Navigation

Inhaltsbereich

Sessiun: 07.12.2004
La rait actuala da la via chantunala en il Puschlav e sin il pass dal Bernina na satisfa betg pli a las pretensiuns dal traffic odiern. Pervi da l'augment permanent dal traffic lev e pesant vegn periclitada fermamain la segirezza. La viafier retica traversa tuttina trais vitgs (Campocologno, Le Prese e St. Antonio) parallelamain a la via chantunala u cruscha tala e periclitescha uschia la segirezza da las automobilistas e dals automobilists e spezialmain quella da las motociclistas e dals motociclists. Spezialmain la stad chaschuna quest fatg numerus accidents. Sch'i plova èn ils binaris da la viafier retica per propi ina trapla per motociclistas e motociclists. La stad traversan permanentamain colonnas da vehichels nossas vischnancas (traffic en Livigno). Gia dapi decennis dumonda il Puschlav la construcziun d'in sviament en la val. Gia l'onn 1994 èn vegnids inoltrads tar la vischnanca da Brusio ils plans da construcziun per il sviament da Campocologno. Ussa èn passads 10 onns, ma ins n'ha anc betg cumenzà cun las lavurs. La segirezza d'enviern sin il pass dal Bernina n'è betg garantida pervi da las relaziuns geograficas (vent e lavinas).

Sin fundament da questas constataziuns faschain nus las suandantas dumondas a la regenza:

1. Ha la regenza l'intenziun da realisar il sviament en il Puschlav aifer curt termin, spezialmain per motivs da la segirezza?

2. Tge mesiras urgentas vul la regenza prender per cumbatter ils accidents permanents da motos?

3. È la regenza pronta da render segira aifer curt termin la traversada dal pass dal Bernina durant l'enviern?

Cuira, ils 7 da december 2004

Name: Plozza, Zanetti, Mengotti, Noi, Pedrini, Righetti, Mainetti

Session: 7.12.2004
Vorstoss: rg Anfrage


Resposta da la regenza

La via dal Bernina H29 è part da la rait da vias principalas da la Svizra. Areguard ils aspects menziunads en la dumonda mussa la cumparegliaziun cun las ulteriuras vias principalas dal Grischun ch'i n'existan per la via dal Bernina naginas relaziuns extraordinarias che avessan per consequenza in basegn d'agir spezial.

En quai che reguarda il standard da cumplettaziun po schizunt vegnir constatà che quel è en cumparegliaziun meglier che la media. Areguard la segirezza dal traffic cumprova la statistica d'accidents ch'i n'existan nagins puncts critics per accidents sin il traject dal Bernina cun excepziun d'en il vitg da Le Prese che stuessan vegnir menziunads. Ultra da quai n'han ins er betg constatà in augment dal traffic extraordinari ils ultims onns. Perencunter stoi vegnir concedì ch'i po esser pli difficil da viagiar sin la via dal Bernina durant l'enviern, e quai pervi da cufflads da naiv, pervi d'influenzas dal vent, pervi da glatsch sin via e pervi d'ina visibilitad reducida.

Davart las dumondas concretas s'exprima la regenza pia sco suonda:

1. Las situaziuns finanzialas criticas da la confederaziun e dal chantun na permettan betg da prender per mauns novs projects d'amplificaziun ils proxims onns. Il program da plirs onns 2004 fin 2007 da la confederaziun per amplifitgar las vias principalas cuntegna mo ils meds ch'èn necessaris per finir ils projects vi dals quals i vegn lavurà actualmain. Dal rest ston ins far quint ch'i ston vegnir duvrads en il futur a donn e cust da projects d'amplificaziun bler dapli meds finanzials per il mantegniment architectonic da la rait da vias.

Rinviond als projects da sviament menziunads en la dumonda sto vegnir constatà ch'igl exista in project d'exposiziun però betg approvà da l'onn 1994 per il sviament da Campocologno. Tenor il preventiv dals custs (stadi 1994) è vegnì calculà cun custs da construcziun da 45 milliuns francs. Per ils ulteriurs sviaments en il Puschlav n'èn avant maun nagins projects concrets. En il plan directiv chantunal (PDChant 2000) èn els cuntegnids en il senn d'opziuns per tegnair liber ils trassés.

2. En collavuraziun cun la polizia da traffic ha l'uffizi da construcziun bassa fatg grondas stentas ils ultims 10 onns per cuntanscher in augment da la segirezza da traffic per motociclistas e per motociclists. Uschia è vegnì mess en funcziun a Le Prese in signal a portal cun fibras opticas il matg 2001. Quai ha mitigià la situaziun.

Ils posts spezialisads pertutgads, la polizia chantunala e l'uffizi da construcziun bassa punctueschan che las mesiras pussaivlas areguard la montascha da signals sajan cun quai però exauridas. Ina soluziun optimala possia vegnir cuntanschida mo cun separar cumplettamain e cun gronds custs ils binaris e la via e cun far in sviament dal center dal vitg da Le Prese cun in dals dus purtaders da traffic.

3. Differentas mesiras che han l'intent d'augmentar la segirezza d'enviern sin il traject dal pass dal Bernina vegnan actualmain examinadas davart lur funcziunalitad, davart lur finanziabladad e davart lur realisabladad en etappas. Tar quellas tutgan construcziuns da rempars supplementars en las zonas da distatga da lavinas, signalisaziuns e construcziuns artifizialas. Actualmain n'è la regenza dentant betg en cas da garantir che talas mesiras vegnian realisadas a curt termin.

Datum: 4 da mars 2005