cun il nov alinea 3 da l'artitgel 29 è vegnida creada la pussaivladad ch'il chantun paja contribuziuns da gestiun ad instituziuns che realiseschan mesiras pedagogic-terapeuticas. En ina decleraziun protocollara da cusseglier guvernativ Claudio Lardi è vegnì menziunà che la regenza ed il departament prevesian da pajar contribuziuns chantunalas per las mesiras pedagogic-teraupeuticas suenter l'introducziun da la RFI. Quellas contribuziuns sajan cumparegliablas cun las contribuziuns actualas da la confederaziun e dal chantun. I na saja betg previs da reducir las contribuziuns.

En quest connex dumondan las las deputadas sutsegnadras ed ils deputads sutsegnaders la regenza:

1. Exista ina planisaziun areguard il proceder ed il temp per elavurar e relaschar regulaziuns da finanziaziun che conretiseschan en spezial ils artitgels 21a e 29 da la lescha d'impedids e che garanteschan la finanziaziun dal sectur da la scolaziun speziala suenter la scadenza dal termin transitori da trais onns per introducir la RFI?

2. Vegnan questas regulaziuns elavuradas sco part dal concept per la scola speziala che vegn empermess en la resposta a l'interpellaziun Loepfe dals 19 da favrer 2002, e consequentamain preschentads l'onn da scola 2005/2006 confurm a la resposta a la dumonda Feltscher dals 16 da mars 2004?

3. È la decleraziun protocollara da la regenza en connex cun la revisiun parziala da l'artitgel 29 da la lescha d'impedids anc adina valaivla, numnadamain ch'il chantun na prevesia betg da reducir las contribuziuns a las mesiras pedagogic-teraupeuticas?

4. Sa considerescha la regenza sco abla da pudair dar ina decleraziun correspundenta per las contribuziuns da construcziun e da gestiun a las instituziuns da la scolaziun speziala?

Cuira, ils 19 d'october 2004

Name: Loepfe, Zindel, Hardegger, Baselgia, Bucher, Christ, Christoffel-Casty, Demarmels, Farrér, Fasani, Feltscher, Frigg, Jaag, Jäger, Jenny, Joos-Buchli, Keller, Kleis-Kümin, Koch, Luzio, Meyer-Grass (Claustra), Noi, Parolini, Pfenninger, Pfiffner, Portner, Quinter, Righetti, Sax, Schmid, Schütz, Tomaschett, Tremp, Trepp, Zanetti, Zanolari, Candinas, Caviezel, (Cuira), Monigatti, Nay

Session: 19.10.2004
Vorstoss: rg Anfrage


Resposta da la regenza

Sch'il pievel ed ils chantuns acceptan ils 28 da november 2004 la refurma da la gulivaziun da finanzas e da la repartiziun da las incumbensas tranter la confederaziun ed ils chantuns (RFI), vegnan ils chantuns previsiblamain a partir dal 1. da schaner 2008 ad esser sulets cumpetents per l'organisaziun e la finanziaziun da la scolaziun speziala, q.v.d. senza collavuraziun da la confederaziun resp. da l'uffizi federal da las assicuranzas socialas (UFAS). Quai signifitgescha ch'il chantun Grischun sto sviluppar en in emprim pass concepts per la scolaziun speziala e per las mesiras pedagogic-terapeuticas. Quels han probablamain da prender resguard sin standards interchantunals che ston anc vegnir determinads. Ils concepts vegnan a cumpigliar tant aspects pedagogics sco er finanzials.

En la missiva dal december 1999 per la revisiun parziala da la lescha davart la promoziun da persunas cun impediments ha la regenza explitgà ch'il chantun vegnia a s'orientar en il proxim futur vi da las normas e vi da la pratica dal UFAS. Suenter ina eventuala retratga dal UFAS dal sectur da la scolaziun speziala veglian ins sa drizzar tenor ils standards naziunals. Vi da questa tenuta n'è sa midà da princip nagut en il fratemp. Las mesiras da spargn en il sectur da la scolaziun speziala concludidas dal cussegl grond vegnan realisadas senza restrenscher questa tenuta da basa.

En il rapport davart il program da la regenza ed il plan da finanzas per ils onns 2005  2008 figurescha la promoziun da l'integraziun d'uffants cun impediments sco punct central da svilup nr. 6/14. Cun surdar ina lavur da concept per promover l'integraziun a la scola auta interchantunala da pedagogia curativa a Turitg (HfH) la stad 2004 ha il departament fatg in pass impurtant en questa direcziun. La HfH vegn ad elavurar per il chantun Grischun en stretga collavuraziun cun l'uffizi per la scola populara ed il sport fin la stad 2005 in concept general per l'integraziun cumplessiva d'uffants e da giuvenils cun basegns spezials. Suenter che la lavur da concept è terminada, èsi previs da prender per mauns ils concepts da detagl ch'èn necessaris per las dumondas pedagogicas e finanzialas.

La regenza respunda las singulas dumondas sco suonda:

Tar 1: In urari da proceder ed in plan general existan. Tenor quel vegn elavurà in concept general fin la stad 2005. Igl è planisà da dar alura l'incumbensa dad elavurar ils concepts da detagl per la scolaziun speziala che duai succeder l'onn da scola 2005/06. Quels vegnan a cumpigliar tant aspects pedagogics sco er finanzials. En quest connex ston vegnir sviluppadas regulaziuns da finanziaziun tant per la scolaziun speziala separativa sco er per la scolaziun speziala integrativa.

Tar 2: Las regulaziuns menziunadas vegnan sviluppadas en il rom dals concepts da detagl menziunads qua survart e dastgassan pia esser avant maun previsiblamain l'atun 2006. Quant lunsch che quai succeda expressivamain en in "concept per la scola speziala", sto per il mument anc vegnir laschà avert.

Tar 3: Las explicaziuns correspundentas davart l'intenziun da la regenza constattan anc adina. I sto però vegnir rinvià che respostas definitivas vegnan sviluppadas sin basa da las lavurs da concept actualas.

Tar 4: La finanziaziun dal sectur da la scolaziun speziala na duai en il Grischun da princip betg pertschaiver donns pervi da la RFI. Tenor la lescha d'impedids vertenta èsi garantì che contribuziuns da construcziun e da gestiun a las instituziuns da las scolas spezialas vegnan pajadas en il rom dals credits che ston vegnir approvads dal cussegl grond er, sche la RFI vegn acceptada. Il punct central da svilup per promover l'integraziun po però chaschunar ch'in bel di è pussaivel en il Grischun in auter gener da scolaziun speziala per uffants cun impediments. In spustament da las contribuziuns a la scolaziun speziala en il sectur da la scola populara na po perquai actualmain betg vegnir exclus or da quest punct da vista.

Datum: 2 da november 2004