Navigaziun principala

Cuntegn da la pagina

Dumonda Schütz concernent in program d'integraziun per giuvenils difficils d'intermediar

sessiun: 07.12.2004
Pli e pli n'han giuvenils difficils d'intermediar nagina schanza pli da cumenzar in emprendissadi ordinari u schizunt mo da vegnir intermediads en programs d'integraziun. A lunga vista è quest svilup catastrofal. Pussaivladads da soluziun èn dentant urgentas. La politica sto vegnir conscienta da las consequenzas che resultan, sche quest problem na vegn betg schlià e sto avair la veglia da tractar quest problem senza "sche" e "ma" e cun meds adattads sco er da chattar ina soluziun.
Cun la finamira en il program da la regenza 2002, cifra 5, mesira 29, è sco punct central vegnì fatg attent a l'agid d'integraziun che vegn giavischà per persunas che retschaivan agid social. En quest connex duess la purschida vegnir extendida er sin ulteriuras gruppas da basegn.
En il fratemp è en funcziun dapi ils 21 da zercladur 2004 il program da giuventetgna "funtauna". Quest program da giuventetgna è francà ed integrà bain entaifer tut las mesiras per il martgà da lavur. La finanziaziun succeda tras il seco. Las participantas ed ils participants survegnan a medem temp sustegn da dischoccupaziun. Per il chantun na resultan pia nagins custs.
La purschida na vala dentant betg per il sectur dals giuvenils betg intermediabels, ils quals na vegnan betg sustegnids da la cassa da dischoccupaziun. Cunquai che quests umans giuvens na disponan da naginas cumpetenzas u disponan cleramain da memia paucas cumpetenzas per tschertgar independentamain ina plazza d'emprendissadi, na vegnan els strusch scolads tras ils manaschis. Questas persunas na chattan dentant er betg ina plazza en il program da giuventetgna menziunà qua survart. Uschia vegnan els assegnads als servetschs socials regiunals. Actualmain na datti er nagina structura dal di per questa gruppa da giuvenils. Lur problematica è situada en emprima lingia en ils secturs da difficultads psicosocialas, da violenza, da toxicomania e.u.v. Plinavant sto vegnir constatà che questa gruppa d'umans giuvens crescha considerablamain. Uschia daventa il problem descrit qua survart pli e pli acut.
Perquai dumandain nus la regenza il suandant:

1. Èsi enconuschent a la regenza che la gruppa da giuvenils che na pon per ils motivs menziunads betg vegnir integrads en las mesiras existentas per il martgà da lavur, vegn pli e pli gronda?

2. Tge puncts da la mesira 29 èn vegnids realisads? Co quinta la regenza da serrar questa largia?

3. En tge furma pon las vischnancas vegnir cumpigliadas en la finanziaziun da programs cun ina integraziun pli facila.

Cuira, ils 7 da december 2004

Name: Schütz, Frigg, Pfenninger, Arquint, Baselgia, Bucher, Jäger, Koch, Mani-Heldstab, Meyer Persili (Cuira), Mengotti, Michel, Noi, Peyer, Pfiffner, Trepp, Zindel, Brasser, Caviezel (Cuira)

Session: 7.12.2004
Vorstoss: rg Anfrage


Resposta da la regenza

Ils giuvenils han ozendi pli gronda concurrenza sin il martgà da lavur che anc avant in pèr onns. Questa situaziun è anc pli greva per giuvenils cun nauschas premissas da scolaziun e cun mancanzas da cumpetenzas socialas.

Dapi ils 21 da zercladur 2004 maina il UCIML il program da giuventetgna "funtauna". A quel pon sa participar giuvenils che pon vegnir intermediads sin il martgà da lavur. Nagin acces a quest program n'han perencunter quels giuvenils che na pon betg vegnir intermediads, e quai sin fundament da lur cumportament, per mancanza da cumpetenzas socialas (cumportament da lavurar, fidadadad, moda da discurrer, perseveranza, toleranza da frustraziun), pervi da problems psicosocials u per consequenza da toxicomania.

Per giuvenils difficils d'intermediar che na vegnan betg acceptads en il program da giuventetgna "funtauna", ston vegnir prendidas mesiras da tgira e da scolaziun che pussibiliteschan d'acquistar las abilitads e las cumpetenza mancantas. Mesiras correspundentas ston vegnir prendidas preventivamain gia en las classas finalas. Igl è l'incumbensa da las autoritads da scola d'examinar, sch'ins sto prender mesiras accumpagnantas tras ina cussegliaziun sociala spezialisada (lavur sociala da scola) e/u tras mesiras tutelaras. Cun mesiras accumpagnantas adattadas e cun mesiras tutelaras pon er giuvenils difficils d'intermediar chattar access a praticums ed a plazzas da lavur. Tals giuvenils pon er vegnir plazzads en chasas da scolaziun, chasas da dimora ed en lieus da lavur per giuvenils en il chantun Grischun (p.ex. center d'emprender "Känguruh", Malix, u fundaziun "Alltag", Summaprada) u ordaifer il chantun.

Tar las dumondas:

1. Retschertgas exactas davart questa gruppa d'adressats na datti ni da las autoritads da scola ni dals servetschs socials ni da las autoritads tutelaras. Las autoritads tutelaras fan dentant indicaziuns davart l'augment da cas correspundents. Dapi l'avertura dal program da giuventetgna "funtauna", ils 21 da zercladur 2004, sa mussa effectivamain che intgins giuvenils cun singularitads dal cumportament e cun mancanzas en il sectur social n'adempleschan betg las premissas per vegnir acceptads. Fin ussa èn vegnidas refusadas 8 persunas.

2. La mesira 29 preveseva da sviluppar purschidas per persunas che na pon pli retrair indemnisaziuns da l'agid social. En il rom dal project "Werknetz" èn vegnidas purschidas l'onn 2004 plazzas d'occupaziun per 165 participantas e participants. Da quellas persunas eran 17 pli giuvnas che 20 onns. Ultra da quai stattan a disposiziun a Roveredo, a Trun, a Tusaun, a Zuoz, a Cuira ed a partir da la stad 2005 er a Tavau (totalmain 104 plazzas d'occupaziun) projects d'integraziun per persunas dischoccupadas, dentant er per persunas che na pon pli retrair indemnisaziuns da l'agid social.

La regenza è da l'avis ch'ils problems existents da giuvenils stoppian vegnir schliads cun mesiras individualas da scola e cun mesiras tutelaras. Per las decisiuns correspundentas èn cumpetentas las autoritads tutelaras. La finanziaziun succeda tenor la legislaziun da sustegn. Per il mument n'èsi betg previs da sviluppar ulteriurs programs cun ina integraziun pli facila per giuvenils.

3. Programs e mesiras per persunas (er per giuvenils), las qualas igl è difficil u betg pussaivel d'integrar, vegnan finanziads da las vischnancas, sa basond sin la legislaziun da sustegn. Ins sto dentant constatar che bleras vischnancas refuseschan per motivs finanzials da pajar ils custs da participaziun a persunas che retschaivan indemnisaziuns da l'agid social u a talas, per las qualas ina participaziun ad in program d'integraziun fiss inditgada.

Datum: 16 da mars 2005