Navigaziun principala

Cuntegn da la pagina

Dumonda Stiffler concernent la lingia da la viafier retica da Tavau a Filisur

sessiun: 08.12.2004
Il traject da Tavau a Filisur è ina da las lingias las pli bellas e variadas da la viafier retica. Per lung da quel sa chattan numerus edifizis istorics ed autras attracziuns,
p.ex. il museum da minieras Schmelzboden, la bieraria da Monstein, la chavorgia da Zügen, il viaduct da Wiesen, la staziun da Wiesen e.u.v.
Cun ina buna commerzialisaziun sa laschassan nizzegiar purschidas ch'existan gia. Cun paucs custs pudess p.ex. vegnir realisà il project d'ina viafier da museum.
Ultra da quai daventass il glacier-express bainquant pli attractiv, sch'il traject da Tavau a Filisur fiss inclus. La Val d'Alvra e Tavau profitassan turisticamain.

Perquai dumandain nus la regenza il suandant:

1. È la regenza pronta da trair a niz quest potenzial prezius e da sustegnair il project da la viafier da museum?

2. E d'integrar il traject da Tavau a Filisur en la purschida dal glacier-express analogamain al traject da San Murezzan a Zermatt?

Cuira, ils 8 da december 2004

Name: Stiffler, Barandun, Arquint, Baselgia, Beck, Bleiker, Bucher, Casanova (Cuira), Casty, Cavegn, Christ, Christoffel, Conrad, Crapp, Dermont, Feltscher, Fleischhauer, Frigg, Giacometti, Göpfert, Hardegger, Hess, Hübscher, Joos-Buchli, Kessler, Koch, Krättli-Lori, Mani-Heldstab, Marti, Michel, Montalta, Nigg, Noi, Parpan, Pedrini, Portner, Sax, Vetsch, Zindel, Gunzinger, Jecklin-Jegen, Thurnher, Züst

Session: 8.12.2004
Vorstoss: rg Anfrage


Resposta da la regenza

La regenza è er da l'opiniun che la lingia da la viafier retica da Tavau a Filisur haja ina gronda valur turistica (cuntrada, concepziun dal trassé, construcziuns artifizialas). La commerzialisaziun da la purschida è da princip ina incumbensa da la viafier retica sco er d'ulteriuras organisaziuns partenarias sco l'uniun "museum da l'istorgia da la viafier da l'Alvra", il "club 1889" u ils "amis da locomotivas a vapur VR". Da vart dal chantun po in eventual sustegn finanzial dal project "viafier da museum" succeder pir, sch'ina dumonda è avant maun ed en il rom da sias pussaivladads legalas (promoziun da l'economia resp. traffic public).
Grazia a l'engrondiment da la staziun da Filisur circuleschan dapi ils 12-12-2004 ils trens da Tavau a Filisur durant tut l'onn en il tact d'ina ura; ultra da quai existan gia oz divers trens turistics. La stagiun da stad vegn purschì mintga di il "express Heidi" (a partir da la stad 2006 integralmain cun vaguns da panorama) da Tavau sur Filisur a Tiraun ed enavos (stad 2004: 48'000 passagieras e passagiers). La stagiun d'enviern circulescha ina giada per emna in tren cun vaguns da panorama da Tavau sur Filisur a San Murezzan ed enavos. Er quest tren ha ina gronda popularitad ed è in enritgiment da la purschida turistica da Tavau. Latiers vegnan purschids durant l'entir onn tut tenor la dumonda divers curs spezials cumpigliond la lingia da Tavau a Filisur, blers da quels er cun vaguns istorics. Ussa che l'engrondiment da la staziun da Filisur è succedì, datti da nov ulteriuras pussaivladads per trair a niz questa lingia; questas pussaivladads stattan en in connex direct cun il museum da l'istorgia da la viafier che l'uniun "museum da l'istorgia da la viafier da l'Alvra" ha l'intenziun da realisar en l'arsenal vegl sper la staziun da Bravuogn. Cun cumprar quest edifizi ha la viafier retica gia prestà ina contribuziun essenziala.
En quai che concerna il glacier-express vegn la lingia da Tavau a Filisur utilisada grazia a l'engrondiment a Filisur gia a partir da la stagiun da stad 2005 en il senn da la dumonda. Las viagiaturas ed ils viagiaturs dal glacier-express davent da Tavau vegnan manads a Filisur en vaguns dal tren regular ch'èn marcads spezialmain e che cuntegnan infurmaziuns da viadi correspundentas. Là pon els midar empernaivlamain en il glacier-express grazia al nov perrun da mez. Uschia pon las viagiaturas ed ils viagiaturs dal glacier-express da Tavau a Zermatt giudair ultra da la lingia a Filisur er ina da las parts impurtantas da la lingia da l'Alvra renumada (viaduct dal Landwasser). Quai è er cun la midada da tren a Filisur ina meglieraziun marcanta da la purschida, perquai che pli baud vegnivan manads mo singuls vaguns dal glacier-express cun trens regulars tras il Partenz a Cuira. Questa varianta da la purschida è er vegnida elegida en vista a la messa en funcziun dals quatter trens novs dal glacier-express tras la viafier retica e tras la viafier Matterhorn-Gottard la stad 2006 per offrir er als giasts da Tavau la pussaivladad da viagiar cun ils vaguns ils pli novs. Quai dat la schanza da pudair generar ina dumonda pli gronda da viagiaturas e da viagiaturs dal glacier-express davent da Tavau.

Datum: 9 da favrer 2005