Navigaziun principala

Cuntegn da la pagina

Dumonda Righetti concernent las controllas da radar automaticas

sessiun: 20.10.2004
L'ultim temp ha la polizia intensivà las controllas da la spertadad cun apparats da mesiraziun automatics. Quai vul dir che quellas persunas che surpassan la limita da spertadad na vegnan betg fermadas ed identifitgadas, mabain fotografadas. Ellas survegnan alura per posta l'avis da surpassament.
"PutgantAs da spertadad" che vivan en Svizra pon vegnir identifitgadAs facilmain grazia als chanals usitads da la polizia ed alura persequitadAs tant penalmain sco er cun mesiras administrativas (privaziun dal permiss da manischar u avertiment).
Per "putgantAs da spertadad" che vivan a l'exteriur vegn introducida ina procedura birocratica l'emprim per l'identificaziun e pli tard per atgisar ils surpassaments commess en Svizra. Quai succeda probablamain cun ina dumonda d'assistenza giudiziala internaziunala, la realisaziun e l'effizienza da la quala po vegnir messa en dumonda en tscherts pajais.

La regenza vegn perquai supplitgada da respunder las suandantas dumondas:

Maina il sistem applitgà a resultats concrets per prevegnir ad accidents ed a surpassaments da la lescha davart il traffic sin via ed uschia per la segirezza sin nossas vias?

Co vegnan tschertgadAs ed identifitgadAs "putgantAs da spertadad" che vivan a l'exteriur?

Vali la paina d'introducir ina procedura birocratica che custa blera lavur e che chaschuna gronds custs per surpassaments, dals quals resulta in import da multa da 40 francs? (ordinaziun davart las multas disciplinaras OMD)

Quants pertschients dals imports da multa tramess da la polizia en disposiziuns da multa e decretads en sentenzias dals circuls pertutgads che manischunzAs che vivan a l'exteriur ston pajar a nossa cassa statala vegnan incassads effectivamain?

Na dischavantagescha il sistem applitgà betg forsa manischunzAs che vivan en Svizra en cumparegliaziun cun talAs che vivan a l'exteriur e che han commess il medem surpassament?

Cuira, ils 20 d'october 2004

Name: Righetti, Keller, Pedrini, Augustin, Berther (Sedrun), Bundi, Dermont, Farrér, Fasani, Kessler, Kleis-Kümin, Luzio, Marti, Mengotti, Noi, Portner, Sax, Zanetti, Zanolari, Monigatti, Nay, Toschini

Session: 20.10.2004
Vorstoss: rg Anfrage


Resposta da la regenza

1. La spertadad betg adattada è in dals motivs ils pli frequents d'accidents. Ils ultims tschintg onns han stuì vegnir attribuids a quai en media 29% dals accidents da traffic en il Grischun. En la medema perioda èn vegnidas blessadas en media 990 persunas e 25 persunas èn mortas tar accidents da traffic. Il dumber da las persunas mortas e da las persunas blessadas en il traffic sin via è relativamain constant en il Grischun. El sforza però a mesiras correspundentas, tranter auter er a controllas regularas da la spertadad.
Controllas da la spertadad moviblas sco er staziunaras han ina influenza positiva sin il cumportament en il traffic confurm a la lescha. Cun talas mesiras vegnan reducids ils accidents da traffic ed ils surpassaments da las reglas da traffic e la segirezza sin nossas vias vegn augmentada. Controllas da la spertadad cun fermar si las manischunzas u ils manischunzs fallibels dal vehichel han preventivamain in effect appellativ pli grond che sche la disposiziun da multa vegn tramessa suenter pli tard.
La polizia chantunala grischuna fa dapi onns controllas da radar automaticas. In augment da quest gener da controlla ils ultims onns resulta da la situaziun persunala da la polizia chantunala grischuna. Uschia pon vegnir fatgas controllas da radar automaticas da duas collavuraturas u collavuraturs. Per controllas da la spertadad cun gruppas che ferman si las manischunzas u ils manischunzs fallibels ston star a disposiziun almain sis collavuraturas u collavuraturs. Ultra da quai pon vegnir fatgas sin la A13 controllas cun gruppas che ferman si las manischunzas u ils manischunzs fallibels mo cun agid d'ina signalisaziun pretensiusa per sbassar la spertadad en etappas e per reducir ils vials. Da quai resultan en cas d'in grond augment dal traffic savens gia suenter in curt temp stagnaziuns dal traffic che n'èn betg senza privel.

2. La polizia chantunala grischuna ha pudì crear ils ultims onns ina rait da relaziuns internaziunalas, cun la quala possessuras u possessurs da vehichels a motor che vivan a l'exteriur pon vegnir eruids en moda simpla e nuncumplitgada per e-mail u per fax. La lavur è mo marginalmain pli gronda che en cas da possessuras u da possessurs da vehichels a motor che vivan en Svizra. En Germania vegnan las possessuras u ils possessurs da vehichels a motor eruids tras ils uffizis dals cirquits, en Austria directamain tar ils posts da polizia correspundents, en Italia ed en Frantscha tras ils centers da cooperaziun a Chiasso ed a Genevra.

3. Pervi da la lavur relativamain pitschna cunvegnan er en il senn d'in tractament giuridicamain egual ils scleriments davart il sistem d'assistenza giudiziala pratitgada.

4. Statisticas pli precisas n'èn betg avant maun. Indicaziuns expressivas sa laschassan mo eruir cun gronds custs e blera lavur. La polizia chantunala grischuna emprova da retschertgar per il mais da zercladur 2004 las datas, che duessan mussar circa la quota procentuala da success dals cas. En connex cun surpassaments da la spertadad ha ella manà tras il zercladur 2004 en ils pajais vischins totalmain 343 scleriments davart la possessura u davart il possessur resp. davart la manischunza u davart il manischunz. 268 cas u 78.12% han pudì vegnir liquidads. La quota da refluss da la Germania ha importà 80.27%, quella da l'Italia 70.11%, quella da l'Austria 93.10% e quella da la Frantscha 55.56%. Da quai han resultà entradas da 47'740 francs. Tut en tut pon ins discurrer d'in bun refluss da daners da multas ch'èn vegnidas pronunziadas envers possessuras u possessurs resp. manischunzas u manischunzs che vivan a l'exteriur. En media pon ins partir d'ina quota da 70 fin 80%.

5. Considerond l'egualitad giuridica èsi indispensabel che tant manischunzas u manischunzs svizzers sco er manischunzas u manischunzs che vivan a l'exteriur che han surpassà las reglas da traffic ston star bun per quai ch'els han fatg. Cun agid da l'assistenza giudiziala sto vegnir fatg tut per che er possessuras e possessurs che vivan a l'exteriur possian vegnir eruids e stettian bun per quai ch'els han fatg. La quota da refluss da l'exteriur cumprova ch'ins na po insumma betg discurrer d'ina inegualitad giuridica. La motivaziun per quai è tar las participantas e tar ils participants dal traffic che vivan e l'exteriur savens er ch'els ston temair da vegnir retegnids tar ulteriurs passagis dal cunfin da la Svizra, sch'els n'han betg pajà lur multas.

Datum: 7 da december 2004