La dumonda è vegnida respundida per gronda part gia en la sessiun d'october. Nus faschain anc ina giada attent als aspects ils pli impurtants concernent la protecziun dals bulieus:

Tar ils bulieus che vegnan rimnads sa tracti dals fritgals vesaivels da las spezias da bulieus gronds. Ils bulieus per propi vivan en il terren sco micel. Il micel consista d'ina rait entretschada pli u main spessa da fils da cellas. Quella na po betg vegnir destruida cun rimnar ils fritgals. Las examinaziuns scientificas da l'institut da perscrutaziun da guaud, naiv e cuntrada GNC davart l'influenza dal rimnar bulieus sin ils effectivs da bulieus èn terminadas ed evaluadas. Ils resultats vegnan publitgads proximamain. Gia la l'evaluaziun intermediara da l'onn 1990 ha mussà ch'il rimnar ils fritgals dals bulieus n'è betg il motiv principal per la diminuziun da las spezias dals bulieus. Autras influenzas sco per exempel la cultivaziun dal guaud u las midadas da l'ambient (p.ex. l'engrevgiament dal terren cun nitrogen) han in pli grond effect. Questa enconuschientscha na vegn betg a sa midar generalmain. Dal puntg da vista scientific vegnan dentant sustegnidas limitaziuns moderadas per proteger ils bulieus. I n'exista dentant betg in motiv scientific actual da rinforzar las mesiras vertentas legalas per proteger ils bulieus en il chantun Grischun (temp da schanetg, limitaziun da la quantitad, scumond da rimnar en gruppas, scumond da destruir bulieus aposta e scumond da rimnar cun utensils).

Ozendi creschan ad onn en media pli che 700 tonnas da bulieus mangiabels en ils guauds da la Svizra. Da quels vegn tratga a niz mo ina part. Ins na po pia betg discurrer d'ina explotaziun da rapina, sch'i vegnan rimnads illegalmain in pèr tschient 100 kilos da bulieus. Ultra da quai ston ins render attent che la furmaziun dals fritgals dependa da las cundiziuns climaticas. I dat buns, main buns e nauschs onns da bulieus. La stad e l'atun dal 2004 tutgavan tar in bun fin fitg bun onn da bulieus. En tals onns èn d'ina vart daplis rimnaders en gir e da l'autra vart è er la tentaziun da surpassar las prescripziuns pli gronda che en onns main buns. Correspundentamain vegnan tar las controllas er constatads dapli surpassaments da las disposiziuns davart la protecziun dals bulieus.

Resumond constatescha la regenza che la protecziun da plantas e da bulieus è garantida a basa da la legislaziun vertenta, tant enavant sco quai ch'ins po insumma cuntanscher quai cun prescripziuns.

Datum: 6 da schaner 2005