Navigaziun principala

Cuntegn da la pagina

Dumonda Giacometti concernent directivas chantunalas per quietar il traffic entaifer il vitg

sessiun: 19.04.2005
Ils 15 da mars 2005 ha la regenza relaschà novas directivas per quietar il traffic entaifer il vitg. Tenor infurmaziuns dal departament da giustia, polizia e sanitad èn vegnidas inoltradas l'ultim temp pliras dumondas da vischnancas che vulan quietar il traffic entaifer il vitg per motivs da segirezza. Tenor noss savair sa tracti en quest connex cunzunt da las suandantas vischnancas: Haldenstein, Schiers, Malans, Almen, Arosa, Farera, Laax, Silvaplauna, Bever, Schlarigna, Madulain, Zernez e Scuol.

Las directivas relaschadas da la regenza per mesiras per quietar il traffic entaifer il vitg èn memia restrictivas areguard la permissiun da tempo 30 sin vias chantunalas. Cun la premissa ch'ina tscherta valur v-85 na dastga betg esser surpassada avant l'introducziun da tempo 30 (v-85 < 42 km/h sin vias principalas resp. < 44 km/h sin vias da colliaziun), daventass la pratica da la regenza ina pratica ch'era fin uss progressiva bler pli rigurusa.

Sche questa premissa fiss vegnida applitgada rigurusamain, n'avess p.ex. la zona da tempo 30 a Maiavilla che vala en l'entira Svizra sco bun exempel gnanc pudì vegnir realisada. En il cas da Schiers, per numnar in auter exempel, stuess il tempo 30 sa restrenscher sin il center dal vitg il pli stretg, pia là, nua ch'i vegn gia oz charrà plaun. Ma precisamain davant la chasa da scola, nua ch'i vegn charrà oz bler memia svelt, stuess ins desister da tempo 30. E quai malgrà che la radunanza communala da Schiers ha approvà la proposta da la zona da tempo 30 cun 80% da las vuschs. Ma er ina vischnanca sco Farera che ha schizunt concludì il tempo 30 senza cuntravuschs, stuess desister d'ina tala zona. Ulteriuras vischnancas che dumondan zonas da tempo 30 èn p.ex. Laax e Zernez; applitgond las directivas na pudessan lur dumondas betg vegnir approvadas u pudessan vegnir approvadas mo per part.

Er il post da consultaziun svizzer per la prevenziun d'accidents (ppa) è da l'avis ch'ina valur v-85 fixada talmain bass saja memia restrictiva ed impedeschia zonas adequatas da tempo 30 per motivs da la segirezza dal traffic. En sias atgnas directivas per la cussegliaziun da chantuns e da vischnancas desista il ppa sapientivamain d'in tal "criteri d'exclusiun".

Sche vischnancas ch'èn situadas a la fin d'ina via chantunala vegnan tractadas a moda privilegiada, chaschuna quai plinavant gronda ingiustia. Ad Arosa po uschia p.ex. vegnir introducì il tempo 30. Ma en las ulteriuras vischnancas per lung da la via dal Scanvetg, las qualas piteschan bunamain mo dal traffic si e giu d'Arosa, na fiss quai strusch pussaivel.

Sin basa da las ponderaziuns qua survart tschentain nus las suandantas dumondas a la regenza:

1. È la regenza dal medem avis sco las interpellantas ed ils interpellants, che la segirezza dal traffic stoppia vegnir meglierada er sin las vias chantunalas en ils vitgs?

2. È la regenza er da l'avis che tut las vischnancas hajan da princip il medem dretg sin mesiras per la segirezza dal traffic, e quai independentamain da la dumonda sch'ellas èn situadas per lung d'ina via principala, per lung d'ina via da colliaziun u a la fin d'ina tala?

3. È la regenza er da l'avis che la voluntad, che vegn exprimida da la populaziun ch'è pertutgada directamain en ils vitgs, stoppia er esser cundecisiva per giuditgar mesiras per quietar il traffic sco zonas da tempo 30 e.u.v.?

4. È la regenza pronta da resguardar adequatamain quests aspects en la nova lescha davart las vias e d'adattar correspundentamain las directivas dals 15 da mars 2005, ubain da prender autras mesiras per quietar il traffic per meglierar uschia la segirezza da la populaziun pertutgada?

Cuira, ils 19 d'avrigl 2005

Name: Giacometti, Parolini, Bucher-Brini, Bühler, Casanova (Cuira), Caviezel-Sutter (Tusaun), Dermont, Frigg, Hardegger, Hess, Jaag, Jäger, Jenny, Keller, Meyer Persili (Cuira), Michel, Peyer, Pfenninger, Pfiffner, Portner, Quinter, Schütz, Trepp, Zegg, Zindel, Caviezel (Cuira)

Session: 19.04.2005
Vorstoss: rg Anfrage


Resposta da la regenza

La revisiun da l'ordinaziun davart la signalisaziun da las vias (OSV) ha simplifitgà d'introducir zonas cun restricziuns dal tempo, cunquai ch'ella pussibilitescha zonas da tempo 30 sin vias lateralas da caracter sumegliant e conceda als chantuns ina libertad maximala per ordinar mesiras accumpagnantas. Da princip èn zonas da tempo 30 admissiblas sin tut las vias. Trajects da vias principalas dastgan dentant vegnir integrads mo excepziunalmain e mo en cas da cundiziuns localas spezialas, p.ex. en in center dal vitg u en in territori d'ina citad veglia (art. 2a OSV).

Pervi da l'augment da las dumondas per zonas da tempo 30 che cumpiglian vias chantunalas ha il departament da giustia, polizia e sanitad incumbensà la cumissiun per la sveltezza maximala differenziada d'elavurar ina directiva che concretisescha las prescripziuns federalas.

Tenor l'avis da la regenza ston vias chantunalas da princip surpigliar la funcziun da vias orientadas al traffic. Primarmain ston ellas vegnir concepidas per il traffic sin via. Quai vala spezialmain per vias principalas signalisadas e per vias da colliaziun cun dretg da precedenza che han ina funcziun da passadi, d'apport e da colliaziun, uschia ch'i n'è betg permess da far installaziuns en furma d'impediments verticals e da stretganidas. Pervi da quai vegnan zonas da tempo 30 approvadas mo a moda fitg restrictiva. Questa orientaziun correspunda er essenzialmain a las ideas dal departament federal per ambient, traffic, energia e communicaziun (DATEC) e dal post da consultaziun svizzer per la prevenziun d'accidents (ppa) che prevesan medemamain da differenziar tranter vias orientadas al traffic e vias orientadas a l'abitadi.

1. Igl è ina finamira permanenta da la regenza da prender sin tut las vias mesiras per augmentar la segirezza dal traffic e d'abolir mancanzas da segirezza tras mesiras adattadas en il rom da las pussaivladads. Puncts critics per accidents vegnan identifitgads tras l'evaluaziun d'accidents da la polizia chantunala e neutralisads permanentamain cun mesiras architectonicas u cun signals.

2. In augment da la segirezza dal traffic, cunzunt per proteger las participantas ed ils participants dal traffic pli debels, sto vegnir avisà tant sin las vias communalas sco er sin las vias chantunalas. Sch'i vegnan relaschadas mesiras da la tecnica da traffic e mesiras da concepziun sin las vias chantunalas, ston vegnir resguardadas d'ina vart ponderaziuns da segirezza e da l'autra vart la capacitad dal passadi e la funcziun. Quai chaschuna ch'ins sto prender differentas mesiras tut tenor il tip da via. Per la segirezza dal traffic èsi d'ina impurtanza decisiva che las utilisadras e ch'ils utilisaders da la via sappian adina, sch'els sa chattan ubain en ina zona d'inscunter resp. en ina zona da tempo 30 ubain sin ina via cun ina sveltezza maximala da 50 km/h.

3. La voluntad da la populaziun pertutgada directamain vegn respectada ed integrada en la procedura da decisiun, uschenavant che quai è pussaivel. En lieus senza via da transit sco ad Arosa ed a Haldenstein pon ils interess da la populaziun indigena vegnir resguardads meglier che en lieus cun traffic da transit. Ina valitaziun dals differents interess e basegns è necessaria en il cas singul. In tschert dischavantatg per las persunas che abitan per lung da vias da transit na sa lascha sin basa dals fatgs descrits betg evitar.

4. La regenza resguarda la directiva per quietar il traffic entaifer il vitg sco in agid adequat per giuditgar a moda giuridica eguala zonas da tempo 30 u zonas d'inscunter. L'elavuraziun da las dumondas entradas ha mussà che l'applicaziun e l'interpretaziun dals criteris da la directiva han chattà la chapientscha da las vischnancas, uschia ch'i na basegna actualmain naginas adattaziuns. Sch'i duess dar problems en l'avegnir u sche la situaziun da partenza avess da sa midar, n'èsi betg exclus d'adattar la directiva en l'avegnir. En il rom da las tractativas tar la lescha davart las vias èsi surlaschà al cussegl grond da s'exprimer davart la dedicaziun da l'intent da las vias chantunalas resp. davart las premissas da las mesiras per quietar il traffic.

Datum: 24 da zercladur 2005