Navigaziun principala

Cuntegn da la pagina

Dumonda Fasani concernent ina restricziun da rimnar bulieus durant la chatscha auta

sessiun: 19.10.2004
La chatscha auta dura dals 9 fin ils 30 da settember ed il temp per rimnar bulieus dals 10 fin ils 30 da settember. Il fatg, che questas duas activitads pon vegnir pratitgadas il medem mument, chaschuna blers problems per quellas chatschaduras e per quels chatschadurs da patenta che van a chatscha sin il territori chantunal.
Pervi da las bleras reclamaziuns da las chatschaduras e dals chatschadurs da la Val Mesauc e da la Val Calanca schebain ch'il problem è segiramain enconuschent en tut las regiuns dal chantun e po vegnir extendì sin tut quellas vulain nus menziunar in pèr puncts essenzials. Il punct il pli impurtant e che na dastga betg vegnir sutvalità è la ristga per las chatschaduras e per ils chatschadurs da sajettar per svista e cumplainamain per casualitad persunas che passan tras il guaud sin tschertga da bulieus.
Nus na dastgain er betg emblidar la finamira e l'incumbensa da la chatscha grischuna che garantescha effectivs sauns ed adattads a las relaziuns localas sco er ina buna regulaziun da la repartiziun sin l'entir territori.
Però, tut quests princips sauns crodan il settember e la selvaschina na po betg pli giudair il ruaus necessari. Er ils interess da la selvicultura e da l'agricultura èn periclitads.
Pervi da la preschientscha pli gronda d'umans en il territori na vegnan da l'autra vart er betg resguardadas las disposiziuns chantunalas e federalas davart la protecziun da las plantas, da la flora e dals bulieus.

Suenter questas explicaziuns preliminaras ans drizzain nus cun las suandantas dumondas a la regenza:

1. Enconuscha la regenza quest problem en general ed è ella en spezial conscienta da la ristga per la chatschadura grischuna e per il chatschadur grischun durant il temp dals 10 fin ils 30 da settember?

2. N'è la regenza betg er da l'avis che las chatschaduras ed ils chatschadurs grischuns duessan suenter avair cumprà la patenta pudair ir a chatscha tenor las prescripziuns e senza ch'ils guauds èn plains da persunas che rimnan bulieus?

Cuira, ils 19 d'october 2004

Name: Fasani, Keller, Noi, Righetti, Toschini

Session: 19.10.2004
Vorstoss: rg Anfrage


Resposta da la regenza

Tenor l'art. 699 dal cudesch civil svizzer (CCS) dals 10 da december 1907 èsi permess a mintgin dad ir per guauds e pastgiras sco er da tschertgar pumaraida selvadia e bulieus en la dimensiun da l'isanza locala. Igl è renconuschì en general che las restricziuns dal dretg d'access per proteger bulieus relaschadas en il chantun Grischun tegnan quint da questa disposiziun. Ulteriuras restricziuns, p.ex. colliadas cun in scumond dad ir per guauds e pastgiras durant trais emnas, na fissan perencunter betg cumpatiblas cun l'art. 699 CCS.

Cun la lescha davart la protecziun da las plantas e dals bulieus dals 8 da zercladur 1975 duai vegnir garantida la protecziun dals bulieus e betg quella da las persunas che rimnan bulieus. I va per il mantegniment da la flora da bulieus. Quai vegn garantì cun las disposiziuns actualas ed è renconuschì scientificamain. In temp da schanetg da trais emnas durant il settember n'è betg necessari dal puntg da vista da la protecziun dals bulieus. Vitiers vegn anc che las disposiziuns grischunas per la protecziun dals bulieus èn coordinadas cun quellas dals chantuns vischins Glaruna e Son Gagl. Dal puntg da vista da la regenza n'exista er nagin basegn da spustar il scumond da rimnar bulieus il mais da settember. I sto tuttavia vegnir dubità, sche quai chattass il consentiment unanim da las chatschaduras e dals chatschadurs, sch'i vegniss per exempel rimnà bulieus il cumenzament da settember ed uschia curt avant il cumenzament da la chatscha auta.

Tenor la legislaziun da chatscha federala e chantunala ston la singula chatschadura ed il singul chatschadur sa persvader avant che sajettar ch'els na pericliteschan naginas persunas. Uschia sto il chatschadur tenor l'art. 15 al. 2 da la lescha chantunala da chatscha tranter auter sa persvader avant che sajettar ch'ina periclitaziun d'umans e da proprietad da terzas persunas saja exclusa. Sin basa da questa situaziun giuridica na po betg vegnir spetgà da las persunas che rimnan bulieus ch'ellas ston sa render en segirezza pervi d'ina periclitaziun pussaivla tras la part da la populaziun che va a chatscha. Questa periclitaziun n'exista dal rest betg mo per las persunas che rimnan bulieus, anzi, ins stuess er scumandar durant la chatscha da viandar, dad ir cun velo e da pratitgar autras activitads en il guaud e sin las pastgiras. Quai n'avess segir nagin effect positiv per il turissem!

Respostas a las dumondas:

1. La regenza na po betg enconuscher il problem che vegn descrit en general en la dumonda e spezialmain betg la ristga per la chatschadura grischuna e per il chatschadur grischun. Sch'i dess propi in problem, vesess la regenza dal rest plitgunsch ina ristga per las persunas che rimnan bulieus che per las persunas che van a chatscha.

2. La regenza n'è betg da l'avis da las interpellantas e dals interpellants. I n'è er betg l'incumbensa da las disposiziuns per proteger ils bulieus da procurar per quietezza en il guaud durant la chatscha.

Datum: 6 da schaner 2005