Navigation

Inhaltsbereich

Dumonda Jeker concernent impuls per occupar meglier las abitaziuns da vacanzas

Sessiun: 19.10.2004
Il chantun Grischun ha in grond dumber d'abitaziuns da vacanzas. Ca. 40 % da tut las pernottaziuns turisticas vegnan generadas en las abitaziuns da vacanzas, las cifras da las pernottaziuns regredeschan dentant pli e pli. Ils motivs èn differents. L'impurtanza strategica dal sectur da las abitaziuns da vacanzas è gronda:
purschida cumplementara als hotels la pli impurtanta,
gronda impurtanza per l'entira valur agiuntada d'ina destinaziun,
pitga dal turissem da stad e d'enviern la pli impurtanta,
contribuziun decisiva per animar la destinaziun,
pussaivladad excellenta per sa profilar en il segment da famiglia e
buna cumpetitivitad dals pretschs sin plaun naziunal/internaziunal.
Il seco ha lantschà l'onn 2003 l'offensiva da las abitaziuns da vacanzas en Svizra. En coordinaziun cun il seco s'occupa il forum economic dal Grischun medemamain da questa tematica, e quai cun la finamira da concretisar mesiras per occupar meglier las abitaziuns da vacanzas.
En differents districts da las Alps franzosas ha pudì vegnir dauzà il grad d'utilisaziun dals letgs da las abitaziuns da vacanzas, tranter auter cun professiunalisar il management dals letgs, cun meglierar la qualitad da las abitaziuns e cun dar impuls fiscals.
Il martgà da las abitaziuns da vacanzas en il Grischun cuntegna anc bler potenzial che na vegn anc betg tratg a niz. Ins sto pudair affittar dapli abitaziuns e l'occupaziun insuffizienta da las abitaziuns da vacanzas affittadas demussa il basegn d'agir per cuntanscher ina commerzialisaziun professiunala ed in sistem da reservaziun simpel.
L'incarica da prestaziun da Grischun vacanzas vegn elavurada. Ina revisiun da la lescha da taglia vegn preparada. En quest senn dumandain nus la regenza:

1. È er la regenza da l'avis ch'il martgà da las abitaziuns da vacanzas saja fitg impurtant per il Grischun?

2. È er la regenza da l'avis ch'il martgà da las abitaziuns da vacanzas cuntegnia anc bler potenzial che na vegn anc betg tratg a niz?

3. È er la regenza da l'avis ch'ins stoppia prender vastas mesiras per cuntanscher a lunga vista ina meglra occupaziun da las abitaziuns da vacanzas?

4. È la regenza pronta per incarica da prestaziun da Grischun vacanzas da postular mesiras che servan a professiunalisar il management dals letgs en las regiuns?

5. È la regenza pronta en il rom da la proxima revisiun da la lescha chantunala da taglia d'examinar e da proponer impuls fiscals per possessuras e possessurs d'abitaziuns resp. da chasas da vacanzas che affittan u che laschan affittar lur object da vacanzas en moda professiunala?

6. È la regenza da l'avis che intervenziuns en il dretg privat daventian necessarias per meglierar l'occupaziun da las abitaziuns da vacanzas?

7. Tge po e vul la regenza anc far per meglierar l'occupaziun da las abitaziuns da vacanzas?

Cuira, ils 19 d'october 2004

Name: Jeker, Hartmann (Champfèr), Berther (Sedrun), Arquint, Bleiker, Büsser, Casty, Christoffel-Casty, Conrad, Crapp, Donatsch, Feltscher, Frigg, Göpfert, Hess, Hübscher, Jaag, Jäger, Loepfe, Luzio, Maissen, Mani-Heldstab, Märchy-Michel, Michel, Montalta, Nigg, Parolini, Pedrini, Pfenninger, Portner, Righetti, Rizzi, Schütz, Stiffler, Tramèr, Trepp, Vetsch, Wettstein, Zanolari, Zegg, Monigatti
Session: 19.10.2004
Vorstoss: rg Anfrage


Resposta da la regenza

1. Il Grischun ha passa 48'000 abitaziuns secundaras cun circa 180'000 letgs. La statistica da la parahotellaria (chasas ed abitaziuns da vacanzas, campadis, alloschis per gruppas e.u.v.) cumprova circa 6 milliuns pernottaziuns, pia gist uschè bleras sco l'hotellaria. L'impurtanza dal martgà da las abitaziuns da vacanzas per il turissem grischun è senza dubi gronda. Ultra da quai han las abitaziuns da vacanzas ina impurtanza considerabla per l'economia da construcziun e per l'ulteriur mastergn.
En il suandant sa restrenschan las explicaziuns sin il martgà da las abitaziuns da vacanzas en il senn da l'occupaziun e da la locaziun d'abitaziuns da vacanzas.

2. En tut l'economia da turissem datti grondas surcapacitads; quai vala er per il sectur da las abitaziuns da vacanzas. La dumonda è cun excepziun d'in pèr periodas classicas cun in'occupaziun maximala pli pitschna che la purschida. I dastgass segir esser avant maun in potenzial en il martgà da las abitaziuns da vacanzas che na vegn anc betg tratg a niz, ma quant grond che quel è, da quai po mo vegnir speculà. Independentamain da la dumonda, quant grond ch'il potenzial è che na vegn betg tratg a niz, vali da trair a niz quel cumplainamain.

3. Per la regenza è ina meglra occupaziun d'abitaziuns da vacanzas in tema impurtant. Quest tema vegn tractà da differentas varts, p.ex. da l'universitad da Son Gagl per incumbensa dal seco e da "Svizra turissem" u dal forum economic dal Grischun. Ultra da quai è vegnì fatg per incumbensa dal chantun in studi davart ils custs betg cuvrids da las abitaziuns secundaras. I vala d'examinar detagliadamain, tge mesiras che mainan a la finamira e che ston pervi da quai vegnir realisadas. Incontestadas èn las mesiras per ina meglra promoziun ed economisaziun da las abitaziuns da vacanzas. En questa direcziun vegnan en mintga cas ad esser necessarias activitads.

4. En l'incarica da prestaziun actuala da Grischun vacanzas è la promoziun da la dumonda ina incumbensa centrala. Mesiras spezialas per il martgà da las abitaziuns da vacanzas n'èn betg vegnidas fixadas. Sche l'elavuraziun dals temas avess da mussar che Grischun vacanzas saja il purtader adattà per ina mesira, è la regenza pronta da concepir correspundentamain l'incarica da prestaziun. La commerzialisaziun turistica d'abitaziuns da vacanzas dastgass però restar primarmain ina incarica da las organisaziuns da las destinaziuns regiunalas e localas.

5. D'impuls fiscals per possessuras e possessurs d'abitaziuns resp. da chasas da vacanzas che affittan u che laschan affittar lur object da vacanzas en moda professiunala sto vegnir desistì per ils suandants motivs:

Las directivas dal dretg constituziunal da l'art. 95 CC (princips da la generalitad, da l'egualitad e da la capacitad economica) pledan cleramain cunter mesiras directivas en il dretg fiscal.
Il dretg fiscal n'è da princip betg adattà per persequitar finamiras extrafiscalas, perquai che las mesiras da promoziun han in effect fitg different tar pajataglias differents (persunas natiralas e persunas giuridicas) che sa chattan sin differents stgalims da la progressiun.
La lescha d'armonisaziun da taglia na permetta naginas mesiras da quel gener: i na pudess betg vegnir introducida ina deducziun generala per quest intent (art. 9 al. 4 LATD), ed er las entradas correspundentas na pudessan betg vegnir exclusas (per part) da la taxaziun (art. 7 al. 1 LATD).

6. Il dretg privat vegn reglà en emprima lingia da la confederaziun. In'eventuala intervenziun en il dretg privat stuess vegnir examinada per l'entira Svizra, e quai surpassa il rom da questa dumonda. Ulteriurs scleriments areguard l'adattaziun en il dretg privat na vegnan betg resguardads sco cunvegnents.

7. La regenza ha integrà quest tema sco tema central gia en l'incarica da prestaziun 2004 fin 2007 per il forum economic dal Grischun. Il departament cumpetent ha l'incumbensa da persequitar vinavant quest tema, d'analisar ils resultats dals differents studis e da las differentas lavurs da project e da preschentar a la regenza las mesiras necessarias per prender la decisiun.

Datum: 6 da schaner 2005