Navigation

Inhaltsbereich

Incumbensa Jäger concernent la revisiun da la lescha davart las scolinas dal chantun Grischun (lescha da scolina)

Sessiun: 07.12.2004
Il pli tard tras la discussiun davart ils resultats dal studi PISA sa drizza l'attenziun da las expertas e dals experts da furmaziun sco er da las politicras e dals politichers da furmaziun pli e pli sin la fasa avant il cumenzament da la scola. L'impurtanza da la promoziun prescolara per il svilup dals uffants pli tard en scola vegn renconuschida oz en general. La posiziun da la scolina sco instituziun prescolara è sin via da sa midar. Quai sa mussa tranter auter en la debatta davart in'eventuala introducziun d'in stgalim fundamental (stgalim da basa). Cun declerar la scolina sco obligatoria èn a medem temp differents chantuns actualmain vi dad extender l'obligaziun d'ir a scola da fin uss 9 a 10 u ad 11 onns. Pli e pli sa mussi er ch'ina vegliadetgna fixa eguala d'ir a scola è problematica per tuts. La vegliadetgna actuala d'ir a scola è tendenzialmain memia auta en il Grischun. In'eventuala midada duess dentant er succeder en direcziun d'ina flexibilitad engrondida.
Suenter ch'ina emprima emprova per ina nova lescha davart la scola populara aveva fatg naufragi en il chantun Turitg tranter auter pervi dal stgalim da basa dispitaivel, ha il cussegl chantunal concludì uss pir dacurt da chantunalisar la scolina e da prevair a medem temp che tut ils uffants ston ir obligatoriamain dus onns a scolina. Uschia extenda il chantun Turitg l'obligaziun d'ir a scola (inclusiv a scolina) ad 11 onns.
Cunzunt en il sectur da l'acquisiziun da la lingua vegnan mess fundaments impurtants en la vegliadetgna da 4 a 6 onns per tut la furmaziun posteriura. La gronda maioritad dals uffants va gia oz durant dus onns a scolina. Quai è fitg impurtant cunzunt per l'integraziun d'uffants sulets e d'uffants da lingua estra.
Entant che auters chantuns decleran uss la scolina sco obligatoria, è fixà en la lescha vertenta davart las scolinas dal chantun Grischun sulettamain il dretg da frequentar ina scolina durant almain in onn avant l'entrada en scola.
Cunquai che las differenzas tranter ils divers sistems da scola chantunals na duessan betg adina vegnir anc pli grondas, s'impona sco en ils auters chantuns er en il Grischun ina revisiun da la lescha che duai declerar la scolina sco obligatoria. Dal puntg da vista professiunal vegniss giavischà da fixar in obligatori da dus onns sco en il chantun Turitg. Tras quai vegn l'instituziun da la scolina rinforzada cleramain sco emprim stgalim dal sistem da furmaziun.
La regenza vegn envidada da suttametter al cussegl grond in rapport ed ina proposta per reveder la lescha davart las scolinas dal chantun Grischun en direcziun d'in obligatori da scolina e dad eventualmain integrar quel supplementarmain en la lescha chantunala da scola.

Cuira, ils 7 da december 2004

Name: Jäger, Feltscher, Casanova (Vignogn), Arquint, Baselgia, Bucher, Cahannes, Casty, Caviezel-Sutter (Tusaun), Cavigelli, Christ, Christoffel, Crapp, Dermont, Frigg, Hanimann, Hess, Hübscher, Koch, Loepfe, Meyer Persili (Cuira), Mengotti, Michel, Noi, Peyer, Pfenninger, Pfiffner, Pfister, Portner, Rizzi, Robustelli, Schütz, Tomaschett, Tremp, Trepp, Wettstein, Zindel, Brasser, Cahenzli, Caviezel (Cuira), Toschini

Session: 7.12.2004
Vorstoss: rg Auftrag


Resposta da la regenza

La regenza va d'accord cun las suandantas valitaziuns, sin las qualas l'incumbensa sa basa. Primo: La scolarisaziun succeda relativamain tard en il chantun Grischun. Secundo: Oz èsi incontestà che la promoziun sistematica dals uffants duai cumenzar uschè baud sco pussaivel.

Tenor l'art. 2 al. 1 da l'ordinaziun executiva tar la lescha da scola è mintga uffant scolabel che abita en il chantun e che vegn ad avair accumplì il settavel onn da vegliadetgna fin ils 31 da december obligà da frequentar la scola primara cun il cumenzament da l'onn da scola. Il concordat davart la coordinaziun da la scola dals 29 d'october 1970 fixescha la vegliadetgna per cumenzar ad ir a scola sin il 6avel onn da vegliadetgna accumplì (di da referenza: 30 da zercladur).

Per la promoziun prescolara en il chantun Grischun èn dadas las premissas gia uss. Lur concepziun mussa per part dentant anc differenzas considerablas. Cumbain che ina vischnanca da domicil sto tenor l'art. 26 al. 1 da la lescha da scolina pussibilitar ad in uffant da frequentar la scolina mo durant in onn avant ch'el entra en scola, han oz praticamain tut ils uffants grischuns la pussaivladad d'ir dus onns a scolina. Però variescha la purschida emnila da scolina considerablamain tut tenor purtaders. La frequentaziun da la scolina è ultra da quai voluntaria per tut ils uffants (art. 4 al. 1 da la lescha da scolina). En vista a las differenzas ch'existan actualmain anc tar la purschida da scolina en las differentas vischnancas dal chantun sa tschenta la dumonda, sche e sche gea en tge dimensiun da temp ch'i duai vegnir declerà obligatori d'ir a scolina.

L'entir cumplex da dumondas areguard la scolarisaziun e la posiziun da la scolina en ils fatgs da scola dal Grischun vegn actualmain elavurà en il rom dal punct central da svilup "Dapli profunditad che vastadad" (program da la regenza 2005 2008). En questa lavur da princip vegnan propostas per scolarisar pli baud ed a moda pli flexibla sco er per in obligatori da scolina a stuair vegnir examinadas a moda anc pli profunda respectivamain a stuair vegnir realisadas alura en il senn da questa examinaziun.

Tenor l'avis da la regenza pari er inditgà suenter l'introducziun d'in eventual obligatori da scolina e confurm a las explicaziuns da l'incumbensa d'integrar la lescha da scolina actuala en la lescha da scola.

La regenza è pronta d'acceptar l'incumbensa en il senn da las explicaziuns qua survart.

Datum: 11 da mars 2005