Navigation

Inhaltsbereich

Sessiun: 08.12.2004
La gievgia, ils 28 d'october, fin e cun la sonda, ils 30 d'october 2004, ha gì lieu cun success la 6avla EMBA (exposiziun professiunala da la regiun dal Grischun central). D'in success pon ins discurrer, perquai che var 120 mastergnantas e mastergnants han partì durant trais dis la lavur en favur da passa 50 professiuns. 700 scolaras e scolars dal stgalim superiur han visità questa exposiziun professiunala. Per l'emprima giada è la EMBA s'averta vers anora: a Lai eran engaschadas tant scolas sco er interpresas da mastergnanza d'ordaifer la regiun dal Grischun central. Scolas da Favugn, da Cuira, da Trimmis, da Tavau e da Maiavilla han profità da la chaschun da sa participar a la suletta exposiziun professiunala che ha lieu regularmain en il Grischun. Ultra da l'exposiziun professiunala hai dà blocs d'infurmaziun davart ulteriuras pussaivladads da scolaziun, davart la prevenziun da toxicomania e davart consorzis da furmaziun professiunala.
Tenor las infurmaziuns da l'uffizi per la furmaziun professiunala vegnan schliads mintg'onn var 9% u ca. 450 contracts d'emprendissadi per ils motivs ils pli differents. Tenor noss avis è quest dumber memia aut. La frustraziun e la malcuntentientscha èn grondas tar la persuna che interrumpa l'emprendissadi ed en spezial tar l'instructura u tar l'instructur. Qua metta la EMBA in accent impurtant en connex cun la preschentaziun da la professiun. La EMBA na po betg remplazzar il fufragnadi. Cun ses sistem cumprovà da trais stgalims è ella dentant in ulteriur element impurtant per chattar la dretga professiun. Plinavant na stat l'exposiziun professiunala betg mo a disposiziun a scolaras ed a scolars, er persunas d'instrucziun e geniturs pon s'infurmar davart las professiuns. Ins po storscher e volver quai sco ch'ins vul, la EMBA è effizienta: in lieu, passa 50 professiuns, 700 scolaras e scolars.
En il temp dal conclus davart las plazzas d'emprendissadi II duess la EMBA servir sco project da pilot per ulteriuras exposiziuns sumegliantas en il chantun che duessan avair lieu alternantamain. L'ultima EMBA è consequentamain er vegnida sustegnida cun daners dal conclus davart las plazzas d'emprendissadi. Quest onn è nossa dumonda vegnida refusada. Sche l'uniun grischuna d'artisandi e mastergn e sias organisaziuns interprofessiunalas n'avessan betg sustegnì fermamain la EMBA, n'avess probablamain gia l'exposiziun da l'onn current betg gì lieu. Da vart dal chantun n'èn vegnids nagins meds finanzials. Senza dubi è il mastergn cun il sustegniment da las federaziuns sez responsabel per la furmaziun professiunala. Tenor noss avis è dentant er il chantun responsabel. Il chantun Basilea-Champagna metta per exempel a disposiziun plirs 100'000 francs per in'exposiziun professiunala chantunala che ha lieu periodicamain. A chaschun dal forum davart la furmaziun professiunala svizra, che ha medemamain gì lieu durant la EMBA, han ins plinavant pudì intervegnir dal referat da signur Fumeaux, directur da l'uffizi federal per furmaziun professiunala e tecnologia, che ses uffizi disponia d'in fond d'innovaziun da 60 milliuns francs. Sias explicaziuns han ins pudì interpretar uschia ch'ins stoppia simplamain inoltrar ina dumonda. In tal project haja las schanzas da survegnir contribuziuns da sustegniment. Da questas ponderaziuns resultan las suandantas dumondas a la regenza:

1. Tge impurtanza ha la furmaziun professiunala or dal puntg da vista da la regenza?

2. Èn projects sco la EMBA degns da vegnir promovids?

3. È la regenza pronta da promover e da sustegnair pli fitg tals projects en l'avegnir?

4. Han ins dumandà l'uffizi federal per furmaziun professiunala e tecnologia per contribuziuns d sustegniment? U n'èsi betg stà enconuschent ch'igl existia in fond d'innovaziun?

5. Tge rolla ha l'uffizi per la furmaziun professiunala en connex cun talas exposiziuns professiunalas?

6. È la regenza pronta d'attribuir in post da bilantscha fix a talas exposiziuns professiunalas sco la EMBA?

Cuira, ils 8 da december 2004

Name: Crapp, Claus, Stiffler, Arquint, Augustin, Barandung, Baselgia, Berther (Mustér), Bleiker, Bucher, Casanova (Vignogn), Casty, Cavegn, Caviezel (Pitasch), Christ, Conrad, Demarmels, Dermont, Farrér, Federspiel, Giovannini, Gredig, Jäger, Kleis-Kümin, Krättli-Lori, Maissen, Mani-Heldstab, Marti, Meyer Persili (Cuira), Michel, Parolini, Parpan, Perl, Peyer, Portner, Righetti, Rizzi, Robustelli, Sax, Schmid, Thomann, Tremp, Trepp, Tuor, Zanetti, Zindel, Brasser, Campell, Caviezel (Cuira), Gloor, Mainetti, Nay, Niederer, Thurner, Züst

Session: 8.12.2004
Vorstoss: rg Anfrage


Resposta da la regenza

A la "exposiziun da mastergns/Berufsausstellung" (EMBA), iniziada lezza giada da l'uniun da traffic Alvra/Surmeir, sa participescha il chantun dapi l'onn 1995 tras la cooperaziun da la cussegliaziun professiunala en il comité d'organisaziun ed a l'exposiziun. Al cumenzament è la cussegliaziun professiunala stada preschenta cun il CIP-mobil, pli tard cun in agen stan. La contribuziun finanziala dal chantun cumpigliava ils agens custs da persunal e l'indriz da l'agen stan d'infurmaziun.

Tras la lantschada dal conclus davart las plazzas d'emprendissadi II è resultada la pussaivladad en il chantun Grischun da conceder contribuziuns federalas e chantunalas per las exposiziuns professiunalas inoltradas sco projects da pilot. Tras quai han ils stans pudì vegnir equipads cun attatgs d'internet, las inscripziuns dals stans han pudì vegnir unifitgadas ed actualisadas ed i han pudì vegnir pajadas contribuziuns als transports da scolaras e da las scolars.

1. Dal puntg da vista da la regenza ha la furmaziun professiunala ina impurtanza centrala per la furmaziun dals giuvenils.

2. La EMBA è ina contribuziun impurtanta per l'infurmaziun da scolaras e da scolars, dentant er da geniturs e da persunas d'instrucziun en vista a la tscherna da professiun dals giuvenils en la regiun. La EMBA e purschidas cun ina concepziun sumeglianta en autras regiuns pon perquai da princip vegnir giuditgadas sco degnas da vegnir promovidas.

3. La regenza è anc adina pronta da sustegnair exposiziuns professiunalas tenor pussaivladad. In engaschi bler pli ferm na po dentant en vista a las stgarsas resursas da persunal ed al squitsch da spargnar strusch vegnir empermess.

4. Displaschaivlamain n'èsi betg pli stà pussaivel da conceder daners dal conclus davart las plazzas d'emprendissadi II per la EMBA da l'october 2004, perquai ch'ils projects ston esser terminads e facturads fin la fin da settember. Ina dumonda per ina contribuziun da sustegn or dal fond d'innovaziun da la confederaziun n'è betg vegnida fatga; quel mument stuevan ins partir dal fatg che projects ch'eran gia vegnids sustegnids dal conclus davart las plazzas d'emprendissadi na survegnian nagins daners da promoziun supplementars or dal fond d'innovaziun. Actualmain prepara l'uffizi federal cumpetent in catalog da criteris che fixescha, sut tge premissas che la confederaziun vegn a sustegnair cun il fond d'innovaziun exposiziuns professiunalas sco mesiras da la preparaziun per la tscherna da professiun. Quest catalog da criteris vegn relaschà da la cumissiun federala per la furmaziun professiunala. Uschespert che quest catalog è enconuschent, vegnan las organisaturas ed ils organisaturs da las exposiziuns professiunalas infurmads tras l'uffizi per la furmaziun professiunala.

5. L'uffizi per la furmaziun professiunala duai sustegnair er vinavant las exposiziuns professiunalas organisadas sin l'iniziativa dal mastergn e da las federaziuns professiunalas, e quai tras la collavuraziun da la cussegliaziun professiunala tar l'organisaziun e tar la realisaziun.

6. Pervi dal squitsch da spargnar enorm, che ha chaschunà intervenziuns dolurusas en differents secturs, n'èsi displaschaivlamain betg pussaivel da conceder a las exposiziuns professiunalas contribuziuns chantunalas en la medema autezza sco quai ch'igl è stà il cas cun il sustegn dal conclus davart las plazzas d'emprendissadi. La regenza è dentant pronta da prevair in post da bilantscha fix per las exposiziuns professiunalas organisadas dal mastergn e da las federaziuns professiunalas. Davart quest post da bilantscha po il cussegl grond decider en il rom da las cussegliaziuns dal budget.

Datum: 11 da mars 2005