Navigation

Inhaltsbereich

Dumonda urgenta da la fracziun Cavigelli concernent l'armada XXI tar la decisiun da logistica e d'infrastructura dals 6 da december 2004

Sessiun: 06.12.2004
Ils 6 da december 2004 è stà il di da la decisiun preliminara. Samuel Schmid, schef dal DDPS, ha communitgà las decisiuns davart ils lieus dals centers da logistica e d'infrastructura da l'armada svizra. En il chantun Grischun ed a Cuira han ins spetgà ina decisiun positiva. I sa tracta da mantegnair las plazzas da lavur ed il niz per l'economia publica sco er il servetsch da clientella.

En cas dals centers da logistica sa tracti d'administrar e da mantegnair il material. Ils centers d'infrastructura mainan las plazzas d'exercizi e da tir sco er ils chantunaments e las casernas. In center da logistica u d'infrastructura cumpiglia circa la dimensiun geografica da la Svizra orientala.

Las plazzas d'armas e da tir dal Grischun fan part da las meglras plazzas da scolaziun da l'armada svizra e duain vegnir utilisadas intensivamain er en il futur. En la decisiun preliminara dals 6 da december 2004 avess questa situaziun da partenza stuì avair in effect positiv per il Grischun. A basa da las infurmaziuns dal DDPS d'enfin uss ston ins temair ch'igl è succedì en la basa logistica da l'armada in'analisa da la furniziun da la prestaziun tenor aspects puramain economics, numnadamain tenor l'uschenumnà "model per optimar ils lieus", e ch'igl è consequentamain vegnì dà en la decisiun preliminara dals 6 da december 2004 memia pauca impurtanza al giudicament general dals effects.

Per il chantun Grischun cun las plazzas da scolaziun da la confederaziun a Cuira, sin il St. Luzisteig, a Valragn, a Breil ed a S-chanf vai per bler. A Cuira, cun cumpigliar ils lieus externs qua survart, sto reussir in manaschi dal center cun mantegnair commensuradamain las plazzas da lavur (garanzia dal niz per l'economia publica).

Perquai dumandain nus la regenza il suandant:

1. Co giuditgais Vus la decisiun dal DDPS dals 6 da december 2004 e tge enconuschientschas resultan da quella?

2. Tge vegn fatg per ch'il Grischun possia tuttina trair a niz sia buna situaziun da partenza en la concurrenza per la repartiziun dals lieus da logistica e d'infrastructura sco er per las plazzas da lavur?

3. Co è l'ulteriur proceder tar questa tractanda tranter il chantun e la confederaziun?

Cuira, ils 6 da december 2004

Name: Cavigelli, Augustin, Berther (Mustér), Berther (Sedrun), Biancotti, Bundi, Cahannes, Capaul, Casanova (Vignogn), Cavegn, Crapp, Demarmels, Dermont, Farrér, Federspiel, Geisseler, Kleis-Kümin, Loepfe, Maissen, Parpan, Pfister, Plozza, Schmid, Tomaschett, Tremp, Tuor, Zanetti, Zegg, Nay, Niederer, Thurner

Session: 6.12.2004
Vorstoss: rg Anfrage


Resposta da la regenza

Ils 6 da december 2004 ha preschentà il departament da defensiun, protecziun da la populaziun e sport (DDPS) a Berna a las represchentanzas da la regenza dals chantuns ses concept da staziunament da l'armada. La nova orientaziun da l'armada ha per consequenza ina reducziun marcanta da la structura da cumbat e da direcziun, dals champs da las truppas e da las plazzas da tir e collià cun quai ina reducziun rigurusa dal persunal.

Il chantun Grischun vegn disfavurisà fermamain en il concept. Cuira perda l'arsenal federal cun il parc dals vehichels a motor da l'armada (PVA). Cun Valragn, Cuira-Rossboden, Breil, S-chanf ed ulteriuras dispona noss chantun da fitg bunas plazzas da tir. Malgrà quai na survegn el ni in center da logistica ni in center d'infrastructura. A Cuira prevesa il concept fin la fin da l'onn 2010 sulettamain anc in post da restabiliment cun 5 8 plazzas da lavur sco er cun 8 16 plazzas da lavur en il sectur da l'infrastructura. Plinavant duain ils ulteriurs stabiliments da l'armada en il chantun vegnir manads vinavant sin las plazzas da tir menziunadas quà sura cun in dumber minimal da persunal. Ultra da quai vegn renunzià a blers chantunaments communals, a bleras plazzas da tir da contract ed a blers lieus da logistica en il chantun. Perencunter duai la reservaziun cunzunt da la plazza d'armas a Cuira vegnir augmentada per dapli che 20% cumpareglià cun oz.

La regenza dal chantun Grischun n'ha nagina chapientscha per questas propostas che laschan manchentar ina sensibilitad areguard la politica da militar. La realisaziun da questas propostas maina d'ina vart ad ina reducziun pregnanta da plazzas da lavur en il chantun, da l'autra vart dentant vegnan las immissiuns per la populaziun e per la natira augmentadas considerablamain pervi da l'utilisaziun pli intensiva spezialmain da la plazza da tir Rossboden a Cuira.

La renunzia ad in arsenal al lieu augmenta ultra da quai considerablamain ils kilometers da transport per il material, per la muniziun e per ils vehichels. Che quai sa mussia sco avantatg respectivamain valia la paina per l'economia da manaschi n'è per il mument betg cumprovà.

Las dumondas:

1. Er suenter ch'il concept è vegnì communitgà dal DDPS restan anc bleras dumondas. Tge che questa decisiun signifitgescha concretamain ed en detagl areguard la reducziun dal persunal en il Grischun, n'ha fin ussa er betg anc pudì vegnir respundì dals uffizis federals cumpetents.
Il DDPS ha concedì als chantuns in termin per prender posiziun fin ils 4 da favrer 2005. Il medem mument han las represchentantas ed ils represchentants dal DDPS communitgà che la decisiun concernent ils centers da logistica ed ils centers d'infrastructura na possia betg pli vegnir midada. Questa cuntradicziun sto vegnir schliada tras la discussiun. Uschia sco ch'il concept sa preschenta en ina emprima zavrada, na po el betg vegnir acceptà, en tutta cas en quai che concerna la situaziun ch'el porta per il chantun Grischun.

2. I ston vegnir fatgas ulteriuras discussiuns cun las represchentantas e cun ils represchentants dal DDPS. En quest connex duai vegnir exprimì cler e net che las grevezzas che resultan da l'utilisaziun da las plazzas da tir en il Grischun ston star en ina relaziun correspundenta cun il dumber da plazzas da lavur en il chantun. Il niz per l'economia publica dals stabiliments da l'armada e da las plazzas da tir en colliaziun cun las plazzas da lavur che dependan da quai en noss chantun na dastga betg vegnir sacrifitgà a ponderaziuns unilateralas da l'economia da manaschi che na persvadan dal rest betg en mintga reguard. In pensar che resguarda mo ils custs ed il gudogn na correspunda er betg a l'idea da la milissa.

3. Actualmain vegn coordinada ina discussiun cun cusseglier federal Samuel Schmid, schef dal DDPS. La regenza decida suenter la finiziun dals discurs cun il DDPS, sch'ella vul trair a niz il termin fin ils 4 da favrer 2005 per inoltrar ina posiziun en scrit al DDPS.
Suenter las ulteriuras occurrenzas d'infurmaziun en ils chantuns planisescha il DDPS da communitgar la mesadad da l'onn 2005 ils lieus approvads.

Datum: 8 da december 2004