Navigaziun principala

Cuntegn da la pagina

Dumonda Monigatti concernent la persuna incumbensada cun las relaziuns economicas tranter l'Italia ed il chantun Grischun

sessiun: 20.10.2004
Nus savain che l'uffizi per economia e turissem dal chantun Grischun ha proximamain l'intenziun da crear ina nova plazza da cader e da dar a la persuna che vegn elegida en quella plazza l'incumbensa primara da tgirar ils contacts cun la regiun Lumbardia (la grondezza economica la pli impurtanta da l'Europa) per etablir la basa per ina collavuraziun economica, politica e strategica cun la finamira d'encuraschar potenzialas interpresas da lantschar in'activitad commerziala en noss chantun. Apparentamain è previs in biro a Cuira entaifer l'administraziun. Sin basa da questas explicaziuns supplitgain nus la regenza da respunder las suandantas dumondas:

1. Per cura è previsa l'elecziun da la persuna responsabla?

2. È er la regenza da l'avis che la persuna responsabla duess avair ses lieu da lavur en ina regiun dal sid, e quai er en il senn da la decentralisaziun e dal svilup da las regiuns periferas?

3. È la regenza er da l'avis ch'i fiss inditgà d'avair quest sectur strategic ed operativ en las vals da lingua taliana, là, nua che la realitad taliana è bain enconuschenta e là, nua che grazia als projects d'INTERREG ins ha gia pudì enconuscher la Lumbardia e ses grond potenzial economic?

Cuira, ils 20 d'october 2004

Name: Monigatti, Zanetti, Arquint, Bucher, Fasani, Giovannini, Keller, Meyer Persili (Cuira), Mengotti, Noi, Pedrini, Pfenninger, Pfiffner, Righetti, Schütz, Trepp, Toschini

Session: 20.10.2004
Vorstoss: rg Anfrage


Resposta da la regenza

Tar l'uffizi per economia e turissem (UET) na vegn betg creada ina plazza supplementara. Il plan da plazzas dal UET resta invarià areguard sia dimensiun cun 900 pertschient da plazzas. Suenter ina pensiun anticipada d'in titular d'ina plazza e suenter la fin d'incumbensas en il sectur dal sport da muntogna e dal sport da naiv han pudì vegnir dads libers grazia ad ina nova organisaziun da las incumbensas en connex cun la promoziun da la regiun da muntogna 100 pertschient da plazzas. Quests pertschients da plazzas vegnan uss mess a disposiziun al sectur promoziun da l'economia / marketing dal lieu. L'occupaziun da la plazza correspundenta è gia vegnida publitgada. Las incumbensas centralas da questa plazza èn l'assistenza dals investurs tudestgs e la realisaziun da las mesiras d'acquisiziun orientadas a la Germania. L'assistenza d'investurs da l'Italia ed il sustegniment da las interpresas indigenas fan medemamain part da las incumbensas.

Las dumondas:

1. Probablamain vegn l'elecziun fatga il mars 2005.

2. Perquai che l'activitad da la titulara u dal titular da la plazza è orientada primarmain al martgà da la Germania, s'impona Cuira sco lieu da lavur. Cuira sco lieu da gestiun garantescha plinavant la meglra integraziun en il team "promoziun da l'economia / marketing dal lieu" dal UET.

3. L'assistenza d'investurs da l'Italia è ina incumbensa impurtanta. Ma ella represchenta mo ina part dal champ d'activitad da la nova plazza. Sco lieu da lavur è previs Cuira.

En la missiva al cussegl grond tar la revisiun da la lescha per promover l'economia publica en il chantun Grischun (carnet nr. 9/2003-2004) constatescha la regenza en connex cun la nova politica regiunala (NPR) che "per sustegnair optimalmain las activitads da las regiuns èn necessaris dus ulteriurs collavuraturs". Tras in'assistenza activa da las regiuns e tras in accumpagnament dals projects impurtants per l'economia regiunala duai vegnir rinforzada la cumpetitivitad da las regiuns. Ina da questas plazzas fiss previsa per l'assistenza da las vals dal sid e fiss alura er responsabla per il sectur "promoziun da l'economia / marketing dal lieu" da las vals dal sid e per l'elavuraziun sistematica dal spazi economic da la Lumbardia.

Actualmain è la regenza vidlonder da realisar l'incumbensa che prevesa supplementarmain a las mesiras da la "examinaziun da las structuras e da las prestaziuns per sanar las finanzas dal chantun" da reducir 70 plazzas en l'administraziun pli stretga. La creaziun da las duas plazzas menziunadas en connex cun la nova politica regiunala (NPR) dastgass daventar fitg difficila il proxim temp e vegn a stuair vegnir examinada en in rom general.

Datum: 20 da december 2004